Yelemiya 44 - Libuka Lya Kuyela

Muluwe wa Nyambi ya Ngula ku Engepita

¹ Nyambi ya Ngula wambile kuli Yelemiya ha Bayunda nimwabo bekalilenga mu Engepita, mu minzi ya Mingindo na Tahipaneshi na Memfwishi namu litunga lya Patiloshi ngayi,

² Nyambi wa Makunge, Nyambi wa Ishalela ukwamba ngayi, “Mwalimonena byabibi biya naletele ha Yelushalema na minzi nimwayo yamu Yunda. Monenu nalelo yishili mapembe, kami kowa muntu na zikimo.

³ Natendele eshe ndaba ya kuluwa kwabo kuya batendele, oho bashonkomwene wukali wami, ndaba bahokeshele incence na kulemesha banyambi baya babulile kumi limuka hinge bankakazenu.

⁴ Namitumininenga bakamilimo bami bamiluwe, aba bamitongwezelenga ngayi, ‘Hinga mutenda byuma bya wunyengwe biya nazimba.’

⁵ Ngoboni kaliha mwombatalile hinge kutengekela matu wenu kukwami ngayi mutenguluke kukuluwa kwenu na kuleha kuhokesha incence ku banyambi bashenge.

⁶ Nohobene natulilile wukali wami ha minzi ya Yunda na mu mikwakwa ya Yelushalema na kuyihokesha na mundilo. Niyo yashalile mapembe na kuloba nehe eshe yili hashikati shino.

⁷ “Haya Nyambi wa Makunge, Nyambi wa Ishalela ukwamba nehe ngayi, ‘Kati shumangani muli na kutendela wubi wawunene wakulilwisha enu bamwine ngayi mwanga mulete kunonga mu Yunda ha balume na bambuyama, batwanuke na bambututu, ngayi kukabule nanou waku shalaho ku bantu benu nimwabo?

⁸ Shumangani mu kumpilamisha na milimo ya maboko wenu ha kuhokesha incence ku banyambi bashenge muno mu litunga lya Engepita munezi mu kwikala ngayi mulizihe enu bamwine na kufutuka shikuto, ngayi mukenge likendu mukati ka mikoka nimwayo ya hano hanci.

⁹ Kati mwavulamakale kuluwa kwa batatizenu na bamyene babalume na ba bambuyama ba litunga lya Yunda na kuluwa kwenu enu bamwine nanoku kwa bakazenu kuya batendele mu litunga lya Yunda namu mikwakwa ya Yelushalema?

¹⁰ Ngoboni naku mutena uno walelo kulishepesha hinge kuntina mufwako, hinge kuyoya mu ndayano nimwazo ziya namipanine na bankakazenu.’

¹¹ “Nyambi wa Makunge, Nyambi wa Ishalela ukwamba ngayi, ‘Nikaleta malwa hahenu kami nikalobesha Bayunda nimwabo.

¹² Nikanongesha baka Yunda nimwabo aba banashalaho, bakafwila mu Engepita ku mukwale, hinge ku nzala. Bakekala mu malwa, bantu bakabakendula na kuliyavwisha lizina lyabo ku ba kutwiza.

¹³ Nikashushula baya bali mu Engepita na mukwale na nzala hinge na wulweli, ngonehe nashushwile Yelushalema.

¹⁴ Bantu ba Yunda baya banayi na kwikala mu Engepita, kowa ou ukapuluka hinge kuyoya ngayi aboke mu litunga lya Yunda, omu bakushinga kuboka ngayi bakekalemo. Kowa babengi bakaboka, kukaboka tuhu babashe.’ ”

¹⁵ Niho balume nimwabo baya balimukile ngayi bakazabo bahokeshelanga incence ku banyambi bashenge na bambuyama bemanine kuyo, lyengile likunge lyalinene hamo na bantu nimwabo bekalilenga ku Patiloshi, mu litunga lya Engepita, bakumbwile Yelemiya ngayi,

¹⁶ “Tunakana kuyuvwilila ku mazu unamba kukwetu mu lizina lya Nyambi ya Ngula.

