Yelemiya 42 - Libuka Lya Kuyela

Bantu ba kunyepa Yelemiya ngayi abalombelele

¹ Niho bakulwane ba bakanzita nimwabo, hamo na Yohanani mwana Kaleya na Azaliya mwana Hoshaya bezile na bantu ku balika ku babashe kutwala ku babanene, bahenyenene hahepi,

² niho bambile kuli Yelemiya muluwe wa Nyambi ngayi, “Tukukunyepa ngayi utambule kulambilila kwetu. Utulombelele kuli Nyambi ya Ngula, Nyambi wobe ndaba ya bantu bamu Yunda banashalaho, hinge ndi twekalile babengi mwaka, ngoboni twashala babashe ngonehe ukumono.

³ Lombela ngayi Nyambi ya Ngula, Nyambi yobe atumoneshe nzila eye tuku fwanina kuya naneshe tuku fwanina kutenda.”

⁴ Muluwe Yelemiya waba kumbwile ngayi, “Shashiwahe nayuvwu ebye munanyepe, nikulombela kuli Nyambi ya Ngula Nyambi yenu ngonehe munanyepe, kami eshe nimwasho akakumbula Nyambi ya Ngula nikamitongweza, kukamilimbila nifwako.”

⁵ Niho bambile kuli Yelemiya ngayi, “Mwanga Nyambi ya Ngula enge wa kupwisha na kwinga paki wakulunga mu kutulwisha ndi tufwako kwombatala ndayano nimwazo ziya Nyambi ya Ngula akakupanika.

⁶ Hinge ndi kukafuma lizu lyaliwahe hinge ndi lyalibi, tukwombatala lizu lya Nyambi ya Ngula, Nyambi wetu, oku tukukutuma. Tukwombatala Nyambi ya Ngula, Nyambi wetu ngayi byuma bikatwendele shiwahe.”

Nyambi ya Ngula ukukumbula Malombelo a Yelemiya

⁷ Ku mamaninino a matena likumi Nyambi ya Ngula wambile kuli Yelemiya.

⁸ Niho Yelemiya ehanine Yohanani mwana Kaleya na bakakutwaminina bakanzita baya bekalile nendi na bantu nimwabo ku balika ku wamushe kutwala ku wamunene.

⁹ Wambile kukwabo ngayi, “Nyambi ya Ngula, Nyambi wa Ishalela, kuya mwantuma ngayi nikalambilile, unakwamba ngayi,

¹⁰ ‘Ndi mukwikala muno mu litunga, pe nikamitangamisha, kukamilobesha nifwako. Makando naletele hahenu anandeteshe wunginga shikuma.

¹¹ Hinga mwikala na bowa na mwene waku Mbambiloni ou muli na kutina. Hinga mutina, nili hamo nanenu, nikamilamwina na kumifumisha mu maboko wendi. Eshe nisho anamba Nyambi ya Ngula.

¹² Nikekala nanenu na nceshe, nikamwingisha ngayi akamiyuvwile nceshe, pe ukamitabilisha ngayi mwikale mu litunga lyenu.’

¹³ Ngoboni ndi mufwako kwombatala mazu a Nyambi ya Ngula, Nyambi yenu, himukwamba ngayi, ‘Kwikala muno mu litunga tufwako.’

¹⁴ ‘Tukuya na kwikala mu Engepita, muya tukabula kwikala mu nzita, hinge kuyuvwa mpandula, hinge kufwa ku nzala, pe nimo tukekala,’ ”

¹⁵ pe enu bantu bamu Yunda munashalaho, yuvwililenu lizu lya Nyambi ya Ngula. Ebye nibyo akwamba Nyambi wa Makunge, Nyambi wa Ishalela ngayi, ndi mu kuya ku Engepita ngayi mukekaleko,

¹⁶ pe nzita yiya muna kutina yikamiwana na nzala yikamikonka ku Engepita kami mukafwila muyo.

¹⁷ Bantu nimwabo baya bakushinga kuya ku Engepita ngayi bakekaleko, bakafwa ku nzita na ku nzala, hinge ku wulweli. Kowa ukapanza hinge kupuluka ku makando aya nikaleta hahabo.

¹⁸ Nyambi wa Makunge, Nyambi wa Ishalela ukwamba ngayi, “Ngonehe kulasheka kwa wukali wami kwezile ha bantu baya bekalile mu Yelushalema, nohobene, wukali wami ukeza hahenu, ndi mu kuya ku Engepita. Mukekala mu makando, bantu bakamikendula, bakaliyavwisha lizina kumikutwiza. Pe kukamona kami yino mbalila mufwako.

¹⁹ Nyambi ya Ngula ukwamba kukwenu enu bantu bamu Yunda munashalaho ngayi, ‘Hinga muya ku Engepita.’ Munafwanini kulimuka eshe ninamyambili mutena walelo.

²⁰ Munalyongeze enu bamwine ngayi muyongeshe wumi wenu, oho mwantuma kuli Nyambi ya Ngula, Nyambi yenu na naha mwamba ngayi, ‘Tulombelele kuli Nyambi ya Ngula, Nyambi wetu, mwanga ututongweze ebye nimwabyo akwamba, pe tukabitenda.’

²¹ Haya lelo ninamitongweze, ngoboni shilolo mwombatale Nyambi ya Ngula, Nyambi yenu ha biya nimwabyo anantumu kukwenu.

²² Munafwanini kulimuka ngayi mukafwa ku nzita, hinge ku nzala, hinge ku wulweli muya mu litunga mukushinga kuya na kwikala.”