Yelemiya 6 - Libuka Lya Kuyela

Yelushalema ba kumuzinguluka bamalamo

¹ Nyambi ya Ngula ukwamba ngayi, “Enu bantu ba Mbenjamani tinenu fumenu mu Yelushalema. Shibenu mpandula mu Tekoya, kami katulenu shilimukisho sha mundilo ha lipili lya Mbeti Hakilemu, ndaba makando na kulobeshiwa kwa litunga bili na kwiza, kufuminina ku ncelele.

² Nikalobesha lukena lwa Ziyoni, lukena lwa lu wahe.

³ Bamalamo bakaluzinguluka, ngonehe Balishani na matanga bakazika zintanda kuzinguluka lukena. Muntu na muntu ukabuyishila oku akushinga.”

⁴ Bakamba ngayi, “Liwahishilenu kulwisha Yelushalema, katukenu tukalulwishe hashikati sha mwana mutena oho uli hakati ka mutwe.” Ngoboni bakamba ngayi, “Mutena walelakale kami mimvulu ya mazolo yatalihakale.”

⁵ Niho bakamba ngayi, “Tuyenu tukalwe wushiku mwanga tukalobeshe bipata byendi.”

⁶ Nyambi wa Makunge ukwamba ngayi, “Temenu mitondo mwanga mutende mishimino ya kulwisha Yelushalema, olwe nilwo lukena lwa fwanina ku shushuliwa, ndaba muli bakakulyatilila baminabo,

⁷ ngonehe lishima lya konganga mema walyo, hinga abombola, nisho kami anakongo Yelushalema kuluwa kwendi, mishunga na kulobesha nibyo bikuyuvwanikamo, malweli na bitombo nibyo niku monamo.

⁸ Enu bantu bamu Yelushalema, yuvwenu kumishushula ndelewa nikamifutamina, pe nikafutula litunga lyenu kwinga libelelengwa mwa kubula kwikala bantu.”

Baishalela ba kufutulukila Nyambi ya Ngula

⁹ Nyambi wa Makunge ukwamba ngayi, “Shimbenu na ku bayangula nimwabyo aba Baishalela banashalaho, ngonehe muntu abuyanga shiwahe mikabo ya shinyanca ku mikolobozi. Ngonehe mukakubuya mikabo ya shinyanca, bweshelenu maboko wenu ku myahi.”

¹⁰ Nakumbwile ngayi, “Katiyani nikambila, hinge ndi yani nikashiwulula? Katiyani ukanyuvwilila? Matu wabo anaziki, pe kutwesha kuyuvwa bafwako. Bahepanga ebye wambanga kukwami, kaliha bawahililanga naneshe.

¹¹ Nohobene ninatimbililili na wukali wa Nyambi ya Ngula, na kwangakale mwa kutendela.” Niho Nyambi ya Ngula ambile ngayi, “Tulila wukali wami ku batwanuke bali mumikwakwa, naku bandumbana banakungulukili hamo. Kami mulume na mukazendi, bakatwaliwa hamo na batukulukazi.

¹² Matala wabo akapanikiwa ku bashenge, hamo na mafuba abo na bakazabo. Nikaliyavwisha ngovu zami ha kushushula bantu bali mu litunga. Eshe nisho anamba Nyambi ya Ngula.

¹³ Ku balika ku wamushe, kutwala ku wamunene nimwabo bali na mutongo waku wana mali na kwongeza, bamiluwe na bakankombela nabo kami bengakale ba mahalo.

¹⁴ Bakupanga bitombo bya bantu bami shashishe bakwamba ngayi, ‘Ku mwena, ku mwena.’ Oho hinga kwabula ku mwena.

¹⁵ Kati bali na lisheni oho ba kutenda bya wunyengwe ndi? Byo, lisheni bafwalyo, hinge kulimuka sha kuliyenena bafwako. Nohobene bakalituntula na kuwa hamo na baminabo nimwabo oho nikabashushula.” Eshe nisho anamba Nyambi ya Ngula.

Ishalela ukukana nzila ya Nyambi

¹⁶ Nyambi ya Ngula ukwamba ngayi, “Yimanenu ha mahambanzila na kupenza, pe yipulenu zinzila za bashikale yipulenu nzila yikutwaminina ku mfuywezi, endenu muya mu nzila mwanga muliwanine kukwanguluka.” Ngoboni mwambile ngayi, “Kukendamo tufwako.”

¹⁷ Namihatilile bakakumilama, pe nambile ngayi, yuvwililenu kuvuma kwa mpandula. Ngoboni mwambile ngayi, “Kukayuvwilila tufwako.”

¹⁸ Nyambi ya Ngula ukwamba ngayi, “Haya yuvwenu enu matunga pe limukenu ebye bikatendiwa ku bantu bami.

¹⁹ Yuvwa! Obe hanci nikaleta malwa hanaba bantu, ndaba ya milandu yabo ndaba shilolo bayuvwe ku longesha kwami, kami banakana mazu wami.

²⁰ Yikuntendela bishini incence ya kufuma ku Shemba, hinge mishashi ya livumba lyaliwahe yaku litunga lya kwakutali kaliha byabiwahe kukwami kukatambula zinkombela zenu za kuhokesha nifwako. Ku wahilila na zinkombela zenu nifwako.

²¹ Nikayaka bipukalisho ku naba bantu, batatizabo na banababo bakapukalaho. Bandambo babo na bahoni babo bakalobeshiwa.”

Nzita yikafuma ku ncelele

²² Nyambi ya Ngula ukwamba ngayi, “Monenu, bantu bakeza kufuma ku litunga lya ku ncelele, litunga lyalinene bakufuma ku zimbalila za kwakutali za hano hanci.

²³ Banashimbi bipando byabo bya mikunzi hamo na milinga, benga bantu banguma bakubula nceshe, banakandama ha bambishi, pe ba kuyuvwanika ngonehe ku nkwancana kwa liwate, bakatukakale kwiza mu kulwisha Yelushalema.”

²⁴ Bantu bamu Yelushalema bakwamba ngayi, “Tunayuvwu ncango zabo, pe maboko wetu anazebuku, awa makando atushintikizakale, anengi ngonehe kukola kuya ayuvwanga mbuyama ha kubeleka.

²⁵ Hinga muya mu lishaka, kami hinga mwenda mumikwakwa, ndaba kamalamo uli na mukwale, pe tuli na mutentu kuzimbalila nimwazo.”

²⁶ Nyambi ya Ngula ukwamba ngayi, “Enu bantu bami, vwalenu bicancolo pe livumbenu mu mutoko. Lilenu na kutuwa mbingo ngonehe muntu ukulila mwanendi umo ekala nendi wa mulume. Ndaba mukakumilobesha ukwiza na kumi bazumuna.

²⁷ Obe Yelemiya na kuyaka kwinga ngonehe mukakwezeka byondo mukati ka bantu bami, ubezeke umone eshe bali.

²⁸ Nimwabo banengi babakalu mitima kami bamafutufutu, bakakukwayanisha bya mahalo, babakalu ngonehe lubemba na shondo, nimwabo bali na kutenda byabibi.

²⁹ Mibanze yikupekeliwa shikuma, pe mundilo wa mu ngaanze uli na kuyekula shikuma, ngoboni byondo kuyunguluka bifwako. Pe shinengi shuma showa ku kuyelesha bantu bami, ndaba byabibi shilolo bifumishiwe.

³⁰ Bakatumbiwa ngayi shiliva wakukaniwa, ndaba Nyambi ya Ngula unabakana.”