Yelemiya 8 - Libuka Lya Kuyela

¹ Nyambi ya Ngula ukwamba ngayi, “Ha shikati shiyo, bifupa bya bamyene na bakakutwaminina Yunda na bifupa bya bakankombela na bamiluwe na bifupa bya bantu bamu Yelushalema, bikatutwishiwila ha munkanda wa binzimbi byabo.

² Bikapanzanishiwa na kuyanikiwa ku mutena na ngonda naku nyenye nimwazo za muyilu, byuma ebye bahakile, ebye batendelenga milimo na kubikonka hamo na kubilemesha. Biya bifupa kuka kunguliwa hinge kukavumbikiwa bifwako, ngoboni bikafutuka wilo wa hanci.

³ Pe bantu baya bakashalaho bakamatunga a wubi, bakalihatila lufu kupitakana wumi, oku nimwako nikabatandila aba.” Nisho anamba Nyambi wa Makunge.

Wubi na Kashushwilo

⁴ “Ukabatongweze ngayi, ‘Nyambi ya Ngula ukwamba ngayi, Kati oho muntu awanga, kaliha wapindukanga ndi? Kati oho muntu ayanga mu nzila yashenge, kaliha watengulukanga ndi?

⁵ Haya shumangani aba bantu banashanukili mu nzila? Haya shumangani Yelushalema akwongezela ku shanuka mu nzila? Banakakatili ku tunankishi twa mahalo, kushinga kutenguluka bafwako.

⁶ Nayuvwilili shiwahe ngoboni kwamba bya kupwisha bafwako. Kowa muntu unatenguluku ku kuluwa kwendi na kwipula ngayi, “Kati ninatende bishini?” Muntu na muntu ukulitendela byendi, ngonehe mbishi ukunyankupila ku nzita.

⁷ Hinga kanyange, walimukanga shikati sha ku boka. Litela na kambimbi na mulombwe, balimukanga shikati sha kutuntuka, ngoboni bantu bami, kulimuka mazu a Nyambi ya Ngula bafwako.

⁸ “Mukwamba nahiti ngayi, muli bangana na kwamba kami ngayi ndayano za Nyambi ya Ngula zili mumwenu? Ngoboni monenu bakakutikita bakubula kukulupiliwa banafutulu ndayano.

⁹ Balume benu bangana banakana ebye ninamba. Haya bakakwatiwa pe bakayuvwa lisheni. Bafwako kuka limuka bya kutenda. Haya ngana zabo zili kuti?

¹⁰ Nohobene nikapanika bakazabo ku balume bamina kami mafuba wabo akapanikiwa kunobo bakabakoma ndaba ku balika ku wamushe kutwala ku wamunene nimwabo bali na mutongo wakuwana mali na kwongeza, kuheta na nzila ya kubula ku fwanina. Bamiluwe na bakankombela nabo kami bengakale ba mahalo.

¹¹ Bakupanga bitombo bya bantu bami shashishe, pe bakwamba ngayi, ‘Ku mwena, ku mwena,’ oho hinga kwabula ku mwena.

¹² Kati bali na lisheni oho ba kutenda bya wunyengwe ndi? Byo, lisheni bafwalyo, hinge kulimuka sha kuliyenena bafwako. Nohobene bakalituntula na kuwa hamo na baminabo nimwabo oho nikabashushula.” Eshe nisho anamba Nyambi ya Ngula.

¹³ Nyambi ya Ngula ukwamba ngayi, “Nikabalobesha, ndaba banafweke ngonehe mikolobozi ya shinyanca ya kubula mikabo, hinge ngonehe mutondo wa mukuyu wakubula nkuyu, uya unalebuku mabizi kami nimwabyo nabapanikile nikabayangulabyo.”

¹⁴ Haya bantu ba Nyambi balyambashanine ngayi, “Shumangani tukwikalila? Tukungulukenu, tuyenu ku minzi ya bipata tukafwileko, ndaba Nyambi ya Ngula Nyambi wetu watuyatakale ngayi tufwe, kami natupaniki kunwa mema a wulembe ndaba tunabipishi ku meho a Nyambi ya Ngula.

¹⁵ Tunekala na kutatilila ku mwena, ngoboni kowa byabiwahe binezi, tunekala na kutatilila kunyongomanishiwa, ngoboni kwezakale malwa.

¹⁶ Kupembula kwa bambishi ba bamalamo betu, kuli na kuyuvwanika ku litunga lya Ndani, bankunzi ba bambishi oho ba kukoloma litunga nimwalyo likukanka. Bamalamo betu bali na kwiza mu kulobesha litunga lyetu na nimwabyo biya bilimo, lukena lwetu hamo na bantu balwo.”

¹⁷ Nyambi ya Ngula ukwamba ngayi, “Keyenu nili na kutuma mayoka mukatikenu, mayoka a wuhungu wakubula kutwesha kupangiwa, pe akamihuma.”

Manyengo a Yelemiya ku bantu bendi

¹⁸ Manyengo ami kutwesha kupangiwa afwako, mutima wami unatweshe kupopa mushali.

¹⁹ Yuvwililenu kukaloka kwa bantu bami, aba bakufuma ku litunga lya kwakutali, “Kati Nyambi ya Ngula mu Ziyoni mowa ndi? Kati mwene yendi mowa mu Ziyoni ndi?” Nyambi ya Ngula ukukumbula ngayi, “Kati shumangani bananconkomwene ngayi nipilamine tunankishi twa mapukwenda?”

²⁰ Bantu ba kukaloka ngayi, “Kuteza kwamanakale, mayinza anamana, ngoboni shilolo tupulwishiwe.”

²¹ Yelemiya ukwamba ngayi, “Ndaba bantu bami banacancoliwi, pe ninacancoliwi, nikulila, kami nalikomokele shikuma.

²² Kati mu Ngiliyande wanga mowa ndi? Kati mowa mukakupanga ndi? Shumangani shikukwangisha bitombo bya bantu bami kupangiwa?