Yobo 1 - Libuka Lya Kuyela

Shatana ukwezeka Yobo

¹ Kwekalile mulume lizina lyendi Yobo ou wekalilenga mu litunga lya Uzi. Wakubula nyanco Nyambi kami wengile wakulunga kukwendi. Wengile muntu wakutina Nyambi, muka kulilama na kubula kutenda sha shibi.

² Wabelekele bana mutanu na babili babalume na bana babambuyama bahatu,

³ kami wahetele bambelele 7,000 na bakamela 3,000 na bipani bya mapulu 500 na bambongolo 500. Niye kami wekalile na bakamilimo babengi shikuma. Wengile muntu wakuheta shikuma waku Mushamuko.

⁴ Bana ba Yobo babalume baliyangushunwinenga ha kutenda mayambwayambwa ku litala lya umo na umo, pe behaninengako bampanzabo bahatu kwiza mu kulya na kunwa nabo.

⁵ Oho shikati sha mayambwayambwa shamaninenga kulumenemene na lumenemene, Yobo walimenekelenga kuya mu kukombelela nkombela ya kuyelesha bana bendi. Niye watendelenga eshe ha shikati nimwasho ndaba wahanganikile ngayi kampe umo ha bana bendi una bipishili Nyambi mu mutima wendi.

⁶ Haya kwekalile mutena umo oho bana ba Nyambi baliholwele ku meho a Nyambi ya Ngula na Shatana kami na niye wekalile hakati kabo.

⁷ Nyambi ya Ngula wepwile Shatana ngayi, “Kati ukufuminina kuti?” Shatana wakumbwile ngayi, “Ninendenga hanci, niyimo nibokomo niyimo nibokomo.”

⁸ Nyambi ya Ngula wepwile Shatana ngayi, “Pe unatosho mukamulimo wami Yobo ndi? Kowa muntu hanci wakumufweka, wakubula nyanco na wakulunga, wakutina Nyambi na kubula kutenda shashibi.”

⁹ Shatana wakumbwile Nyambi ya Ngula ngayi, “Kati Yobo wakutinanga tuhu ha kubula shimina ndi?

¹⁰ Nka ndaba unamukoweze shikati nimwasho na ba lupashi lwendi na byuma nimwabyo aheta. Unafuywele byuma nimwabyo akutenda, kami unamupaniki bimuna babengi banenzala mu litunga.

¹¹ Ngoboni ndi ukamuyangula byuma nimwabyo alinabyo ukakuhandula mwaanancanana ku meho wobe.”

¹² Nyambi ya Ngula, wambile kuli Shatana ngayi, “Mona, byuma nimwabyo alinabyo bili mu ngovu zobe, ngoboni kaliha wafwanina kukwata liboko ha lutu lwa Yobo.” Pe Shatana wayile.

Bana ba Yobo ba kulobeshiwa na wuheti wendi hamo

¹³ Mutena umo oho bana ba Yobo bekalile na mayambwayambwa ku litala lya yayiyabo,

¹⁴ ntumwana wezile lubilo kuli Yobo na ku shimikila nehe ngayi, “Twaliminga mafuba na zingombe, kami bambongolo bekala kwakwipi na mabuyishilo,

¹⁵ tunabazumuku tuhu Mushobo wa Bashembayani, banezi na kutulwisha pe banapukulu nimwabo. Banazihi bakamilimo bobe nimwabo. Ami tuhu napanzako, nezi mu kukutongweza.”

¹⁶ Oho shilolo amanishe kwamba, mukamulimo wamina wakumine na kwamba ngayi, “Lumuni lwa mvula lwatulili ha bambelele na balishani pe lunazihi nimwabyo. Ami tuhu napanzako nezi mu kukutongweza.”

¹⁷ Oho shilolo amanishe kwamba, mukamulimo wamina wezile pe wambile ngayi, “Mihoko yihatu ya bamakombe Bakalandiya banatulwishi pe banashimbi bakamela nakuziha bakamilimo bobe nimwabo ami tuhu napanzako nezi mu kukutongweza.”

¹⁸ Oho shilolo amanishe kwamba, mukamulimo wamina wezile pe wambile ngayi, “Bana bobe bekala na mayambwayambwa ku litala lya mwanobe wa mweli,

¹⁹ nkuli ya fuminina ku libelelengwa, na kushiwila litala hanci pe yinazihi bana bobe nimwabo. Ami tuhu napanzako nezi mu kukutongweza.”

²⁰ Niho Yobo emanine na kutabola bikobelo byendi mu wunginga. Walishehele ku mutwe too na kuliwishila hanci na kulemesha Nyambi ya Ngula.

²¹ Wambile ngayi, “Nahemuwile muhelengwa kami nikafwa muhelengwa. Nyambi ya Ngula wampanikile pe haya nanyangulu. Lizina lyendi mwanga liyemeziwe!”

²² Mu byuma nimwabyo byatendiwile, Yobo kaliha wabipishile hinge kuhandula Nyambi.