Yobo 12 - Libuka Lya Kuyela

Yobo

¹ Yobo wakumbwile ngayi,

² “Mwa shikuma enubene bantu, mukafwa na ngana zenu hamo.

³ Ngoboni nami kami nili na ngana ngonehe eze muli nazo. Howa naha tunalishiyili enu na nami. Yani muntu wabula kulimuka nimwabyo biya unamba?

⁴ Nengakale shihepwa ku bahoni bami. Ami nalombelenga kuli Nyambi pe wankumbwilenga, muntu wakulunga na kubula nyanco, hano nengakale shihepwa ku bantu.

⁵ Muntu ulishiwahe wahengaminanga uli mu wukalu, uli na kukama muntu ou uli hahepi na kuwa.

⁶ Ngoboni bezi na bantu bakubula wunyambi ba kuyoya mu ku mwena mu zintanda zabo, ba kushimba nyambi mu maboko wabo.”

⁷ Ngoboni yipula tunzama tukaku longesha, na tuyoni tukakutongweza.

⁸ Hinge ku bya kumena hanci, pe bikaku longesha, na zinci zamu liwate zikakulubwilila.

⁹ Kati yani wabula kulimuka ngayi, liboko lya Nyambi ya Ngula nilyo lyatendele ebye.

¹⁰ Mu liboko lya Nyambi nimo muli wumi wa byuma bya kuyoya nimwabyo na wumi wa bantu nimwabo.

¹¹ Kati litu kaliha lyayuvwanga byambo. Ngonehe lulimi lwa yelanga byakulya?

¹² Ngana zekala ku bakulwane, ku yuvwishisha kwekala ku muntu unayoyo matena amengi.

¹³ Ngana na ngovu byenga bya Nyambi. Kukwendi kuli kubela na ku yuvwishisha.

¹⁴ Ndi Nyambi ukunyemuna, kowa ukutwesha kutendulula, Nyambi ashinkila muntu mu tolongo, kowa ukumushobololamo.

¹⁵ Nyambi akemika mvula, linanga likwiza. Nyambi aleta libazi, mema ayitanga.

¹⁶ Ngovu na ngana byenga bya Nyambi. Mukakwongeziwa na mukakwongeza wubili wabo, benga ba Nyambi.

¹⁷ Wendeshanga batulela muhelengwa na ku yebesha bakakuyata.

¹⁸ Nyambi ukufumisha bamyene ha matanda, na ku bamanga mikunzi ya wulungo.

¹⁹ Wayangulanga ngana za bakankombela nakupashula bantu bangovu.

²⁰ Walempakanyishanga nyambilo ya bantu ba kukulupiliwa, kami wafumishanga ngana za bakulwane.

²¹ Wahandulanga baya bali na kulela, na ku shobolola mikunzi ya bantu bangovu.

²² Wahololanga byuma bya kuholama bya mu mincimpwe, na kuleta mincimpwe ku liyeye.

²³ Waneneheshanga matunga, ngoboni amina walobeshanga, naniye waneneheshanga matunga na kuwakenda.

²⁴ Niye mukakuyebesha bakakutwaminina ba hano hanci, na ku bayambangilisha mwakubula nzila.

²⁵ Nibo bapapatilanga mu mincimpwe mwakubula mwaana, na ku batalangilisha ngo bakakukolwa.