Yelemiya 52 - Libuka Lya Kuyela

Kuwa kwa Yelushalema

¹ Zendekiya wekalile na myaka 21 oho engile mwene wamu Yunda, pe walelele mu Yelushalema myaka likumi na umo. Mandiyendi wengile Hamutali mwana Yelemiya wa mbuyama waku munzi wa Limbina.

² Mwene Zendekiya wabipishilile Nyambi ya Ngula, ngonehe atendele mwene Yehoyakimu.

³ Nyambi ya Ngula wapilaminine bantu bamu Yelushalema namu Yunda, nisho shaleteshele ngayi abatande ku meho wendi. Zendekiya wafutukilile mwene Nembukandineza waku Mbambiloni.

⁴ Zendekiya wafutulukilile mwene Nembukandineza waku Mbambiloni.Nembukandineza wezile na bakanzita bendi nimwabo. Walwishile Yelushalema ha mutena wawulikumi mu ngonda wawulikumi mu mwaka wa mutanu na yinaa wakulela kwa Zendekiya. Bazikile munkungwa ha munkanda wa lukena, bakanzita ya Mbambiloni bazingulukile kuyaka Yelushalema mukati.

⁵ Yelushalema wekalile mukati ka kembi hantu mu mwaka wawulikumi na umo wakushwana kwa mwene Zendekiya.

⁶ Ha mutena wa mutanu na anaa mu ngonda wawunaa wa kulela kwa Zendekiya oho kwekalile kapande kakanene oho bantu babulile byakulya.

⁷ Kembi ka lukena kawile ku mbalila yimo, Bakambambiloniya nibo bayakile lukena mukati ngoboni Bakanzita bamu Yelushalema bashilile wushiku. Batutikilile ku shipana sha ku mfuba ya mwene. Bapitile na nzila ya shipana sha mukati ka twimbi tubili, pe batinine na kuya ku mbuwa ya Yondana.

⁸ Ngoboni bakanzita ba Bakambambiloniya batandile mwene Zendekiya, bakamukwatilile ku zimbuwa za ku Yeliko, kami bantu bendi nimwabo bamushiyile na kupanzana.

⁹ Bamutwalile kuli mwene wamu Mbambiloni ou wekalile ku Limbula mu litunga lya Hamati, pe niye wakamuyatile.

¹⁰ Mwene waku Mbambiloni wazihile bana ba mwene Zendekiya babalume, oho Zendekiya hamonako. Wazihile kami babilolo nimwabo bamu Yunda.

¹¹ Bana ba Zendekiya babalume babazihile oku tatiyabo hamonako, pe Nembukandineza watibile meho a Zendekiya niho bamutwalile ku Mbambiloni.

Kuloba kwa Litala lya Nyambi

¹² Ha mutena wa mutanu na abili mu ngonda wa mutanu mu mwaka wawu 19 wakulela kwa mwene Nembukandineza waku Mbambiloni, Nembuzalandani mukakubela wa mwene na mukulwane wa bakanzita wenginine mu Yelushalema.

¹³ Wahokeshele Litala lya Nyambi ya Ngula na lukena lwa wene na matala nimwawo amu Yelushalema. Walobeshele matala nimwawo amanene mu lukena.

¹⁴ Niho bakanzita ba Mbambiloni, nimwabo baya bekalile nendi, babunkwile twimbi nimwato twazinguluka Yelushalema.

¹⁵ Nembuzalandani washimbile bantu nimwabo baya bashalile mu Yelushalema, balume bawutungu na baya balishangwile na kubatwala kuli mwene wa Mbambiloni mu wuntapwa.

¹⁶ Ngoboni Nembuzalandani washiyile bancepwe bamo mu Yunda baya babulile byuma ngayi batendenga milimo mu mafuba a shinyanca.

¹⁷ Bakambambiloniya bapokwezele zimpangwa na tutambo twa mawili bya lubemba biya byekalile mu Litala lya Nyambi ya Ngula, hamo na Tanki yayinene ya lubemba iya yekalilenga mu Litala lya Nyambi ya Ngula pe batwalile lubemba ku Mbambiloni.

