Yelemiya 32 - Libuka Lya Kuyela

Yelemiya ukulanda Mfuba

¹ Nyambi ya Ngula wambile kuli Yelemiya mu mwaka wawulikumi wakulela kwa Zendekiya mwene wa litunga lya Yunda, ou kami wengile mwaka wawulikumi na mutanu na yihatu wa mwene Nembukandineza waku Mbambiloni.

² Hashikati shiyo banzita ba mwene waku Mbambiloni bazingulukile Yelushalema na muluwe Yelemiya bamushinkililile mu shipango sha bakakulama eshe shekalile mu musheke wa mwene wa Yunda.

³ Mwene Zendekiya wamu Yunda wayakile Yelemiya mu tolongo na ku mwambila ngayi, “Kati shumangani ukulubulwila na kwamba ngayi, ‘Nyambi ya Ngula wambile ngayi monenu, nikapanika luno lukena ku liboko lya mwene waku Mbambiloni, pe ukalushimba.

⁴ Mwene Zendekiya kukapanza ku maboko a baka Mbambiloni ufwako, ngoboni ukapanikiwa kuli mwene wa Mbambiloni, ukamumona lupala na lupala kami ukamba nendi meho na meho.

⁵ Nyambi ya Ngula ukwamba ngayi Zendekiya ukatwaliwa ku Mbambiloni, ukekalako kutwala noho nikamizingula, hinge ndi ukulwisha kuka batwesha ufwako.’”

⁶ Yelemiya wambile ngayi, “Nyambi ya Ngula wambile kukwami ngayi,

⁷ ‘Mona, Hanamelu mwana Shaluma kanyantu kobe ukwiza kukwobe na kwamba ngayi, Landa mfuba yami eye yili ku Anatoti mu litunga lya Mbenjamani. Uku fwanina kuyilanda, ndaba uli na ngovu za kuyikona na kuyikuliza ngayi yikale ku lupashi.’

⁸ Niho mufwala Hanamelu ezile kukwami mu shipango sha bakakulama ngonehe ambile Nyambi ya Ngula, pe wambile ngayi, ‘Landa mfuba yami eye yili ku Anatoti mu litunga lya Mbenjamani. Uku fwanina kuyilanda, ndaba uli na ngovu za kuyikona na kuyikuliza ngayi yikale ku lupashi.’ Niho nalimukile ngayi Nyambi ya Ngula unamba kukwami.

⁹ Nalandile eye mfuba yekalile ku Anatoti kuli mufwala Hanamelu na kumufwanikizila mali, yapitile ndando ya kumine ku likumi na mutanu na abili a muwayawaya wa shiliva.

¹⁰ Natikitileko lizina lyami na kukantako ku lipepa lya ndando, nehanine bapaki nakufwanikiza mali ha bipimisho.

¹¹ Niho nashimbile liñwati lya ku shinka elye lyekalile na mazu a ndando ya mfuba na liñwati lyamina lya kufwikulula.

¹² Napanine mañwati kuli Mbaluki mwana Neliya na muzukulya Mahesheya na mupanikilelyo ku meho a mufwala Hanamelu naku meho a bapaki aba batikitile mazu a ndando naku meho a Bayunda nimwabo aba bekalile mu shipango sha bakakulama.

¹³ Ku meho wabo nimwabo nambilile Mbaluki ngayi,

¹⁴ ‘Nyambi wa Makunge, Nyambi wa Ishalela unamba ngayi, shimba elye liñwati lya kufwika na liñwati lya kufwikulula na kuwayaka mu ntesho ya lima, ngayi mwanga alamiwe shikati shashitali.

¹⁵ Nyambi wa Makunge, Nyambi wa Ishalela, unamba ngayi, matala na mafuba na mafuba a mikolobozi ya shinyanca akalandiwanga kami mu litunga lino.’ ”

Yelemiya ukulombelela ku yuvwishisha

¹⁶ “Oho napanine Mbaluki mwana Neliya mañwati a ndando nalombelele ngayi,

¹⁷ obe Nyambi ya Ngula, obe walengele mayilu na hano hanci na ngovu zobe zazinene na liboko lyobe. Kowa shuma shashikalu kukwobe.

¹⁸ Unamoneshe nceshe zobe za mwaya myaka ku makulukazi, ngoboni washushulanga bantu ndaba ya wubi wa bahemi babo. Obe Nyambi wamunene wa ngovu shikuma. Lizina lyobe Nyambi wa Makunge.

¹⁹ Wayongolanga byuma byabinene na kutenda byuma bya kukomokesha, meho aku mona ntendelo ya bantu nimwabo, wapananga ncuungu ku muntu na muntu kuya na biheka byendi naku mikabo ya ntendelo yendi.

²⁰ Obe watendele bilimukisho na bikomokesho mu Engepita, kami nilelo nehe mu Ishalela na mikoka nimwayo. Haya nehe wenga wakulimukiwa mu kaye nimwamo kuti na kuti.

²¹ Wafumishile Baishalela mu litunga lya Engepita na bimonekesho na bikomokesho na liboko lyobe lya kutandubuka na lya kutinisha shikuma.

