Yelemiya 7 - Libuka Lya Kuyela

Yelemiya uku shimikila mu Litala lya Nyambi ya Ngula

¹ Nyambi ya Ngula wambile kuli Yelemiya ngayi,

² “Yimana mu lipangati lya mu Litala lya Nyambi ya Ngula, pe ubilikize lino lizu ngayi, ‘Yuvwililenu lizu lya Nyambi ya Ngula enu bantu ba Yunda mwengininanga muno mu lipangati na kulemesha Nyambi ya Ngula.’

³ Nyambi wa Makunge, Nyambi wa Ishalela ukwamba ngayi, futulenu nyinkalo yenu na byuma ebye mwatendanga, ngayi mwanga nikamitabile kwikala muno.

⁴ Haya shiyenu kukulupila ku mazu akwongeza akwamba tuhu ngayi, ‘Elye nilyo Litala lya Nyambi ya Ngula.’ Twapulwishiwakale. ‘Elye nilyo Litala lya Nyambi ya Ngula, elye nilyo Litala lya Nyambi ya Ngula.’ ”

⁵ “Tengulukenu ku nyinkalo yenu naku zintendelo zenu na kuyata byambo shiwahe mu kupwisha ku umo na wamina.

⁶ Hinga mulyatilila mapukwenda na kulyatilila banginga, hinge bamfwile, hinge kuyita mukeza wa muntu wakubula mulandu mu uno mwanya. Hinga mukalemeesha banyambi bashenge kutina mukalobeshiwa.

⁷ Pe nikamitabila ngayi mwikalenga mu uno mwanya, mu litunga elye napanikile bankakazenu kwinga likona lyabo mwaya myaka.

⁸ “Monenu, muli na kukulupila mazu a mahalo, a kubula kuyavwa.

⁹ Kati mwayibanga, hinge kuziha, hinge kutenda bya lwiholwiho, hinge kubeza bya mahalo, hinga mwahokeshanga incence kuli Mbaalu ndi? Kati mwalemeshanga banyambi bashenge baya mwabula kulimuka ndi?

¹⁰ Niho mukwiza na kwimana ku meho wami muno mu litala, likutumbiwa na lizina lyami na kwamba ngayi, ‘Twapulwishiwakale.’ Ngoboni kami mu kuya na kutenda byuma nimwabyo bya wunyengwe.

¹¹ Kati mu kuhanganika elye Litala likutumbiwa na lizina lyami, linengi mwanya wakuholama bezi ndi? Nyambi ya Ngula ukwamba ngayi Amimwine ninamono ebye nimwabyo muli na kutenda.

¹² Wuluno yenunga ku Shilo, ku mwanya wami wakutatika uya nahatile, mukamone ebye ninatendemo ndaba ya kuluwa kwa bantu bami Baishalela.

¹³ Nyambi ya Ngula ukwamba ngayi, ndaba munatende ebye nimwabyo, hinge ndi namyambilile shikuma, ngoboni mwakanine kunyuvwa, pe kaliha mwankumbwile oho namihanine.

¹⁴ Nohobene, nimwabyo natendele ku Shilo nibyo nikatenda ku litala lyami elye mwakulupila. Ku mwanya uno napanine bankakazenu, nikatenda ngonehe natendele ku Shilo.

¹⁵ Nikamitanda ku meho wami, ngonehe natandile bawushindawenu, ba mukoka wa Efulemu nimwawo.”

Bantu bakubula kwombatala

¹⁶ Nyambi ya Ngula wambile kuli Yelemiya ngayi, “Hinga ulombelela aba bantu, hinga ubemanina hinge ku balombelela kukwami, hinga ubalambililila ndaba kuka kuyuvwilila nifwako.

¹⁷ Kati kaliha uku mona ebye bali na kutenda mu minzi ya mu Yunda na mu zinzila zamu Yelushalema ndi?

¹⁸ Batwanuke ba kucaba nkuni, balume bakwibika mundilo, pe bambuyama ba kuvuba muhunga kwinga mankende akuyohela nyambi yabo wa mbuyama owo batoyanga ngayi Lihano wa Muyilu. Bakutupula kami waine ku banyambi bashenge ngayi bashonkomone wukali wami.”