¹⁸ Kami bashimbile mafwosholo na binzoyo bya kukundwisha mutoko ha kaala. Bashimbile na zimanya kwa kupatika mimuni na zindonga na nimwabyo biya baliyavwishilenga ha kukombelela mu Litala lya Nyambi.

¹⁹ Bashimbile shuma nimwasho shatendiwile ha ngolinde na shiliva na binzoyo bya kukalila mundilo na bya kuhokeshela incence.

²⁰ Bakwangile kulimuka wulemu wa lubemba lwa zimpangwa zibili na Tanki yayinene ya mema na bifwekesha likumi na bibili bya bankunzi ku nkumo yabyo, na shikocikala byengile byabilemu shikuma. Ebye byuma wabitendele mwene Sholomoni kwinga bishebezesho bya mu Litala lya Nyambi ya Ngula.

²¹ Zimpangwa zibili zengile hamo. Mpangwa na mpangwa yengile mamita 8 mu mwimo na mitwe yazo yengile mamita 5.3 mu wunene wa nzinguluke. Yekalile na mpako pe wuliti wayo, yengile mamilimita 75.

²² Hayilu ya Mpangwa na mpangwa hekalile mutwe wa lubemba, ou wengile wa mamita 2.2 mu wutali. Iya mitwe yengile yayiwahe, ya bifwekesha bya maluba aya batendele ha lubemba.

²³ Ha mutwe na mutwe wa mpangwa, hekalile maluba akukuma ku 96 kumbalila na mbalila. Nimwawo maluba, kuzingwilisha mutwe wa mpangwa nimwawo, engile mwanda umo.

Bantu bamu Yunda ba kubatwala ku Mbambiloni

²⁴ Nembuzalandani mukulwane wa byamanga, wakwatile Shelaya mukankombela wa mukulwane na Zefwaniya mukankombela wakumulundamina na babilolo bamina bahatu ba kushipana sha mwene.

²⁵ Mu lukena washimbilemo shilolo wengile mukakwendesha bakanzita na balume mutanu bakakubela mwene. Niho ashimbile na mukakutikita wa mukulwane wa bakanzita, ou wakowezelenga zibuka za mazina a bakanzita na balume 60.

²⁶ Nembuzalandani mukulwane wa byamanga, wabatwalile kuli mwene waku Mbambiloni ou wekalile ku lukena lwa Limbula,

²⁷ kami kuyo ku Limbula mu litunga lya Hamati, mwene waku Mbambiloni wabazihile nimwabo. Bayunda nisho bafumishiwile mu litunga lyabo na kutwaliwa mu wuntapwa.

²⁸ Okwe niko kuvwula kwa bantu baya atwalile Nembukandineza ku wuntapwa mu mwaka wa mutanu na yibili, bengile Bayunda 3,023,

²⁹ mu mwaka wawulikumi na mutanu na yihatu watwalile 832 kubafumisha mu Yelushalema,

³⁰ kami mu mwaka wa makumi abili na yihatu Nembuzalandani mukulwane wa bakakulama, watwalile mu wuntapwa bantu 745. Nimwabo aba batwaliwile bengile 4,600 bantu bafumine ku Yunda kuya ku Mbambiloni.

³¹ Mu mwaka uya Ebile Melondaki engile mwene wamu Mbambiloniya, waholwele nceshe kuli mwene Yehoyakini wamu Yunda ha kumushobolola mu tolongo. Eshe shamonekele ha mutena wawu 25, Ebile Melondaki mwene waku Mbambiloni, mu mwaka uya engile mwene, wayuvwilile nceshe Yehoyakimu mwene wa litunga lya Yunda pe wamututwishile mu tolongo.

³² Ebile Melondaki wamwikalishile na nceshe, wamupanikile shitapilo shashinene sha maleema kupitakana bamyene bamina aba ekalile nabo mu wuntapwa mu Mbambiloniya.

³³ Nohobene Yehoyakini wetabilishiwile kuvwula bivwalo bya mu tolongo pe wavwalile byashenge na kulyanga kutebulu ya mwene kutwala ku kufwa kwendi.

³⁴ Mutena na mutena mu kuyoya kwendi nimwako mwene wamupanikilenga mali a kuliyavwa nawo.