Yelemiya 36 - Libuka Lya Kuyela

Mbaluki ukulaba Libuka lya Kuzenga mu Litala lya Nyambi

¹ Mu mwaka wawunaa wakulela kwa mwene Yehoyakimu mwana Yoshiya mwene wa Yunda, Nyambi ya Ngula watongwezele Yelemiya ngayi,

² “Shimba libuka lya kuzenga utikitemo mazu nimwawo aya nakutongwezele a hali Ishalela na Yunda na matunga nimwao. Tikita mazu nimwawo aya nakutongwezele ku balika ku shikati shiya natatikile kwamba kukwobe oho Yoshiya ushili kwinga mwene kukuma na ku mutena walelo.

³ Kampe bantu ba Yunda bakayuvwa byabibi nimwabyo biya nikuyongola kutenda kukwabo, hamina bakatenguluka kuleha zinzila zabo zazibi, pe nikabayatila kukutengama kwabo naku wubi wabo.”

⁴ Yelemiya wehanine Mbaluki mwana Neliya, niho amutongwezele ngayi atikite byuma nimwabyo biya Nyambi ya Ngula ambile kukwendi. Niho Mbaluki atikitile mazu nimwawo mu libuka lya kuzenga.

⁵ Yelemiya niho atongwezele Mbaluki ngayi, “Banancinkili kwingina mu Litala lya Nyambi ya Ngula.

⁶ Ngoboni nikushinga ngayi obe uyeko ha mutena wakuzila kulya. Niho uwalabe mazu a Nyambi ali mu libuka lya kuzenga ku bantu nimwabo ngayi bayuvwe eshe Nyambi ya Ngula anamba kukwami. Kawalabe na kubilikiza mu Litala lya Nyambi, aya mazu watikitanga ami hinikunungwilila. Ukawalabila kami ku ba Yunda baya banezi kufuma ku minzi yabo kwiza ku Litala lya Nyambi ya Ngula.

⁷ Kampe hamina kulambilila kwabo kukakuma kuli Nyambi ya Ngula, muntu na muntu ukatenguluka kufuma ku zinzila zendi za kuluwa, ndaba Nyambi ya Ngula unabatinishi na kubapilamina shikuma na kukalihila bantu aba.”

⁸ Mbaluki mwana Neliya watendele shiwahe nimwabyo biya amutongwezele muluwe wa Nyambi Yelemiya. Walabile mazu a Nyambi ya Ngula mu Litala lya Nyambi.

⁹ Mu mwaka wa mutanu na zingonda mutanu na zinaa wakulela kwa mwene Yehoyakimu mwana Yoshiya mwene wa Yunda, bantu nimwabo aba bazikilenga mu Yelushalema na baya nimwabo bafumine ku minzi ya Yunda kwiza mu Yelushalema, bazilile kulya ku meho a Nyambi ya Ngula.

¹⁰ Mbaluki walabile mazu a Yelemiya amu libuka lya kuzenga ku bantu hinga bekala mu Litala lya Nyambi ya Ngula. Mbaluki wekalile ku Kampenci ka Ngemaliya mwana mukakutikita Shafwani oho alabilenga, aka katendiwile mushipango sha kuyilu ku menginino a lipangati lyalipya lya Litala lya Nyambi ya Ngula.

Libuka ba kulilabila Babilolo

¹¹ Oho Mikaya mwana Ngemaliya muzukulyendi Shafwani, ayuvwile Mbaluki halaba mu libuka obyo ambile Nyambi ya Ngula,

¹² wayile ku musheke wa mwene ku kampenci ka mukakutikita oko kwekalile babilolo nimwabo bamu litengo. Kwekalile Elishama mukakutikita na Ndelaya mwana Shemaya na Elinatani mwana Akimbo na Ngemaliya mwana Shafwani na Zendekiya mwana Hananiya na babilolo bamina nimwabo bekalileko.

¹³ Mikaya wabatongwezele mazu nimwawo owo ayuvwile Mbaluki halaba ku bantu.

¹⁴ Niho babilolo batumine Yehundi na mwana Netaniya mwana Shelemiya, mwana Kushi na kutongweza Mbaluki ngayi alete libuka lya kuzenga alabililenga bantu. Mbaluki washimbile libuka liyo na kuya kukwabo.

¹⁵ Babilolo bambile kukwendi ngayi, “Yikala hanci utulabilelyo.” Nohobene Mbaluki walabilelyo.

