Yobo 10 - Libuka Lya Kuyela

Yobo ukulila ha makando wendi

¹ Nakwangakale kuyoya. Nikalinyenga nimwako mu kushoboloka. Nikaholola manyengo wami nimwawo amu mutima.

² Nikatongweza Nyambi ngayi, “Hinga umpana mulandu. Ngoboni ntongweze eshe ukunyatishila.”

³ Kati kukwobe shinengi shashiwahe ngayi unyandishe, kati ukutwesha kukenda ebye unatende obe mwine na maboko wobe ndi? Kati uku wahilila kuntendelo ya bantu bakuluwa ndi?

⁴ Kati obe wekala na meho a wuntu ndi? Kati obe wamonanga ngonehe amonanga muntu ndi?

⁵ Kati wumi wobe wenga wawipi ngonehe wa muntu ndi? Hinge ngayi myaka yobe, yenga ngonehe myaka ya muntu ndi?

⁶ Haya shumangani boni ukushinga shingila wubi wami? Shumangani mu kuncingila ha kungwanina wubi?

⁷ Hinge ndi unalimuku ngayi ami mulandu nifwawo, pe kami kowa muntu ukutwesha ku ndamwina ku liboko lyobe.

⁸ Maboko wobe antendele, niwo abumbile bimamo byami nimwabyo, pe haya wowo maboko amo niwo akandobesha ndi?

⁹ Anuka ngayi obe wambumbile ngonehe lima, kati ukumfutula kami ngayi ninge lukungu ndi?

¹⁰ Kati kaliha obe wapanikile batate nyala ngayi bambeleke, kati kaliha obe wangwishilile mu livumo lya bamawa.

¹¹ Obe wanungile lutu lwami na bifupa na makana, pe wafwikile bifupa byami na nyama na shikonde.

¹² Obe unampaniki wumi na shishemo sha mwaya myaka, pe kufulankana kwobe kunanyoyeshe.

¹³ Bikati nimwabyo wekalile na kulimba, haya nalimuku bihanganiko byobe.

¹⁴ Wampenzelelenga ngayi umone ndi nafwanini Kubipisha, nohobene ngayi mwanga utweshe kukana kunyatila.

¹⁵ Akwinga makalikiza amanene kukwami ndi ninabipishi, hinge ndi nikutenda shiwahe, nifwako kutwesha kukatula mutwe wami. Ndaba nili mu malwa, pe kami nili na lisheni.

¹⁶ Ndi nikulikatula amimwine, pe ukunyomba ngo shimbwi, ukunyuvwisha kukola ha kutenda bikomokesho.

¹⁷ Wonzela tuhu kuwana wupaki hahami wakundwisha, wukali wobe hahami uli na kuneneha, wonzela tuhu kufunga mwakundwishila.

¹⁸ Shumangani, obe Nyambi, wetabilishile ngayi nihemuwe? Shinga nafwile oho shilolo bamone bantu.

¹⁹ Shinga kaliha namonekele, hinge shinga napitakaninine tuhu mu shinzimbi ha kuhemuwa.

²⁰ Kati matena akuyoya kwami kaliha a kulaba ndi? Haya nciye taha. Ndehe taha nilikuwe ha matena awa anashalako.

²¹ Wuluno niye oku nikabula kukaboka, ku litunga lya bafu, kuya kwenga mincimpwe shikuma,

²² litunga lya mincimpwe na mimvulu na lumpa, oku hinge mwaana wafutuka mincimpwe.