Yelemiya 48 - Libuka Lya Kuyela

Kulubulula bya litunga lya Mowambi

¹ Ha bya litunga lya Mowambi, Nyambi wa Makunge, Nyambi wa Ishalela ukwamba ngayi, “Malwa akeza ha bantu ba Nembo, ndaba munzi wabo walobakale. Kiliyatayimu ukayuvwa lisheni ndaba ukakwatiwa. Bipata byabo bya ku shuma bikanyemukila hanci, pe bakayuvwa lisheni.

² Mpupo ya litunga lya Mowambi yikamana. Bantu ba ku Heshimboni, bakekala na bifungo bya kulwisha Mowambi. Bakamba ngayi, ‘Tuyenunga tulobeshe liya litunga.’ Munzi wa Mandimeni ukamweneshiwa. Mukwale ukamilwisha.”

³ Bantu ba ku Holonayimu bali na kulila ndaba ya makando amanene na malwa.

⁴ Mowambi walobeshiwakale, batwanuke bali na kulila.

⁵ Bali na kuya na kupwezuma mu nzila yikukankalala ku Luhiti. Bali na kuya hinga baye na mu nzila yikuya ku Holonayimu.

⁶ Yitukenu mupulwishe wumi wenu. Yitukenu ngonehe mutinkwe uli mulibelelengwa.

⁷ Ndaba mwakulupila mu bipata byenu, na mu wuheti wenu nanenu kami mukakoniwa. Nyambi yenu Kemoshi hamo na bakankombela bendi, na babilolo bendi bakaya mu wuntapwa.

⁸ Mukakulobesha ukeza ku minzi nimwayo, pe kowa munzi ukapanza. Mukulo na mbuwa, nimwabyo bikaloba, ngonehe anamba Nyambi ya Ngula.

⁹ Panenu mbando ku litunga lya Mowambi, ndaba ukatuka. Minzi ya Mowambi yikafutuka mapembe, pe kowa ukekalamo.

¹⁰ “Unakutiwi muntu ukubula kutenda milimo ya Nyambi ya Ngula na mutima wendi nimwawo. Unakutiwi muntu ukubula kuliyavwisha mukwale wendi mu nzita.”

Minzi ya Mowambi yikulobeshiwa

¹¹ Mowambi unekalanga shiwahe kufuma kuwanuke wendi, shilolo aye mu wuntapwa. Unekala ngo waine yili mu ntesho, yikubula kupingululiwa mu ntesho yamina. Pe ushili ngonehe ekalile mwaka, livumba lyendi shilolo lifutuke.

¹² Nyambi ya Ngula ukwamba ngayi, “Monenu, matena akeza oho nikatuma bantu kwiza na kuyita Mowambi ngonehe waine. Bakayita waine mu zintesho zendi na kuzipabozola. Eshe nisho anamba Nyambi ya Ngula.

¹³ Nohobene, Mowambi ukayuvwa lisheni kuli nyambi yendi Kemoshi, ngonehe baka litala lya Ishalela bekalile na lisheni oho bakulupilile Mbetele.

¹⁴ Kati shumangani mukwamba ngayi, ‘Tuli balume ba kukanca na ku shuma ku nzita?’

¹⁵ Ami Mwene wa lizina lya Nyambi wa Makunge nikwamba ngayi, Kamalamo ukalwisha Mowambi na kulobesha minzi yendi. Bandumbana bendi babawahe bakazihiwa.

¹⁶ Makalikiza a Mowambi ali hahepi, malwa ali na kumwizilila wanguwangu.

¹⁷ Mulilenu, enu nimwenu munamuzinguluku, nanenu nimwenu mwalimuka lizina lyendi ambenu ngayi, ‘Monenu muwana wakushuma, uya muwana wawuwahe eshe unapokoko.’

¹⁸ Enu mwazika mu Ndimboni, fumenu ku myanya yenu ya maleema, pe mwikale mu lukungu, ndaba mukakulobesha Mowambi wakumakale mu kumilwisha, ukalobesha bipata byobe bya ku shuma.

¹⁹ Enu mwazika mu Aloya, yimanenu kunkumo ya nzila mupenzelele, muyipulenu mulume ou ukushila, na mbuyama ou ukupanza, ngayi kunatendiwi bishini?

²⁰ Bakakumbula ngayi, Mowambi unayeneshiwi ndaba unashandoliwi, tuwenu mbingo za kulila. Tongwezenu bali ku mushinzi wa Anoni, ngayi Mowambi unalobeshiwi.

²¹ “Kuyata kunezi ha minzi ya ha mbuwa, na Holoni na Yahaza na ha Mefwati,

²² munzi wa Ndimboni na Nembo, naha Mbeti Ndibulatayima,

²³ Kiliyatayimu na Mbeti Ngamuli naha Mbeti Meyoni,

²⁴ Keliyoti na Mbozila naha minzi nimwayo ya ku Mowambi ya kwakutali naya hahepi.

²⁵ Lushengo lwa Mowambi lunaketuku, na liboko lyendi linapokoko.” Eshe nisho anamba Nyambi ya Ngula.

Mowambi ukombatalishiwa

²⁶ “Kolweshenu Mowambi ndaba unaliyemeze na kulwisha Nyambi ya Ngula, niho Mowambi ukulivumbavumba mu nebye analuku, pe ukenga wakukendiwa.