¹⁶ Oho babilolo bayuvwile mazu nimwawo, balipenzele umo na wamina na kutina, kami bambile kuli Mbaluki ngayi, “Tunafwanini ku shimikila mwene awa mazu nimwawo.”

¹⁷ Niho bambile kuli Mbaluki ngayi, “Tutongweze osho watikitile awa mazu nimwawo. Yelemiya niye wakunungwilililewo awa mazu ndi?”

¹⁸ Mbaluki wakumbwile ngayi, “Ingoi, Yelemiya niye wanungwililile awa mazu nimwawo ami hinitikita mu libuka elye na inki.”

¹⁹ Niho babilolo bambile kuli Mbaluki ngayi, “Yanga mukaholame hamo na Yelemiya ngayi kubule muntu wakulimuka oku munaholama.”

Mwene Yehoyakimu ukuhokesha Libuka lya Kuzenga

²⁰ Niho babilolo bayakile libuka mu kampenci ka Elishama, mukakutikita wa mwene na kuya ku musheke, bakatongwezele mwene byuma nimwabyo.

²¹ Mwene niho atumine Yehundi kuya mu kushimba olyo libuka kulifumisha mukampenci ka Elishama mukakutikita. Yehundi walilabilile mwene na babilolo nimwabo bekalile hamo na mwene.

²² Hashikati shiyo wengile mupepo mu ngonda ya mutanu naya wunaa, mwene wekalile mu musheke wendi hayota mundilo.

²³ Yehundi oho alabile tuhu matapululo ahatu hinge anaa, mwene walitabwile na mpoko yendi na kuliyumbila mu liziko. Watendele noho kutwala ha kumana kwa libuka nimwalyo.

²⁴ Ngoboni hinge noho, mwene, hinge bakamilimo bendi kaliha bekalile na bowa hinge kutabula bivwalo byabo ha kuyuvwa awa mazu nimwawo.

²⁵ Hinge oho Elinatani na Ndelaya na Ngemaliya banyepele ngayi mwene hinga ahokesha olyo libuka ngoboni kaliha wabayuvwile.

²⁶ Niho mwene atongwezele Yelahamela mwana mwene hamo na Shelaya mwana Aziliyela na Shelemiya mwana Ambindiyelu kuya na kukwata Mbaluki mukakutikita na muluwe Yelemiya, ngoboni Nyambi ya Ngula wabaholekele.

Yelemiya ukutikita Libuka lyamina

²⁷ Oho mwene Yehoyakimu amanishile kuhokesha libuka liya atikitile Mbaluki lya mazu amutongwezelenga Yelemiya, Nyambi ya Ngula wambile kuli Yelemiya ngayi,

²⁸ “Shimba libuka lyamina, utikitemo mazu nimwawo aya ekalile mu libuka lya kutatika, liya anahokeshe Yehoyakimu mwene wa Yunda.

²⁹ Tongweza Yehoyakimu mwene wa Yunda ngayi, ‘Nyambi ya Ngula ukwamba ngayi unahokeshe liya libuka, kami wepwile Yelemiya ngayi bihi watikitila mwene waku Mbambiloni ukeza na kunongesha lino litunga ou ukashimba bantu na tuyamana.

³⁰ Nyambi ya Ngula ukwamba kuli Yehoyakimu ngayi, ku bazukulyendi kowa ukekala ha litanda lya mwene Ndavita. Mutuntu wa Yehoyakimu ukayumbiwa ha munkanda, pe mincalala ya mutena yikawutwila ku shikati sha mwaana, ku shikati sha wushiku kukekala na makelengo a mashika.

³¹ Nikamushushula hamo na bana bendi na bakamilimo bendi, ndaba ya wubi wabo. Nikaleta makando hahabo aya natoyele naha bantu bamu Yelushalema na mu Yunda, ndaba kaliha banyuvwile.’ ”

³² Yelemiya niho ashimbile libuka lyamina lya kuzenga na kulipanika mukakutikita wendi Mbaluki mwana Neliya. Mbaluki watikitile mazu nimwawo amutongwezelenga Yelemiya. Watikitile mazu nimwawo aya ekalile mu libuka liya ahokeshele Yehoyakimu mwene waku Yunda na amina amengi akulifweka nawo, awa amutongwezelenga akuwezelelako.