Yelemiya 45 - Libuka Lya Kuyela

Shikulupisho sha Nyambi kuli Mbaluki

¹ Ebye nibyo ambile Muluwe Yelemiya kutongweza Mbaluki mwana Neliya mu mwaka wa wunaa wa kulela kwa Yehoyakimu mwana Yoshiya mwene wa Yunda, Mbaluki watikitile mu libuka ebye amutongwezele Yelemiya,

² pe wamutongwezele biya ambile Nyambi ya Ngula, Nyambi wa Ishalela ngayi,

³ Obe Mbaluki wambile ngayi, “Makando wami, ndaba Nyambi ya Ngula unanunguko malwa ku makalikiza wami na kwangakale na ku shunga, kami kutwesha kukatala nifwako.

⁴ Mbaluki, Nyambi ya Ngula unakwamba ngayi, ‘Mona, nilinakushiwula ebye nazikile na ku zula ebye natampikile. Nikatenda eshe hano hanci nimwaho.

⁵ Kati ukulishingila byuma byabinene obe mwine ndi? Hinga ulishingilabyo ndaba ninakuleta makando ha bantu nimwabo, ngoboni nika kukinga ku lufu ku zimbalila nimwazo oku ukaya.’ Eshe nisho anamba Nyambi ya Ngula.”