Yelemiya 4 - Libuka Lya Kuyela

Lukuwa lwa kutenguluka

¹ Nyambi ya Ngula ukwamba ngayi, “Obe Ishalela ndi ukushinga kutenguluka, pe unafwanini kutengulukila kukwami. Ndi ukufumisha tunankishi otu na zimba na kwinga wakulunga kukwami,

² haya ndi ukulibeza ha lizina lyami mu kulunga namu kupwisha na mukwoloka ngayi, ‘Ngonehe Nyambi ya Ngula ayoya,’ niho matunga nimwao akanyepa mfuywezi zami na kunyemeza.”

³ Nyambi ya Ngula ukwamba ku bantu bamu Yunda na Yelushalema ngayi, “Ngonehe ndimi ukulima mfuba ya nteme na kupumpulula mashinde, pe nanenu mwafwanina kupumpulula biheka byenu bya mafutufutu na ku balika shiwahe. Ngonehe ndimi akufumisha mihongela kutina mbuto yendi yibipa nanenu kami fumishenu wubi ou uku bipisha nyinkalo yenu.

⁴ Lamenu kulimama kwenu na nami Nyambi ya Ngula, lifungwilenu kukwami, enu bantu bamu Yunda na Yelushalema, kutina wukali wami ukabanga hahenu ngonehe mundilo ndaba ya byuma byabibi munatende. Mundilo ukabanga pe kowa ukatwesha kuwu zima.”

Yunda ba ku mufumbila kumu katukila mutakwe

⁵ Bilikenu mu Yunda na kukuwa mu Yelushalema na kwamba ngayi, “Shibenu mpandula mu litunga nimwamo, bilikenu na kukuwa ngayi, ‘Tulikungululenu, mwanga tuye mu zinkena za bipata.’

⁶ Shangulenu ku Ziyoni, tininenu kwa ku mwena, hinga mwihala, ndaba nili na kuleta makando akumilobesha aya akafuminina ku ncelele.

⁷ Ngonehe shimbwi atokomokanga kufuma mu limfwenke lyendi aholamanga, nisho akwiza ou mukakulobesha matunga, wakwiza mu kulobesha Yunda. Zinkena zikashala mu mapembe, kami kowa ou eze akazikemo.

⁸ Pe haya vwala bicancolo, pwezuma na kulila ndaba wukali wa Nyambi ya Ngula shilolo ufume hali Yunda.”

⁹ Nyambi ya Ngula wambile ngayi, “Ha mutena uyo bamyene na babilolo bakabula kukanca, bakankombela bakatampwa na bamiluwe ba Nyambi bakalikomokela.”

¹⁰ Niho nambile ngayi, “Mwa shikuma Nyambi wa Makunge wongezele bantu bamu Yelushalema, oho wambile ngayi, ‘Ku mwena kukekala kukwenu,’ Ngoboni haya mukwale wobe uli ha milibu yetu.”

¹¹ Ha shikati shiyo bantu bamu Yelushalema bakabatongweza ngayi, “Mpepo ya ntukumina yaha mapili anyuminine amu libelelengwa yili na kupepokela ha bantu bendi, kaliha yikenga mpepo yanahiya yiya yapepokelanga na kuyelesha ncwalahwahwa,

¹² ngoboni yikenga mpepo yikeza na ngovu za lizu lya Nyambi ya Ngula. Haya uli na kubilika kuyata kwendi ha bantu bendi.”

Yunda ba kumuzinguluka bamalamo

¹³ Mona, kamalamo ulinakwiza ngonehe makumbi, makoloyi wendi a nzita anengi ngonehe kakundukundu, bambishi bendi ba lubilo shikuma kupitakana bangonga. Makando wetu! Ndaba twalobakale.

¹⁴ Obe Yelushalema yelesha mutima wobe, ngayi mwanga upuluke, haya bihanganiko byobe byabibi bikekala myaka yinga mu mutima wobe?

