Yelemiya 46 - Libuka Lya Kuyela

Kulubulula bya ha matunga

¹ Nyambi ya Ngula wambile kuli muluwe Yelemiya ha matunga.

Kulubulula bya ha Engepita

² Ha litunga lya Engepita olwe nilwo lushango lwa kulwisha nzita ya Fwalo Neko, mwene wa Engepita uya wakomiwilile ku Kakemeshi ku mushinzi wa Yufuleti na Nembukandineza mwene wa Mbambiloni mu mwaka wa wunaa wa wene wa Yehoyakimu mwana Yoshiya mwene wa Yunda.

³ “Wahishenu makebo wenu, amanene hamo na amashe, muye ku nzita.

⁴ Pakatishenu bambishi, kami bakandamenu. Wilenu mu muhoko, kami vwalenu zihoshi za nzita, kumbenu milinga. Vwalenu bivwalo bya nzita.

⁵ Kati niku mona bishini? Banatampwa, pe bali na kuboka mantenganyima bakanzita babo bakoniwile. Bali na kuya lubilo kwakubula ku shetuka kunyima, kami bowa uli kuzimbalila nimwazo.” Eshe nisho anamba Nyambi ya Ngula.

⁶ “Baka lubilo kutwesha kuya lubilo bafwako, hinge bakanzita kutwesha kupanzila ku ncelele ku mushinzi wa Yufuleti wufwako, bantu ba kupukazala na kuwa.

⁷ Kami yani uyo ukwiza ngo mushinzi wa Nayilo, ngo mema akukunkula mu mishinzi?

⁸ Engepita ulinakwiza ngo mushinzi wa Nayilo. Ngo mema akukunkula mu mishinzi. Engepita namba ngayi, ‘Nikeza na kufwika hanci na kulobesha minzi na bantu bayo.

⁹ Tongweza bambishi kuya na kulwa, nanenu baka makoloyi nyankupenu. Tumenu bakanzita balume ba ku Kushi na Limbiya ba kushimba makebo, na balume ba wunongi Bakabipando bya mikunzi bakufuma ku Lundimu.

¹⁰ Ngoboni mutena uyo wenga mutena wa Mwene Nyambi wa Makunge mutena wakubweshela wubi ku wubi ku bakankole bendi. Mukwale wendi ukabalya kutwala ha kukwanga kwawo, kami ukanwa mukeza wabo kutwala ha kunyikwa kwawo. Mwene Nyambi wa Makunge ukukombelela bantu anakomo mu ncelele ya mushinzi wa Yufuleti.

¹¹ Obe mwana Engepita wa mbuyama yanga ku Ngiliyande na kushinga wanga. Wanga wobe nimwawo unafutuku kwinga byowa, kowa bikutwesha kukunyongomanisha.

¹² Matunga nimwawo akayuvwa lisheni lyobe, muntu nimwendi ukayuvwa kulila kwobe. Mukanzita ukapukala ku mukanzita wamina, nimwabo bakawila hanci.”

Kwiza kwa Nembukandineza

¹³ Awa niwo mazu a Nyambi ya Ngula ambile kuli muluwe Yelemiya hakwiza kwa Nembukandineza mwene wa Mbambiloni mu kulwisha Engepita.

¹⁴ “Bilika eshe mu minzi ya Engepita, shimikila mu minzi ya Mingindo, shimikila kami mu Memfwishi na Tahipaneshi ngayi, ‘Liwahishilenu na kulilwila, ndaba mukwale ukamilobesha nimwenu.’

¹⁵ Shumangani nyambi yenu wangovu anawili? Kutwesha kwimana afwako, ndaba Nyambi ya Ngula unamuwishili hanci.

¹⁶ Bakanzita benu bakapukala na kuwa, umo na umo bakawila hayilu ya wamina. Bakalyambashana ngayi, ‘Twimanenu, tuyenu ku munzi kukwetu ku bawushinda wetu naku matunga wetu twahemuwila. Tuyenu tupanze mukwale wa baka kutulyatilila.’

¹⁷ Bakabilika ngayi, ‘Fwalo mwene wa Engepita, unakuleta miyoyo yowa tuhu, shikati shendi shinapiti.’

¹⁸ Ami Nyambi ya Ngula nili mwene. Ami Nyambi wa makunge, ngonehe lipili lya Tambola hakati ka mapili, na Kamela lipili lya kiyama ku liwate, nisho zili nyala za nowo ukwiza na kumi lwisha.

¹⁹ Longalongenu byenu muyenga mu wuntapwa, enu mwekala mu Engepita. Memfwishi ukalobeshiwa na kumushiya mu mapembe, mwakubula bantu.

²⁰ Engepita unafweke ngonehe mwana ngombe ya shitole yayiwahe, ngoboni yikulwishiwa ku mpobe waku ncelele.

²¹ Hinge bakanzita bendi ba kulobiwa, banengi byowa ngonehe twana twa zingombe twa kushuwa, kaliha bemananga na kulwa, nimwabo banatenguluku na kutina. Ndaba mutena wa makando wabo wakumakale hahabo. Shinengi shikati shabo sha kushushuliwa.

²² Engepita unatini, ukufwomankana ngonehe liyoka, ndaba nzita ya bamalamo bendi yinakwiza na kulikaka, kami bakwiza na kumulwisha na tuzembe, ngo bantu ba kutema bitondo.

²³ Bakatema lishaka lyendi, hinge ndi lyazika nahiti, bakanzita babo babengi shikuma kupitakana makumbi. Eshe nisho anamba Nyambi ya Ngula.

²⁴ Mwana Engepita wa mbuyama ukayeneshiwa, ukapanikiwa ku maboko a bantu ba ku ncelele.”

²⁵ Nyambi wa Makunge, Nyambi wa Ishalela, wambile ngayi, “Monenu, nikushushula Amoni nyambi wa Tembeshi, hamo na Fwalo na Engepita na banyambi bendi na bamyene bendi, nikashushula Fwalo na nimwabo aba ba kulupila mumwendi.

²⁶ Nikabapanika ku maboko anobo bakushinga ku baziha, mu liboko lya Nembukandineza mwene wa Mbambiloni na babilolo bendi. Nihoboni mu Engepita mukazike bantu kami, ngonehe bekalilemo kubikati bya kunyima.” Eshe nisho anamba Nyambi ya Ngula.

²⁷ “Obe mukamulimo wami Yakobo, hinga utina hinga utampwishiwa obe Ishalela, ndaba mona taha, nika kupulwisha na ku kufumisha ku litunga lya kwakutali, na bazukulyobe nikabafumisha ku litunga oku bekalilenga mu wuntapwa. Yakoba ukaboka kami ukekala shiwahe, kami kukabula muntu wakumutinisha.

²⁸ Hinga wutina, obe mukamulimo wami Yakobo, ndaba nikekala nobe na kukulama. Nikalobesha matunga nimwawo oku na kutandilile, ngoboni obe kuka kulobesha nifwako, nika kukeyesha na kweshekela, kaliha nika kuleha ngayi uye kwakubula ku shushuliwa.” Eshe nisho anamba Nyambi ya Ngula.