Yelemiya 35 - Libuka Lya Kuyela

Yelemiya na Balekabe

¹ Ha matena a Yehoyakimu mwana Yoshiya oho engile mwene wa baka Yunda, Nyambi ya Ngula wambile kuli Yelemiya ngayi,

² “Yanga ku baka litala lya Balekabe ukambe nabo, ubalete mu Litala lya Nyambi ya Ngula, mu kampenci kamo pe uka bapane waine.”

³ Niho nashimbile Yazaniya mwana Yelemiya washenge ou wengile mwana Hambazaniya na bawushinda wendi na bana bendi babalume nimwabo na baka litala nimwalyo lya Balekabe.

⁴ Nabaletele ku Litala lya Nyambi ya Ngula ku kampenci ka bana ba Hananu muntu wa Nyambi, mwana Ingandaliya. Aka kampenci kekalile hahepi na kampenci ka babilolo hayilu ya kampenci ka shilolo mukakulama ku shipana Mayasheya mwana Shaluma.

⁵ Niho na batakamikilile zintesho za kwinzala za waine hamo na zinkomoki, nambile kukwabo ngayi, “Haya nwenu waine.”

⁶ Ngoboni bakumbwile ngayi, “Kaliha twanwanga waine, ndaba nkaka yetu Yehonandambu mwana Lekabe watulayile ngayi, ‘Hinga munwanga waine kubalikila hali enu kutwala na ku bazukulyenu mwaya myaka.’

⁷ Kami watulayile ngayi, ‘Hinga mukazika matala hinge kukuba mbuto, hinga mukakuna hinge kwikala na mafuba a shinyanca, ngoboni mukekalenga tuhu mu zintanda mu kuyoya kwenu nimwako, nohobene ngayi mwanga mukekalenga tuhu mu litunga ngonehe bayeni.’

⁸ Etu na bakazetu na banabetu babalume na ba bambuyama tunombatala ndayano nimwazo za nkaka yetu Yonandabe mwana Lekabe. Watutongwezele ngayi hinga tunwa waine,

⁹ hinga tuzika matala ngayi twikalemo, hinga twikala na mafuba a shinyanca hinge mafuba a zimbuto.

¹⁰ Twekalanga mu zintanda, ndaba tunombatala ebye atutongwezele nkaka yetu Yehonandambu.

¹¹ Ngoboni oho Nembukandineza mwene wa Mbambiloni ezile na kulwisha litunga, twahanganikile kwitukila ku Yelushalema kutina bakanzita ba ku Mbambiloni na Shiliya. Nisho shaletesha ngayi tuwaniwe muno mu Yelushalema.”

¹² Nyambi ya Ngula wambile kuli Yelemiya ngayi,

¹³ “Ami Nyambi wa Makunge, Nyambi wa Ishalela nikwamba ngayi, yanga ukatongweze bantu ba Yunda naba bali mu Yelushalema ngayi, Shumangani mu kubula ku yuvwishisha na kwombatala mazu wami.”

¹⁴ Yonandabe mwana Lekabe watongwezele bana bendi ngayi hinga banwa waine. Nibo balamanga eze ndayano, kukuma na ku mutena walelo, kunwa waine bafwako. Ngoboni enu ninamba kukwenu bikati byabingi ngoboni kunyombatala mufwako.

¹⁵ Bikati byabingi ninamitumini bakamilimo bami bamiluwe na kwamba ngayi, muntu na muntu atenguluke kufuma ku zinzila zendi zazibi ngayi atende byakwoloka. Hinga mukonkezeka hinge kukombelela banyambi bashenge, hinge kubatendela milimo, ngayi mwanga mwikalenga mu litunga napanine bankakazenu. Ngoboni shilolo munyuvwilile hinge kunyombatala.

¹⁶ Bazukulyendi Yonandabe mwana Lekabe, banalama ndayano eze abapanine nkakayabo, ngoboni enu kushinga kunyuvwa mufwako.

¹⁷ Haya Nyambi wa Makunge, Nyambi wa Ishalela ukwamba ngayi, “Nikaleta makando nimwawo aya natoyele ha bantu nimwabo ba Yunda na baya bali mu Yelushalema. Nambile kukwabo, ngoboni kaliha banyuvwile. Nabehanine ngoboni kaliha bankumbwile.”

¹⁸ Yelemiya niho ambile ku bakalivumo lya Lekabe ngayi, “Eshe nisho akwamba Nyambi wa Makunge, Nyambi wa Ishalela ngayi, munalama ndayano za nkaka yenu Yonandabe, kami munakonko kufundiziza kwendi nimwako na kutenda ebye nimwabyo amitongwezele.

¹⁹ Haya Nyambi wa Makunge, Nyambi wa Ishalela ukwamba nehi ngayi, ku mukoka wa Yehonandambu mwana Lekabe, shikati nimwasho kukekalanga umo akantendelenga milimo.”