²⁷ Obe Mowambi, kati Ishalela kaliha wengile wakukendiwa kukwobe ndi? Kati wawaniwile mukati ka bezi ndi? Kati wanengokelenga ku mutwe shikati nimwasho mwambilenga byendi ndi?”

²⁸ “Enu mwazika mu Mowambi, shiyenu minzi yenu, yenu mukazike mu mamanya, mufweke ngo litela ukutendela lihwa lyendi kunkumo ya liteke.

²⁹ Tunayuvwu kuliyemeza kwa Mowambi, wenga wakuliyemeza shikuma na kuliyemeza kwendi na kulilundumika kwendi na mukeyu wendi na kulitemba kwa mutima wendi.

³⁰ Nikulimuka lihandu lyendi, na kulilundumika kwendi kwa mahalo na ntendelo yendi ya mahalo. Eshe nisho anamba Nyambi ya Ngula.

³¹ Haya nikatuwa mbingo hali Mowambi na kulila shikuma hali Mowambi naha bantu ba ku munzi waku Kilahaleshi.

³² Nikukulila obe mukolobozi wa shinyanca waku Shimbima, kupitakana eshe nikulila ha bantu ba ku Yaza. Myahi yobe yina kakumu ku liwate na kuhalabila naku munzi wa Yaza. Ngoboni mikabo yenu ya mayinza na mahozozo wenu a shinyanca akalobeshiwa.

³³ Kutangala na ku wahilila binafumishiwi mu litunga lya wilo lya Mowambi. Nashepeshe waine mu bizongelo bya shinyanca, kowa muntu ukazonga waine na kutenda tunkelenkele twa kubula ku wahilila.

³⁴ “Miyoyo ya kulila kwabo yikuyuvwanika kufuma ku Heshimboni kuya ku Eliyale na ku Yahazi, kufuma ku Zowa kuya naku Holonayimu na Engilata Shelishiya, ndaba na mema a Nimolima anayumu.

³⁵ Mu litunga lya Mowambi nikamanisha obo batupulanga zintupu zabo ku myanya ya binkanda na kuhokesha incence ku banyambi babo.” Eshe nisho anamba Nyambi ya Ngula.

³⁶ “Nohobene mutima wami ukulila hali Mowambi na bantu ba ku Kilahaleshi, ngonehe lwimbo lwa malila ba kushiba ha kanamutolilo. Wuheti bekalile nawo unamana.

³⁷ Bantu nimwabo banashehiwi mitwe na milevu nimwayo yinatewuliwi, maboko nimwawo anaketuliwi na zinkanda nimwazo zinavwikiwi na bincancolo.

³⁸ Habihoke nimwabyo bya matala amu Mowambi na mu zimbanza muli tuhu mbingo, ndaba ninacancozolo Mowambi ngo ntesho yinanyikwiwi ku muntu nimwendi.”

³⁹ Monenu Mowambi eshe anacancoliwi! Yuvwenu eshe ba kukoloma bantu bendi. Monenu Mowambi eshe anabapenzeshe mongo na lisheni! Mowambi wafutukakale kwinga shuma sha kukendiwa, shuma sha kukenduliwa ku nobo nimwabo bamuzinguluka. Eshe nisho anamba Nyambi ya Ngula.

Mowambi kupanza wufwako

⁴⁰ Nyambi ya Ngula ukwamba ngayi, “Monenu, kamalamo ukafwika Mowambi ngonehe ngonga atandubulanga mbando zendi ha kutuka.

⁴¹ Minzi ya Mowambi yikakoniwa na bipata byawo bikashimbiwa. Ha mutena uyo mitima ya bakanzita Bamowambi yikenga ngo mutima wa mbuyama uli na kubeleka.

⁴² Mukoka wa Mowambi wukulobeshiwa ndaba ya kuhandula Nyambi ya Ngula.

⁴³ Bya kutinisha na mankwina na tuntamba bili na kutatilila bantu Bamowambi.” Eshe nisho anamba Nyambi ya Ngula.

⁴⁴ “Ou nimwendi aketuke na kutina, ukawila mu liteke. Ou nimwendi ukakandama na kufuma mu linkwina ukafwa mu kantamba, ndaba nikaleta ha Mowambi mwaka wakushushuliwa kwendi.” Eshe nisho anamba Nyambi ya Ngula.

⁴⁵ “Bantapwa bemanine kushinga kuyavwiwa ku Heshimboni, munzi oku mwene Shihoni alelele shikati shimo, ngoboni uli mu milangi ya mundilo. Mundilo unahokeshe minzi yili hayilu ya mapili oho hekala bakanzita. Bantu ba kuhakiwa ba ku Mowambi.

⁴⁶ Makando wenu enu bantu Bamowambi, mu kulemesha Kemoshi nyambi yenu, ngoboni wuluno munakushushuliwa, bana benu babalume na babambuyama bali mu wuntapwa mu litunga lya bashenge.

⁴⁷ Ngoboni mu matena amamaninino, nikabwesha bitandalisho bya Mowambi.” Eshe nisho anamba Nyambi ya Ngula. Aha niho hanamanini kuyata Mowambi.