Yelemiya 51 - Libuka Lya Kuyela

Shikoma sha Nyambi ya Ngula

¹ Nyambi ya Ngula ukwamba ngayi, “Mona nili na kuleta mpepo yayinene ya kulwisha Mbambiloni na naba bazikamo.

² Nikatuma bayeni ku Mbambiloni baka ku pepa, pe baka mu pepa na ku shiya litunga lyendi mukungulu. Oho uya mutena wakulobesha ukakuma, bakeza na kumulwisha bakafuminina kuzimbalila nimwazo.

³ Hinga mwitabilisha Bakabipando bya mikunzi kupuha mivwi yabo, hinge mu kanzita kuvwala bivwalo bya nzita. Hinga mushiyaho bandumbana, kalobeshenu bakanzita nimwabo.

⁴ Bakalemekiwa na kufwila mu mikwakwa ya munzi wabo.

⁵ Litunga lya Mbambiloni nilyo lili na mulandu, wakubipishila wa Kuyela wa Ishalela. Ishalela na Yunda kuka kaniwa kuli Nyambi wa Makunge, Nyambi yabo bafwako.

⁶ Tinenu mufume mu Mbambiloni, tinishenu myoyo yenu. Hinga muzihiwa ndaba ya ku shushuliwa kwendi, ndaba eshe nisho shikati sha Nyambi ya Ngula sha kubweshela wubi ku wubi na kubweshela ngonehe biya atendanga.

⁷ Mbambiloni wengile ngonehe nkomoki ya ngolinde mu liboko lyami, na kwingisha hano hanci ngayi hakolwe. Matunga anwine ku waine, nohobene matunga aku moneka kupempela.

⁸ Mbambiloni unawu naku mu bazumuna, kami unalobeshiwi. Tuwenu mbingo hahendi, shingilenu ha bitombo byendi wanga, kampe ukutwesheka kupola.”

⁹ Mapukwenda bekalilenga kuyo bambile ngayi, “Twezekele kupanga Mbambiloni ngoboni twakwanga, tumushiyenu tuboke, muntu na muntu aye ku litunga lyendi, ndaba kuyatishiwa kwendi kunakumu na kuyilu, kunengi kwakunene shikuma.”

¹⁰ Bantapwa bafumine ku Yunda bakamba ngayi, “Nyambi ya Ngula unatushambishi, haya tubilikenu mu Ziyoni, milimo ya Nyambi ya Ngula, Nyambi wetu.”

¹¹ “Kumbenu mivwi yenu, shimbenu makebo wenu. Nyambi ya Ngula unashonkomono mitima ya bamyene ba Mendiya, biyongola byendi bya kulobesha Mbambiloni. Ndaba okwe nikwo kubweshela wubi ku wubi kwa Nyambi ya Ngula, ukabweshela ndaba ya kuloba kwa litala lyendi.

¹² Yimikenu ndembela ya kulwisha twimbi twa Mbambiloni, shumenu ha kulama, yakenu bakakulama, kami yakenu bakakubelamina.” Nyambi ya Ngula unatende ebye ahanganikile, ngayi ukashitenda ku bantu ba Mbambiloni.

¹³ Mbambiloni obe wazika ku mishinzi yayingi wuheti wakuvulila, haya mamaninino wobe anakumu shikati sha kuyoya kwobe shinamana.

¹⁴ Nyambi wa Makunge unalibeze ngayi, mwa shikuma nikaleta bakanzita babengi ngonehe libimbe lya mikumbi, bakawulumwina tunkelenkele twa kuwahililila ha kukona.

Lwimbo lwa kuyemeza Nyambi

¹⁵ Nyambi ya Ngula niye walengele hanci na ngovu zendi, walengele kaye na ngana zendi na kalimukisho kendi watandubwile mayilu.

¹⁶ Oho ambanga, mema a muyilu ankwancananga, ukukakamisha makumbi kwakumina hano hanci, wamwesheshanga mimuni ya kulokesha mvula, kami wapepokeshanga mpepo kuyifumisha oku ayikongelanga.

