Yelemiya 5 - Libuka Lya Kuyela

Wubi wa Yelushalema

¹ Bantu bamu Yelushalema, pitapitenu mu mikwakwa yenu shengezelenu noku-noku, shingishishenu mu zimbanza, monenu ndi mu kutwesha ku wanamo muntu umo ukutenda byakwoloka na kupwisha, Nyambi ya Ngula ukayatila Yelushalema.

² Hinge ndi bakulibeza ngayi, “Mwa shikuma bene, ngonehe Nyambi ya Ngula ayoya,” hinga noho bakulibeza tuhu bya mahalo.

³ Obe Nyambi ya Ngula, kati meho obe kaliha atilaminanga ha bya kupwisha ndi? Wabakamine ngoboni kaliha bayuvwile kukola, wabashushwile ngoboni kaliha batengulukile, bakaluhishile mitima yabo kupitakana mamanya, pe bakanine kutenguluka.

⁴ Niho nambile ngayi, “Aba bantu banengi ba kushepwa, banengi bakubula ngana ndaba kulimuka nzila ya Nyambi ya Ngula bafwako, hinge kulimuka ebye akushinga Nyambi yabo bafwako.

⁵ Nikaya ku bantwamina, pe nikamba nabo, ndaba ba kulimuka nzila ya Nyambi ya Ngula, nanebye akushinga Nyambi yabo.” Ngoboni nimwabo banakana ngovu za Nyambi, kami banakana kumwombatala.

⁶ Nohobene mu lishaka mu kafuma Shimbwi ukabaziha, namu libelelengwa mu kafuma Mbinzi ukabalobesha kami Kampulu uka babelamina mu minzi yabo. Muntu nimwendi wakututikila ha munkanda ukashanyozoliwa, ndaba banamfutamini bikati byabingi pe bengakale ba kulungwa shikuma.

⁷ Nyambi ya Ngula wepwile ngayi, “Kati nikutwesha kumiyatila nahiti? Banabenu bananciyi, na kulemesha banyambi bashenge. Hinge ndi nabalishile na kubekutisha, ngoboni batendele wumambe.

⁸ Banafweke ngonehe bambishi babalume ba kuleliwa shiwahe baya banatanganya na mufuno, umo na umo ukulishoza mukaza ndambo yendi.

⁹ Kati kuka bashushula nifwako ha byuma ebye ndi? Kati Amimwine kuka babweshela wubi ha matunga wakwinga ngonehe ou nifwako ndi?” Eshe nisho anamba Nyambi ya Ngula.

¹⁰ Nikatuma bamalamo ngayi bakaketule mikolobozi ya mikabo ya shinyanca, ngoboni kaliha bakayilobesha nimwayo, bakashanzaho tuhu myahi, ndaba kaliha ya Nyambi ya Ngula.

¹¹ Ndaba baka litala lya Ishalela na baka litala lya Yunda bengakale ba kulungwa kukwami. Eshe nisho anamba Nyambi ya Ngula.

Nyambi ya Ngula ukukana Ishalela

¹² Bantu banamba bya mahalo hali Nyambi ya Ngula ngayi, “Kowa ebi akatenda, kami byabikalu kukatwizilila bifwako, pe kukekala na nzita hinge kapande tufwako.”

¹³ Mazu a bamiluwe ba Nyambi anafweke ngonehe mpepo tuhu, kami mumwao mowa kupwisha. Ebye banamba bikatendiwe kukwabo.

¹⁴ Nohobene haya Nyambi ya Ngula Nyambi wa Makunge ukwamba ngayi, “Ndaba aba bantu bakwamba ebye, mazu ami akenga ngonehe mundilo mu kanwa kobe, haya aba bantu bakenga ngonehe nkuni pe mundilo ukabahokesha.”

