Yobo 11 - Libuka Lya Kuyela

Zofwali

¹ Niho Zofwali waku Namatite akumbwile ngayi,

² “Kati muntu kutwesha kukumbula ku wingi wa nebye nimwabyo binambiwi wufwako ndi? Kati kwamba shikuma kukutwesha kuyaka muntu mukwoloka ndi?

³ Obe Yobo, kati obe ukuhanganika ngayi etu kutwesha kukukumbula tufwako ndi? Hinge mazu obe akubwayoka, akutwesha kutukanisha kwamba ndi?

⁴ Obe ukwamba ngayi, ebye ukwamba binengi bya kupwisha. Ukwamba ngayi unengi wa kuyela ku meho a Nyambi.

⁵ Eshe nikushinga ngayi Nyambi mwanga ambe, shinga unakwambili,

⁶ ha kukutongweza bya kukeya kwa ngana zendi za kulimba. Kubili byuma byabingi bya kunonka bya kubula ku yuvwishisha ngana za muntu. Nyambi kulaba wubi wobe nimwawo afwako.”

⁷ Kati ukutwesha ku yuvwishisha ncimpi za Nyambi? Kati ukutwesha kulimuka ngana za Mpandashilanga ndi?

⁸ Mamaninino a ngana zendi ali hayilu ya mbimbayilu, haya obe ukutendaho bishini? Nginza ya ngana zendi ya kupitakana kalunga ka bafu, haya obe ukalimuka bishini?

⁹ Shipimo sha ngana zendi shenga shashitali shikuma kupitakana wutali wa kaye, namu lupati kupitakana liwate.

¹⁰ Nyambi ndi ukukukwata na ku kuyatisha. Pe yani boni wakutwesha kumukanisha?

¹¹ Nyambi halimuka bantu ba mahalo, Kati kutwesha ufwako ku mona hanabipi ndi?

¹² Shawangu kuheta mbongolo wa lishaka, kupitakana muntu wakuyeba kwikala na ngana.

¹³ Obe Yobo, mutima wobe winge wakulunga. Olola maboko wobe na kulombela kuli Nyambi.

¹⁴ Ndi mu mutima wobe muli wubi, wuwufumishe, wubi nimwawo wuwufumishe mu mutima wobe.

¹⁵ Wakatenda noho, lisheni lyobe nimwalyo likamana, pe ukalamiwa kami ufwako kukayuvwa bowa ku meho a bantu.

¹⁶ Niho, makando wobe nimwawo akamana, ngonehe libazi liya lyapita kale.

¹⁷ Wumi wobe ukakwanguluka shikuma, kupitakana kubyazima kwa mutena wa hakati ka mutwe, pe bikati bya wumi wobe bya mincimpwe, bikabyazima ngonehe kututika kwa mutena.

¹⁸ Ukekala shiwahe ndaba kuli kulumbeza. Ukakukoweza na kukukatalisha.

¹⁹ Kukatina bamalamo bobe wufwako, bantu babengi bakashinga ngayi ubayavwe.

²⁰ Ngoboni bakuluwa bakapenza noku noku na kulihupwiza, pe kukawaniwa ngayi nzila kowa ya kupanzila. Kulumbeza kwabo kunengi tuhu lufu.