¹⁷ Tukatenda nimwabyo biya tunalibeze bya kuhokesha incence kuli lihano wa muyilu na kukombelela waine kukwendi, ngonehe batendelenga bankakazetu na bamyene betu na babilolo betu mu minzi ya Yunda namu mikwakwa ya Yelushalema. Hashikati shiyo twekalile na byakulya byabingi, kami twekalile shiwahe kaliha twamonene malwa.

¹⁸ Ngoboni kufuma haya twalehelele kuhokesha incence, hinge kukombelela waine kuli lihano wa muyilu, tunabulu shuma shamina tunamanishiwi na mukwale na nzala.”

¹⁹ Niho bambuyama bambile kami ngayi, “Oho twahokeshelenga incence na kukombelela waine kuli lihano wa muyilu, hinge oho twamuhokeshelelanga mankende aya ali na shifwekesha shendi, kati bakokwetu kaliha balimukile ndi?”

Kukumbula kwa Muluwe

²⁰ Yelemiya niho ambile ku bantu nimwabo balume na bambuyama baya bamukumbwile bya nahiyo ngayi,

²¹ “Kati Nyambi ya Ngula kwanuka wufwako, hinge kuhanganika ha incence yiya mwahokeshelenga ku banyambi bashenge mu minzi ya Yunda na mu mikwakwa ya Yelushalema na batatizenu na bamyene benu na babilolo na bantu bamu litunga liyo ndi?

²² Mutena uno walelo bene, litunga lyenu lyashalakale mapembe, kami kowa muntu eze akazikemo. Nilyo linafutuku likendu ku bantu, kami banafutulu lizina lyalyo ngo shikuto ndaba Nyambi ya Ngula wufwako kutwalililaho ku wumina byabibi nanebye byawunyengwe mwatendele.

²³ Mwahokeshele incence na kutenda wubi ku meho a Nyambi ya Ngula kami munabulu kumwombatala hinge kukonka mazu wendi hinge ndayano zendi hinge biya ambanga, nibyo binaleteshe makando kwiza hahenu.”

²⁴ Yelemiya wambile ku bantu nimwabo shinene ku bambuyama ngayi, “Yuvwililenu lizu lya Nyambi ya Ngula, enu bantu nimwenu ba Yunda muli mu Engepita.

²⁵ Eshe nisho akwamba Nyambi wa Makunge, Nyambi wa Ishalela ngayi, enu na bakazenu munamoneshe obyo mwakulupishile mu ntendelo yenu oho mwambile ngayi, ‘Mwa shikuma tukatenda ngonehe twalibezele ngayi tukahokesha incence na kuyitila nkombela ya waine ku lihano wa muyilu.’ Haya tendenu ebye mwakulupishile. Lamenu mbeza zenu.”

²⁶ Ngoboni yuvwililenu lizu lya Nyambi ya Ngula, enu Bayunda nimwenu mwekala mu Engepita. Nyambi ya Ngula unakwamba ngayi, “Nalibeze na lizina lyami lyalinene ngayi, kowa muntu wamu Yunda ou wekala muno mu Engepita eze akatoye lizina lyami ha kulibeza kwamba ngayi, mwa shikuma nikulibeza mu lizina lya Nyambi Wakuyoya.

²⁷ “Nili na kumitilamina na nkole ngayi nikamilobeshe kaliha na shishemo. Bayunda nimwabo bali mu Engepita bakalobeshiwa na mukwale, hamo na kapande, kutwala na ha kuloba kwabo nimwabo.

²⁸ Obo eze bakapanze ku mukwale na kuboka ku litunga lya Yunda kufuma ku Engepita bakenga babashe. Niho enu bantu bamu Yunda munashalaho mwayile na kwikala mu Engepita mukalimuke ngayi lizu lya yani lya kupwisha lyami hinge ndi lyabo.

²⁹ Nyambi ya Ngula ukwamba ngayi eshe nisho shimonekesho kukwenu ngayi nikamishushula mu mwanya owe, pe mwanga mukalimuke ngayi ebye nimwabyo nambile bya kumi lwisha bikatendiwa.

³⁰ Eshe nisho anakwamba Nyambi ya Ngula ngayi, nikapanika Fwalo Hofwila mwene wa Engepita ku maboko a bamalamo bendi obo bali na kushinga wumi wendi, ngonehe napanikile Zendekiya mwene wa Yunda kuli kamalamo wendi Nembukandineza mwene wa Mbambiloni, ou washingilenga wumi wendi.”