¹⁵ Monenu enu bantu ba Ishalela, Nyambi ya Ngula uli na kuleta mukoka wa kwakutali kwiza na kumi lwisha. Unengi mukoka wakushikale wa ngovu. Mukoka ou mu kubula kulimuka lulimi lwawo, hinge kuyuvwa ebye bakwamba.

¹⁶ Bakanzita babo bakakulwisha bipando bya mikunzi binengi bya bangovu, kami bakakuziha na kubula nceshe.

¹⁷ Bakalya mbuto na byakulya byenu, bakaziha bana benu babalume naba babambuyama, bakaziha matanga enu a bambelele nawa a zingombe, bakalya mikolobozi ya shinyanca shenu na mitondo yenu ya nkuyu, pe bipata bya zinkena zenu mwakulupila bakabilobesha na mukwale.

¹⁸ Nyambi ya Ngula ukwamba ngayi, “Hinge noho, mu matena ayo bantu bami kuka balobesha nimwabo nifwako.

¹⁹ Oho bantu bakakwipula ngayi, ‘Kati shumangani Nyambi ya Ngula, Nyambi yetu anatende byuma bya nehe kukwetu?’ Uka ba kumbule ngayi, ndaba munamfutamini na kutendela milimo banyambi bashenge mu litunga lyenu, haya mukatendele milimo bantu bashenge mu litunga lya bashenge.”

Nyambi ukushiwulula bantu bendi

²⁰ Nyambi ya Ngula ukwamba ngayi, “Tongweza baka litala lya Yakobo, bilikiza ku bantu ba Yunda ngayi,

²¹ ‘Yuvwililenu eshe enu bantu bakubula ngana enu bakuyeba, muli na meho ngoboni ku mona mufwako, muli na matu ngoboni kuyuvwa mufwako.’”

²² Nyambi ya Ngula ukwamba ngayi, kati kunyuvwila bowa mufwako ndi? Kati kukanka ku meho wami mufwako ndi? Nayakile lihekelela ngayi linge nginza na liwate, ya mwaya myaka ya kubula kukilukiwa, hinge ndi mankanyi akwenda ngoboni kukiluka nginza afwako kami hinge ndi akunkwancana ku shandola nginza afwako.

²³ Ngoboni enu bantu muli ba babakalu mitima na mafutufutu, munashanuku na kuya kwashenge na kunciya.

²⁴ Hinge ndi namituminanga mvula hashikati shendi, mvula wa shituwizi na nou walikuhulahoke, kami namipananga zishunda za kuteza, ngoboni mufwako kushinga kumpana maleema, Ami Nyambi ya Ngula, Nyambi yenu.

²⁵ Haya Kubipisha kwenu niko kunaleteshe ngayi byuma ebye bifume kukwenu, kami wubi wenu unakanishi wuwahe kwiza kukwenu.

²⁶ Ndaba mukati ka bantu bami muli bantu bakuluwa, baya bakubelamina baminabo ngonehe baya Bakumanyika tuyoni, ngonehe baya ba kukwata bantu.

²⁷ Ngonehe shiyengelele shinenzala na tuyoni, nisho anenzala matala wabo na byuma bya lipuku, haya bengakale bantu bali na ngovu na wuheti,

²⁸ bengakale ba kushuwa na kulelema. Biheka byabo bya kuluwa binapitakana, kami kuyata banginga na kwoloka bafwako, kami kwimanina ba kushepwa bafwako.

²⁹ Kati kubashushula ndaba ya byuma ebye nifwako ndi? Kati kubweshela wubi ku nawa matunga nifwako ndi? Ebye nisho anamba Nyambi ya Ngula.

³⁰ Shuma sha kutinisha na kukomokesha, shinatendiwi mu litunga.

³¹ Bamiluwe ba kulubulula bya mahalo, bakankombela ba kutwaminina mu ngovu zabo nibo bamwine, kami ebye nibyo bakushinga bantu bami. Haya mukatenda nahiti ku mamaninino?