¹⁹ Kati mwa shikuma kaliha bali na kunconkomona ngoboni bali na kuliletela lisheni tuhu nibo bamwine. Eshe nisho anamba Nyambi ya Ngula.

²⁰ Haya Nyambi wa Makunge ukwamba ngayi, “Nikatulila wukali wami wakutinisha sha ha litala elye. Wukali wami nikawutulila ha bantu na batuyamana, ha bitondo na ha mbuto. Wukali wami ukenga ngonehe mundilo wakubula kutwesha kuzimiwa.

²¹ “Enu bantu bami, zinkombela zimo mwazihokeshanga nimwazo ha kaala, zamina nizo mwalyanga. Ngoboni Ami Nyambi wa Makunge, Nyambi wa Ishalela nikwamba nehe ngayi, hinga muliyandisha kubileta kukwami, mu kutwesha kubilya enu bamwine.

²² Oho nafumishile bankakazenu mu Engepita, kaliha nambile nabo tuhu hinge kubapanika ndayano zaha zintupu za kuhokesha hinge zaha zinkombela.

²³ Ngoboni nabapanikile ndayano za kunyombatala, ngayi mwanga ninge Nyambi yabo, kami ngayi nibo benge bantu bami. Kami nabatongwezele ngayi bayoye ngo ku ndayano nabapanikile, ngayi mwanga biya bakatenda bikekale shiwahe kukwabo.

²⁴ Ngoboni nibo bakanine kunyombatala, kaliha batengekele matu wabo kukwami. Batendele mwayila wukalu wa mitima yabo yayibi, kami bengile bababi shikuma, pe batendele byabibi shikuma kupitakana kutenda byabiwahe.

²⁵ Kufuma ku mutena uyo batutikile bankakazenu mu Engepita kukuma naku mutena walelo nazaminine kumitumina bakamilimo bami na bamiluwe bikati byabingi.

²⁶ Ngoboni kaliha mwanyombatalile, pe kaliha mwatengekele matu wenu kukwami mwakaluhishile mitima shikuma, pe mwengakale bamafutufutu kupitakana bankakazenu.

²⁷ “Nohobene Yelemiya ukambe mazu awa nimwawo kukwabo, ngoboni kukayuvwilila bafwako. Ukabehana ngoboni kuka kumbula bafwako.

²⁸ Ukabatongweze ngayi litunga lyabo kwombatala Ami Nyambi ya Ngula, Nyambi yabo bafwako, kami oho likushushuliwa ku shinga kulilongesha lifwako. Kami kupwisha mumwalyo mowa, kami kwambola byakwoloka hilifwako.”

Biheka byabibi mu mukulo wa Hinoma

²⁹ Lilenu enu bantu bamu Yelushalema, shehenu huki zenu na kuziyumba. Yimbilenu lwimbo lwa malila hayilu ya mapili, ndaba Ami Nyambi ya Ngula ninapilama, kami nakendakale bantu bami.

³⁰ Nyambi ya Ngula ukwamba ngayi, “Bantu ba Yunda banatende byabibi ku meho wami. Banayaka tunankishi twabo twa wunyengwe, mu Litala likutumbiwa na lizina lyami, pe banalibipishi.

³¹ Banatende kaala mu mukulo wa mwana Hinoma shikutumbiwa ngayi Tofweta ngayi mwanga batweshe kukombelela bana babo babalume nanaba ba bambuyama mu mundilo. Shuma eshe nabulile kubatongweza, eshe shabulile kwikala mubihanganiko byami.

³² Haya Nyambi ya Ngula ukwamba ngayi, matena akeza oho lizina lya Tofweta, hinge lizina lya mukulo wa mwana Hinoma likabula kuyuvwanika, ngoboni likatoyiwa ngayi, Mukulo wa Mponde, ndaba bakafundangako mituntu ya bantu ku Tofweta, kutwala noho nimwamo munenzala.

³³ Pe mituntu ya naba bantu, yikenga byakulya bya tuyoni na batuyamana, kami kowa muntu ukabatandako.

³⁴ Mu Yunda namu Yelushalema nikamanisha miyoyo ya kutangala na ku wahilila na kumwenesha miyoyo ya bimbo bya shifupawenga ndaba litunga likafutuka lipembe.”