Yelemiya 40 - Libuka Lya Kuyela

Yelemiya ukwikala na Ngendaliya

¹ Nyambi ya Ngula wambile kuli Yelemiya oho Nembuzalandani mukakutwaminina bakakulama banzita amushobolwele ku Lama. Wawanine Yelemiya hinga amangiwa hamo na bantu nimwabo bakwatiwile mu Yelushalema namu Yunda, baya bayilenga mu wuntapwa ku Mbambiloni.

² Mukakutwaminina bakakulama washimbile Yelemiya, niho ambile kukwendi ngayi, “Nyambi ya Ngula, Nyambi yobe, wambile ngayi ukaleta makando ha lino litunga.

³ Haya Nyambi ya Ngula natende nimwabyo ambile. Ebye nimwabyo binenzalishiwi ndaba mwatendele wubi kuli Nyambi ya Ngula, kami kaliha mwombatalile mazu wendi.

⁴ Ngoboni lelo na ku kushobolola na kufumisha mawenge ku maboko wobe. Ukutwesha kuya na nami ku Mbambiloni ndi hiwushinga, nika kulama shiwahe. Ngoboni ndi wufwako kushinga kunkonka ku Mbambiloni pe hinga wiza. Ukutwesha kulihatila mu litunga nimwalyo oku ukushinga kwikala.

⁵ Ndi ukushala, pe yanga kuli Ngendaliya mwana Ahikama, Ahikama mwana Shafwani. Ngendaliya niye ahatile mwene wa Mbambiloni ngayi enge kalela wa minzi yamu Yunda. Yanga ukekale nendi hamo na bantu. Ndi wufwako ku shinga, ukutwesha kuya nimwako oku unamono shiwahe.” Nembuzalandani wapanine Yelemiya byakulya na byuma bya shishemo, niho amufunzwile.

⁶ Yelemiya niho ayile kuli Ngendaliya mwana Ahikama ku Mizipa, wakekalile hamo na bantu baya bashalile mu litunga lya Yunda.

Ngendaliya Kalela wa Yunda

⁷ Babilolo bamo ba Yunda na bakanzita baya bekalilenga mu zimbuwa, oho bayuvwile ngayi mwene wa Mbambiloni nahata Ngendaliya mwana Ahikama kwinga kalela wa litunga liyo, kami nayaka bancepwe nimwabo baya babula kutwaliwa mu wuntapwa ku Mbambiloni mu ngovu zendi,

⁸ bayile kuli Ngendaliya ku Mizipa. Pe bayile bengile ba Ishimaele mwana Netaniya, Yonatana na Yohanani bana ba Kaleya na Shelaya mwana Tenihumeti na bana ba Efwayi waku Netofwa na Yezaniya waku Maaka, hamo na bantu babo nimwabo.

⁹ Ngendaliya mwana Ahikama, Ahikama mwana Shafwani, walibezele nabo na bantu babo ha kulishisha ku baka Mbambiloni ngayi, “Hinga mutina kutendela milimo mwene wa mu Mbambiloni. Yikalenu mwamuno mu litunga, pe mukekala shiwahe.

¹⁰ Ami nikekala ku Mizipa ngayi mwanga nikamimanineko oho baka Mbambiloni bakeza kuno. Haya buyenu shinyanca na mikabo ya mvumbi, yangulenu mazi a olive, mubikoweze mu zinyungu zenu. Yikalenu mu minzi eye mwalishimbilakale.”

¹¹ Shengile shuma shimo kami oho Bayunda nimwabo bekalile mu Mowambi namu Amoni namu Endoma namu matunga amina bayuvwile ngayi mwene waku Mbambiloni unetabilishi Bayunda bamina ngayi bekalilile mu Yunda, kami ngayi unayaka Ngendaliya kwinga kalela wabo,

¹² Bayunda nimwabo bafumine kuzimbalila oku bapanzaninine, niho babokele ku litunga lya Yunda, bezile kuli Ngendaliya ku Mizipa, babuyishile mishiinzi yayinene ya shinyanca na mikabo yamina ya mvumbi.

Ngendaliya ukuzihiwa

¹³ Yohanani mwana Kaleya na bakakutwaminina ba bakanzita aba bekalilenga muzimbuwa bezile kuli Ngendaliya ku Mizipa,

¹⁴ niho bambile kukwendi ngayi, “Kati kulimuka wufwako ngayi mwene Mbaalishi wa Baamoni natumu Ishimaele mwana Netaniya mu kukuziha ndi?” Ngoboni Ngendaliya mwana Ahikama kaliha waba kulupilile.

¹⁵ Yohanani mwana Kaleya wambile na Ngendaliya kuwi ku Mizipa ngayi, “Shashiwahe niye nikazihe Ishimaele mwana Netaniya, kowa muntu eze alimuke ngayi yani unamuzihi. Shumangani tukumwitabilisha ngayi akuzihe mwanga Bayunda nimwabo aba banakungulukili kukwobe bapanzane, kami shikaletela wukalu bantu nimwabo banashalaho mu Yunda?”

¹⁶ Ngoboni Ngendaliya mwana Ahikama wambile kuli Yohanani mwana Kaleya ngayi, “Kaliha wafwanini kutenda shuma eshe, ndaba unakwamba mahalo hali Ishimaele.”