¹⁷ Bantu nimwabo banengi bakuyeba, na kubula kalimukisho. Bamfuzi nimwabo banayeneshiwi na tunankishi twabo, ndaba banyambi babo ba mahalo kami wumi bafwawo.

¹⁸ Byenga byowa, kami bya mahalo. Hashikati sha kushushuliwa kwabo bikaloba.

¹⁹ Nyambi wa Yakobo kaliha walifweka na tunankishi. Niye walengele byuma nimwabyo kami wahatile Ishalela kwinga bantu bendi, lizina lyendi niye Nyambi wa Makunge.

Shikoma sha Nyambi ya Ngula

²⁰ Obe Mbambiloni uli shikoma shami, na shilwisho shami sha nzita naliyavwishile kucancola matunga a bantu na kulobesha wene,

²¹ kucancola bambishi na mukakukandamaho kucancola makoloyi na baka kucayela.

²² Mukucancola balume na bambuyama, mu kucancola bakulwane na batwanuke mu kucancola bandumbana naba tunkanga.

²³ Nikacancola balishani na matanga wabo, nikacancola bandimi na zingombe zabo za kulimisha. Nikacancola batulela na babilolo.

Mbambiloni ukushushuliwa

²⁴ Nyambi ya Ngula ukwamba ngayi, “Mukamona eshe nikashushule Mbambiloni na bantu nimwabo baya bekalamo ndaba ya wubi nimwawo uya batendele mu Yelushalema.”

²⁵ Mbambiloni unafweke ngonehe lipili likulobesha, obe uli na kulobesha hanci nimwaho. Nikakulwisha na liboko lyami, nika kulwishila hanci, kami nika kushiya mu mutoko. Eshe nisho anamba Nyambi ya Ngula.

²⁶ “Bantu bafwako kukawana limanya lya mumbango, hinge limanya lya kutendesha mwimbi. Ngoboni ukenga ngonehe libelelengwa mwaya myaka.” Eshe nisho anamba Nyambi ya Ngula.

²⁷ “Katula ndembela yobe ya shilimukisho sha nzita mu litunga nimwamo, shiba mpandula mukati ka mikoka, wambe na matunga, mwanga baliwahishile kulwisha Mbambiloni. Yihana wene waku Alalata naku Mini naku Ashikenazi, beze na kulwisha Mbambiloni, hata mukakutwaminina nzita. Tuma bambishi, mwanga benge ngonehe libimbe lya mikumbi.

²⁸ Amba na matunga mwanga baliwahishile kulwisha Mbambiloni. Yihana bamyene ba ku Mendiya, hamo na babilolo na bakakutwaminina, na bakanzita bamu matunga nimwawo aya ali mu ngovu zabo.

²⁹ Hanci hali na kunyenkana na kukanka, ndaba Nyambi ya Ngula uli na kutenda bifungo byendi, bya kulwisha Mbambiloni na kulobesha litunga lya Mbambiloni ngayi mwanga kukabule muntu wakwikalamo.

³⁰ Bakanzita bamu Mbambiloni banalehesho kulwa, banekala tuhu nahiya mu bipata byabo, ngovu zabo zinapopo, bafutukakale ngonehe bambuyama, bamalamo babo bali na kumungula bihala bya ku mapangati na kuhokesha matala wabo.

³¹ Bamiluwe ba ku li konkezekanga kwituka, kutwala mazu kuli mwene wa Mbambiloni, kumutongweza ngayi, ‘Lukena lwendi bali na kululwisha kuzimbalila nimwazo.

³² Bamalamo bashimbakale mavwe nimwawo aku mushinzi, bahokeshakale shitebe, kami bakanzita bamu Mbambiloni batampwakale.’

