Yelemiya 37 - Libuka Lya Kuyela

Zendekiya Ukulomba Yelemiya

¹ Mwene Nembukandineza wa Mbambiloni wahatile Zendekiya mwana Yoshiya ngayi enge mwene wa Yunda. Zendekiya wahingile Yehoyakini mwana Yehoyakimu.

² Ngoboni Zendekiya na bakamilimo bendi na bantu nimwabo, kaliha bombatalile mazu a Nyambi ya Ngula kupitila muli muluwe Yelemiya.

³ Mwene Zendekiya watumine Yehuka mwana Shelemiya na mukankombela Zefwaniya mwana Maasheya kuya na kutongweza muluwe Yelemiya ngayi, “Tulombenu kuli Nyambi ya Ngula, Nyambi yetu.”

⁴ Hashikati shiyo Yelemiya wendelenga hinga ashoboloka mukati ka bantu oho shilolo bamumange.

⁵ Bakanzita ba ku Mbambiloni bezile na kuzinguluka ngayi balwishe Yelushalema, ngoboni oho bayuvwile ngayi bakanzita ba Fwalo banakiluku nginza banakwiza kufuma ku Engepita, niho bashintulukile.

⁶ Nyambi ya Ngula niho ambile kuli muluwe Yelemiya ngayi

⁷ atongweze Zendekiya mwene wa Yunda ngayi, “Bakanzita ba Fwalo bali na kwiza na ku kuyavwa, ngoboni wuluno baboke ku Engepita litunga lyabo.

⁸ Bakanzita ba ku Mbambiloni bakaboka mu kulwisha lukena lwa Yelushalema, bakalupukula na kuluhokesha.

⁹ Nyambi ya Ngula unakwamba ngayi hinga mulyongeza kwamba ngayi, ‘Baka Mbambiloni kuboka bafwako,’ mwa shikuma banakwiza.

¹⁰ Hinge ndi mukakona bakanzita nimwabo ba Mbambiloni baya bana kumi lwisha, pe mu zintanda zabo mu kushala tuhu baya banalemana, hinge noho, baya banalemana bakakatuka, bakeza na kuhokesha munzi wa Yelushalema.”

Yelemiya ukukwatiwa na kuyakiwa mu Tolongo

¹¹ Oho bakanzita ba ku Mbambiloni bafumine ku Yelushalema ndaba ya kutina bakanzita ba Fwalo baya bezilenga,

¹² Yelemiya wafumine mu Yelushalema kuya ku litunga lya Mbenjamani mu kupanikiwa shitapilo sha likona lyendi ku bantu.

¹³ Ngoboni oho akumine ku lipangati lya Mbenjamani, mukakulama kuyo ku lipangati wa lizina lya Iliya mwana Shelemiya, Shelemiya mwana Hananiya. Iliya wakwatile Muluwe Yelemiya, wambile ngayi, “Unakutinina ku baka Mbambiloni.”

¹⁴ Yelemiya wambile ngayi, “Wakwamba mahalo.” Kutinina ku baka Mbambiloni nifwako. Ngoboni Iliya kaliha wayuvwile eshe ambile, wamukwatile niho amutwalile ku babilolo.

¹⁵ Babilolo bakalihilile Yelemiya na kumukama. Niho bamupatililile mu litala lya mukakutikita Yonatana, ndaba nilyo bafutwile kwinga tolongo.

¹⁶ Yelemiya oho bamuyakile mu wina na kulamiwa muyo matena amengi,

¹⁷ Mwene Zendekiya wamutuminine bantu na kumuleta ku musheke. Niho mwene amwipwile kwaninkayendi ngayi, “Kati kuli mazu anafumu kuli Nyambi ya Ngula ndi?” Yelemiya wambile ngayi, “Ingoi nikowali, ukapanikiwa mu maboko a mwene waku Mbambiloni.”

¹⁸ Yelemiya niho ambile kami kuli mwene Zendekiya ngayi, “Kati wubi ngani natende kukwobe hinge ku babilolo bobe hinge kunaba bantu, ou unanyingizili mu tolongo?

¹⁹ Kati balikuti bamiluwe bobe aba balubulwile kukwobe ngayi mwene waku Mbambiloni kukeza na kukulwisha wufwako hinge kulwisha litunga lino?

²⁰ Haya na kukunyepa ngayi uyuvwilile kukwami obe hekulu mwene wami, yitabila kunyepa kwami na kukulambilila, hinga umbweshela kami mu tolongo mu litala lya mukakutikita Yonatana kutina nikafwilamo.”

²¹ Niho mwene Zendekiya apanine ndayano ngayi Yelemiya ashinkiwe mu shipango sha bakakulama, omu apanikiwilenga linkende lyanzimba ha mutena ha mutena ku bakakuvuba mankende kutwala noho amanine mankende mu lukena. Yelemiya wekalile mu shipango sha bakakulama.