²² Pe wabapanikile lino litunga elye wakulupishile bankakazabo ngayi ukabapanalyo, litunga likukunkula mahwe na wushi.

²³ Oho bakumine mu lino litunga bekalilemo, ngoboni kaliha bombatalile mazu obe hinge kukonka ndayano zobe. Nohobene unabaletele wukalu nimwawo ou hahabo.

²⁴ “Monenu, bamalamo bazingulukakale lukena ngayi balukone, pe ndaba ya nzita na kapande na wulweli, lukena lwapanikiwakale mu maboko aba Mbambiloni aba bali na kululwisha, pe nimwabyo wambile binengi bya kupwisha.

²⁵ Ngoboni obe mwene Nyambi ya Ngula, wantongwezele ngayi, ‘Nilande mfuba hambili ya bapaki hinge ndi olu lukena bakalukona baka Mbambiloni.’ ”

Nyambi ukukumbula Yelemiya

²⁶ Nyambi ya Ngula niho ambile kuli Yelemiya ngayi,

²⁷ “Mona ami Nyambi ya Ngula, Nyambi wa bantu nimwabo, kati kwekala shuma shashikalu kukwami ndi?

²⁸ Nili na kupanika olu lukena mu maboko a Nembukandineza mwene wa Mbambiloni banzita bendi ngayi balushimbe.

²⁹ Baka Mbambiloni aba bali na kulwisha luno lukena, bakeza na kuluhokesha, hamo na matala owo ha biluli byawo bakombelelanga incence kuli Mbaalu na nkombela ya mwitilila ku banyambi bamina, ngayi bashonkomone kupilama kwami.

³⁰ Nyambi ya Ngula ukwamba ngayi, kufuma ku kutatika bantu bamu Ishalela na bantu bamu Yunda banatende byabibi, banampilamishi.

³¹ Olu lukena lu nashonkomononga kupilama na wukali wami, kufuma ha mutena lwa zikiwile kuleta naku mutena walelo, nibyo nikushinga kulufumisha ku meho wami,

³² ndaba ya byabibi nimwabyo batendele bantu ba Ishalela na bantu ba Yunda ha ku shonkomona kupilama kwami, bamyene zabo na bana ba bamyene zabo na bakankombela babo na bamiluwe babo na bantu bamu Yunda hamo nanobo bekala mu Yelushalema.

³³ Banampenzeshe mongo, hinge ndi nazaminine kubalongesha, ngoboni kaliha banyuvwile hinge ndi kwombatala ku longesha kwami.

³⁴ Bayakile bya wunyengwe mu Litala lya kutumbiwa na lizina lyami na kulizilula.

³⁵ Bazikilile Mbaalu tuula mu mukulo wa Hinoma, mu kupehelela bana babo babalume hamo nanaba ba bambuyama kuli nyambi Moleki, hinge ndi kaliha na batongwezele kutenda noho, hinge kwikala na bihanganiko bya noho mu mutima wami, ngayi batende byuma bya wunyengwe nehe biya byaleteshele Yunda kutenda wubi.”

Shikulupisho sha Kulumbeza

³⁶ Nyambi ya Ngula, Nyambi wa Ishalela ukwamba ha lukena olwe muli na kutoya lunapanikiwi mu maboko a mwene wa Mbambiloni ndaba ya nzita na kapande na wulweli ngayi,

³⁷ “Haya mona, nika kungulula bantu kubafumisha ku matunga nimwawo kuyo nabapanzanishile hinga napilama, hamo na wukali, haya nikababwesha ku mwanya uno nikabekalisha mu ku mwena.

³⁸ Bakenga bantu bami, kami nami nikenga Nyambi yabo.

³⁹ Nikabapanika mutima umo na nyinkalo yimo, ngayi mwanga bakantinenga shikati nimwasho nohobene nibo hamo na banababo bakekala shiwahe.

⁴⁰ Nikalimama nabo kulimama kwa mwaya myaka. Kukaleha kubatendela byuma byabiwahe nifwako, kami nikayaka mu mitima yabo bowa wakuntina, kami ku nciya bafwako.

⁴¹ Nikawahilila ha kubatendela byuma byabiwahe, pe nikabazikisha mu litunga lino na mutima wami nimwawo na moyo wami nimwawo.”

⁴² Nyambi ya Ngula ukwamba ngayi, “Ngonehe nalete makando nimwawo ha bantu aba, nisho eze nikabaletele wuwahe nimwawo uya naba kulupishile.

⁴³ Mafuba akalandiwa muno mu litunga muli na kutoya ngayi, mapembe mwakubula bantu hinge kayamana, kami ngayi likapanikiwa ku maboko a baka Mbambiloni.

⁴⁴ Bantu bakalanda mafuba, pe bakatikita mañwati akutontolola zindando, akatikitiwa na kwitabilishiwa na bapaki. Ebye bikatendiwa mu litunga lya Mbenjamani, mu minzi yazinguluka Yelushalema namu minzi ya Yunda na minzi ya Shefwela namu minzi ya Nengembu, ndaba nikababweshela ku shoboloka kwabo.” Eshe nisho anamba Nyambi ya Ngula.