³³ Nyambi wa Makunge, Nyambi wa Ishalela ukwamba ngayi, bamalamo bana kushekasheka na kulyatangila bantu bamu Mbambiloni, ngonehe balyatangilanga mapumpwa kuya ba kupulila. Shikati shabo sha kuteza, shili hahepi.”

³⁴ Bantu bamu Yelushalema bakwamba ngayi, “Mwene Nembukandineza wa Mbambiloni, unaketulu kami unatucancolo. Unatwingi ngonehe zintesho za kubula byuma. Unatumini, ngonehe liyoka wamunene, washimbile nimwabyo ebye ashingilenga na kuyumba biya abulile ku shinga.”

³⁵ Bantu bekala mu Ziyoni bambe ngayi, “Haya iya mishunga yekalile kukwetu, mwanga yitendiwe mu Mbambiloni.” Bantu bamu Yelushalema bambe ngayi, “Mwanga mulandu wa lufu lwetu, wikale ha bantu bamu Mbambiloni.”

Nyambi ya Ngula ukayavwa Ishalela

³⁶ Nyambi ya Ngula ukwamba ngayi, “Monenu, nikamilamwina na kumi lwila, kwezekesha ngonehe bamitendele. Nikayumisha liwate lya ku Mbambiloni na kuyumisha tuheloke twekalamo.

³⁷ Mbambiloni ukafutuka lipembe, muya mukekala batuyamana bamu lishaka. Yikenga mbalila ya kutinisha kuya kukabula kwikala bantu. Baya nimwabo bakamonako, bakalikomokela.

³⁸ Baka Mbambiloni nimwabo, bali na kukangoka ngonehe bimbwi. Bali na kubuluma ngonehe bana ba babimbwi.

³⁹ Oho bashili ku wahilila, nikabawahishila mayambwayambwa. Nikabengisha ngayi bakakolwe mwanga bakawahilile shikuma. Bakalangana mutulo, kukapinduka kami bafwako.

⁴⁰ Nikabatwala na kuzihiwa, ngonehe bana ba bambelele na babikungwe na bampongo.” Eshe nisho anamba Nyambi ya Ngula.

Malwa a Mbambiloni

⁴¹ “Mbambiloni eshe anakoniwi, lukena luya bayemezelenga mukaye nimwamo, lunakwatiwi. Mbambiloni wafutukakale kwinga wakukendiwa ku matunga.

⁴² Bamalamo bakulwisha Mbambiloni, ngonehe mankanyi amanene akakupula litunga nimwalyo.

⁴³ Minzi yendi yinalobo, litunga lyendi linafutuku libelelengwa. Kowa muntu ukwikalamo, hinge kwendamo.

⁴⁴ Nikashushula Mbelu nyambi wa Mbambiloni, nikafumisha mukanwa kendi nimwabyo biya aminine. Bakamatunga bakalehasho kwiza kukwendi na kumulemesha. Kembi ka Mbambiloni kakanyemuka.

⁴⁵ Fumenumo, enu bantu bami. Yitukenu, lamwinenu myoyo yenu. Yitukenu mufume ku wukali wa Nyambi ya Ngula.

⁴⁶ Hinga mulikekula hinge kuyuvwa bowa, oho mu kuyuvwa mbuzi mu litunga. Mu mwaka na mu mwaka kwekalanga mbuzi ya mishunga yili mu litunga kami wene ukulwisha wene wamina.

⁴⁷ Mwa shikuma shikati shili na kwiza oho nikashushula tunankishi twa mu Mbambiloni. Litunga lyendi likayeneshiwa, mituntu ya bantu ba kufwa yikalalamo.

⁴⁸ Niho liyilu na hano hanci na byuma nimwabyo bilimo bikembila na ku wahilila ha Mbambiloni. Bakanzita bakafuma ku ncelele bakeza naku lobesha Mbambiloni.

⁴⁹ Mbambiloni uku fwanina kuwa ndaba ya Baishalela anazihi na baya azihile nimwabo hano hanci pe nafwanini kuwa.” Eshe nisho anamba Nyambi ya Ngula.