¹⁵ “Lizu linayuvwaniki ku munzi wa Ndani lya lukuwa lwa kubilika mbuzi ya makando akufuma ha lipili lya Efulemu.

¹⁶ Tongwezenu bakamatunga, pe bilikizenu ku Yelushalema ngayi bamalamo bakamishintikiza bakafuma ku litunga lya kwakutali bali na kumifumbila kwiza na kulwisha minzi ya Yunda.

¹⁷ Ngonehe bantu balamanga mfuba, nisho kami bakazinguluka Yunda unamfutulukili. Eshe nisho anamba Nyambi ya Ngula.

¹⁸ Obe Yunda unaliletelelebyo obemwine, ndaba ya biheka na zintendelo zobe. Haya uli na ku shushuliwa shikuma, kukola kukaneneha kukuma na ku mutima.”

Wunginga wa Yelemiya ha bantu ba Yelushalema

¹⁹ Makando wami tawee! Makando wami tawee! Nilinakuyuvwa kukola tawee mutima wami uli mu wunginga! Mutima wami unambwatuku mushali, kutwesha ku mwena nifwako, ndaba nayuvwu kuvuma kwa mpandula, na miyoyo ya nzita.

²⁰ Makando ezakale ha makando amina, litunga nimwalyo lyafutukakale lipembe, mukashikati tuhu kakashe, zintanda zami zalobakale, mu shikati tuhu shashishe.

²¹ Kati shikati sha kukuma hati, nikafwanina ku mona ndembela ya nzita na kuyuvwa kuvuma kwa mpandula?

²² Nyambi ya Ngula ukwamba ngayi, “Bantu bami bakuyeba, kundimuka bafwako. Banengi ngonehe batwanuke bakubula ngana, kalimukisho bafwako. Benzilila kutenda byabibi ngoboni kulimuka kutenda byabiwahe bafwako.”

Shimono sha Yelemiya sha malwa akeza

²³ Napenzele ha kaye, kengile kakubula shifwekesha na kwinga ha mukungulu, napenzele kuyilu, kaliha kwekalile mimuni.

²⁴ Napenzele ku mapili, anyenkaninenga na binkanda byakankilenga.

²⁵ Namonene ngayi, kaliha kwekalile bantu, na tuyoni nimwato kaliha twekalileko.

²⁶ Namonene ngayi, litunga lya wilo, lyafutukile libelelengwa, na minzi yalyo nimwayo, yanyemukilile hanci, ndaba ya wukali wa Nyambi ya Ngula.

²⁷ Nyambi ya Ngula ukwamba ngayi, “Litunga likalobeshiwa, ngoboni kukalilobesha nimwalyo nifwako.

²⁸ Nohobene ha kaye hakekala mbingo, pe mu mayilu mukekala mincimpwe. Eshe nisho ninamba, kami ninashifungu, pe kutengulula bifungo byami nifwako, kami kubifutula nifwako.”

²⁹ Bantu nimwabo mu lukena bakatina, oho bakayuvwa miyoyo ya bakakukandama ha bambishi, na miyoyo ya baya balimuka kupuha bipando bya mikunzi. Baketukila mu mashaka akuzika, bamina bakakandama ha mamanya. Zinkena nimwazo zikashala nahiya, kowa ukekalamo.

³⁰ Yelushalema, ukalobeshiwa, haya ukatenda Byumangani? Kati bishini unavwalili bya kufubila na kuliyenga na bya ngolinde? Ndaba ngani unalamba mushombela ha meho? Uli na kuliyenga tuhu ntalu, ndaba ya baya ba ku haka, ba kukendakale, bali na kushinga kukuziha.

³¹ Nayuvwile kulila ngonehe kwa mbuyama ukushinga kubeleka. Washungilenga ngonehe mbuyama uli na kubeleka mwana wakulilongesha. Kunengi kuhekela kwa bantu bamu Ziyoni, banemiki maboko wabo na kwamba ngayi, “Makando wetu! Twabulakale wakutulamwina ku naba bakushinga kutuziha.”