Yelemiya 9 - Libuka Lya Kuyela

¹ Shinga ngayi mutwe wami, wenga lishima lya mema, na meho wami enga kaheloke ka mihozi, shinga nikalila mwaana na wushiku, ndaba bantu bami bazihiwakale.

² Shinga ngayi nili na ntanda ya kukatalila mu libelelengwa, shinga ninashiyi bantu bami, ngayi nikekale kwakutali nabo. Ndaba nimwabo banengi bakakutenda bya lwiholwiho, bakakulikungulula mu kwamba bya kuyeba.”

³ Baliwahishila kwamba bya mahalo na zindimi zabo, kaliha bakakwamba kupwisha, ebye nibyo byashumakale mu litunga. Bali na kutwalililaho kutenda wubi kami kundimuka bafwako. Eshe nisho anamba Nyambi ya Ngula.

⁴ Muntu nimwendi unafwanini kukeya na ndambo yendi, kami hinga akulupila yayiyendi hinge mukonzo wendi wa mulume. Ndaba yaya muntu hinge mukonzo wa muntu nimwabo bengakale bakakwongeza, kami ndambo ya muntu wengakale wa mahalo.

⁵ Muntu nimwendi ukwongeza ndambo yendi, kowa ukwamba bya kupwisha. Banalongeshe zindimi zabo kwamba mahalo. Bakulikwangisha na kutenda byabibi. Pe ba kukwanga kutenguluka.

⁶ Ukuyoya mukati ka bantu ba mahalo, pe ndaba ya kwongeza ba kukana kundimuka. Eshe nisho anamba Nyambi ya Ngula.

⁷ Haya, Nyambi wa Makunge ukwamba ngayi, “Nikayungulula bantu bami ngonehe ngolinde, kami nikabezeka. Bantu bami banatende wubi, haya shumangani eshe ninafwanini kutenda?

⁸ Zindimi zabo zinafweke ngonehe mivwi ya kuyaka wulembe. Bakwamba bya mahalo, bantu bakwamba mazu amawahe ku bandambo babo, ngoboni mu mitima yabo, ba kubahanganikila bya nkole.”

⁹ Nyambi ya Ngula ukwamba ngayi, “Nikabashushula hanebye banatende. Nikashushula elye litunga lyanehe.”

¹⁰ Yelemiya ukwamba ngayi, “Nikapwezuma na kutuwa mbingo ha mabuyishilo amu libelelengwa, ndaba mwayumakale, pe hikowa ukupitilamo. Kukoloma kwa zingombe, kuyuvwanika hikufwako.”

¹¹ Yelushalema nikamufutula lilala, na malalo a bamimbwe. Nikalobesha minzi yamu Yunda, ngayi kukabule wakwikalamo.

¹² Yelemiya wepwile ngayi, “Obe Nyambi ya Ngula kati yani wangana ukutwesha ku yuvwishisha eshe? Yani banatongweze kuli Nyambi ya Ngula ngayi ashitontolole? Kati shumangani shinengishi litunga ngayi lilobeshiwe na kufutuka mapembe kwinga ngonehe libelelengwa, ngayi kubule muntu wakupitangamo?”

¹³ Nyambi ya Ngula ukwamba ngayi, “Eshe shinamoneke ndaba banakana ndayano zami ziya nabatongwezele, kami banabulu kwombatala lizu lyami, hinge kwenda ngonehe nabatongwezele.

¹⁴ Ngoboni banatende biheka bya mitima yabo yayikalu kami bakulemesha Mbaalu, ngonehe babalongeshele batatizabo.

¹⁵ Nohobene Nyambi wa Makunge, Nyambi wa Ishalela ukwamba ngayi, nikabalisha byakulya byabilulu na kubapana mema a wulembe ngayi banwe.

¹⁶ Nikabapanzanishila hakati ka mikoka yiya babula kulimuka, mu mikoka yiya babulile kulimuka bankakazabo, pe nikatuma mukwale mu kubalwisha, hantu ninabalobeshe.”

Bantu ba Yelushalema ba ku fwanina kulila

¹⁷ Nyambi wa Makunge ukwamba ngayi, “Hanganikenu, pe mwihane bambuyama bakakulila beze, bambuyama balimuka kwimbila nyimbo za malila.

¹⁸ Batongwezenu banyankupishe batuwe nyimbo za malila. Meho wetu anapwezumu na mihozi pe kami na nkopyo zetu zipulumune mema.

¹⁹ Ndaba kukuyuvwanika kulila mu Ziyoni ngayi, ‘Twalobakale, tunayuvwishiwi lisheni shikuma ndaba tunashiyi litunga lyetu kami matala wetu anashiwuku.’”

²⁰ Enu bambuyama yuvwililenu lizu lya Nyambi ya Ngula, matu wenu ayuvwe lizu lyendi, longeshenu kulila banabenu babambuyama. Muntu na muntu alongeshe ou ali kundika nendi,

²¹ ndaba lufu lunakandamini mu mampananga wetu pe lwenginakale na mumisheke yetu, lwalobeshakale batwanuke mu mikwakwa na bandumbana mu zimbanza.

²² Batongweze ngayi, “Nyambi ya Ngula ukwamba ngayi, ‘Mituntu ya bantu ba kufwa yikapanzanishiwa ngonehe wutoko mu mafuba, ngonehe mbuto yinashala munyima ya bakakuteza, iya yinabulu muntu wakuyikungula.’ ”

²³ Nyambi ya Ngula ukwamba ngayi, “Muntu wangana hinga aliyemeza ha ngana zendi, hinge muntu wa ngovu hinga aliyemeza ha ngovu zendi, kami wakuheta hinga aliyemeza ha wuheti wendi.

²⁴ Ngoboni ou ukuliyemeza, aliyemeze mu kunyuvwishisha na kundimuka ngayi, Ami Nyambi ya Ngula, wa shishemo sha mwaya myaka, ou wayatanga shiwahe mu kwoloka hano hanci, ndaba ebye nibyo byangwahilisha ku mutima.” Eshe nisho anamba Nyambi ya Ngula.

²⁵ Nyambi ya Ngula ukwamba ngayi, “Monenu shikati shikeza oho nikashushula baya nimwabo baya ku mukanda wa wuntu.

²⁶ Baengepita na Bayunda na Baendoma na Baamoni Bamowambi na baya nimwabo bazika mu libelelengwa mu zimbalila za kwakutali, baya baketwilanga huki zabo. Nikabashushula ndaba awa matunga nimwao aya ku mukanda, ngoboni shilolo balame kulimama kwami, kami na baka litala lya Ishalela nimwabo shilolo balame oku kulimama.”