Lizu lya Nyambi ku Baishalela bali mu Mbambiloni

⁵⁰ Nyambi ya Ngula ukwamba ngayi, “Enu munapanza kulufu, hinga mucincazala, anukenu Nyambi ya Ngula hinge ndi muli kwakutali, kami anukenunga Yelushalema mu mitima yenu.

⁵¹ Tunayene ndaba tunayuvwu eshe ba kutuhandula, tuli na lisheni ku meho ndaba bayeni banengini mu myanya ya kuyela yamu Litala lya Nyambi ya Ngula.”

⁵² Nyambi ya Ngula ngayi, “Monenu, matena ali na kwiza, oho nikashushula tunankishi twendi mu litunga nimwamo, banalemana nimwabo ba kushunga.

⁵³ Hinge ndi Mbambiloni ukulitwala kuyilu, hinge ndi ukashumisha bipata byendi, nikatuma nzita yikaya na kumulobesha.” Eshe nisho anamba Nyambi ya Ngula.

Mbambiloni ukulobeshiwa

⁵⁴ Nyambi ya Ngula ukwamba ngayi, “Yuvwililenu mbingo za kulila kwa bantu mu Mbambiloni, malila akuloba kwakunene kuli naku fuminina mu litunga lya Mbambiloni.

⁵⁵ Nyambi ya Ngula ukalobesha Mbambiloni naku mwenesha miyoyo yendi, bakanzita ba kuyunga ngo kukwancana kwa mankanyi, miyoyo ya kuyunga kwa mazu wabo akuyuvwanika.

⁵⁶ Muka kulobesha Mbambiloni wakumakale, bakanzita bendi bakakomiwa na bipando byabo, bya mivwi, bikamunguliwa. Nyambi ya Ngula wenga Nyambi mukakushushula wubi, mwa shikuma Nyambi ukabashushula.

⁵⁷ Nikapendesha bana ba bamyene na bantu bendi bangana, na batulela na babilolo hamo na bakanzita, bakalanganinina kukapinduka bafwako.” Eshe nisho anakwamba Mwene, Nyambi wa Makunge nilyo lizina lyendi.

⁵⁸ Nyambi wa Makunge ukwamba ngayi, “Kembi ka Mbambiloni baka ka nyemwina hanci, na mapangati wendi akahokeshiwa, bantu bakalipokwesha kutenda milimo nahiya kami matunga akalipokwesha kutenda byuma biya bikabanga ku mundilo.”

Mazu a Yelemiya akutumiwa ku Mbambiloni

⁵⁹ Elye nilyo lizu atumine muluwe Yelemiya na shilolo Shelaya mwana Neliya muzukulya Mahesheya, oho ayile ku Mbambiloni na Zendekiya mwene wa Yunda mu mwaka wa wunaa wakulela kwendi.

⁶⁰ Yelemiya watikitile mu libuka lya kuvungavunga byuma nimwabyo byatikitiwile ha litunga lya Mbambiloni.

⁶¹ Yelemiya watongwezele Shelaya ngayi, “Oho ukakuma ku Mbambiloni, ukamone ngayi unalabili bantu mazu awa nimwawo na lizu lya kukangoka.

⁶² Niho ukambe ngayi, ‘Obe Nyambi ya Ngula, nka unamba ngayi ukalobesha mwanya uno ngayi ukenga libelelengwa omo eze kukabule muntu hinge kayamana wakwikalamo mwaya myaka.’

⁶³ Oho ukamanisha kulaba libuka elye, kamangileko limanya kunelye libuka, ukaliyumbile mu mushinzi wa Yufuleti.

⁶⁴ Pe ukambe ngayi, ‘Eshe nisho akandokama Mbambiloni, ngayi kuka tumpuka wufwako ndaba ya makando nikaleta hahendi, bantu bendi bakaloba.’” Aha niho anamanini mazu a Yelemiya.