Yelemiya 31 - Libuka Lya Kuyela

Ishalela ukuboka kukwabo

¹ Nyambi ya Ngula ukwamba ngayi, “Ku shikati shiyo nikenga Nyambi ya mikoka ya Ishalela, kami nibo bakenga bantu bami.

² Bantu bayo bapulukile ku nzita na bayuvwilile nceshe mu libelelengwa, oho Baishalela bashingile kukatala.”

³ Naliholwele kukwendi hahatali na kwamba nendi ngayi, “Obe Ishalela na kuhakilenga na shishemo sha mwaya myaka, nohobene namoneshanga kulunga kwami kukwobe.

⁴ Obe kankanga Ishalela, nika kutendulula kami, pe ukenga wakutendululiwa. Niho ukapakata tuncingili twobe, ukaya na ku shinda nanobo ba ku wahilila.

⁵ Niho kami mukatampika mafuba a shinyanca ha mapili a Shamaliya, kami bandimi bakayitampika na kulikuwa mikabo yakwo.

⁶ Ndaba kukekala mutena oho bakakulama bakabilika mu litunga lya binkanda lya Efulemu ngayi, ‘Yekenu kuno, tukakankalale ku lipili lya Ziyoni, kuli Nyambi ya Ngula, Nyambi yetu.’ ”

⁷ Nyambi ya Ngula ulinakwamba ngayi, “Ishalela yimbilenu na kutangala, wulumwinenu kuli wamunene shikuma ku matunga nimwawo, lwimbo lwenu lwa kuyemeza luyuvwanike, na kwamba ngayi, ‘Nyambi ya Ngula unapulwishi bantu bendi, Enu bantu bamu Yunda mashaliza a Baishalela.’

⁸ Monenu, nikabafumisha ku litunga lya ku ncelele, nikaba kungula kubafumisha kwakumina kaye nimwako. Batushishitwa na bihole bakeza nabo, hamo na bambuyama bakamavumo, nanaba bali hahepi na kubeleka, bakabokela kuno mu muhoko wawunene.

⁹ Bantu bami bakaboka hibalila, na kulombela nikabendesha kutushinzi twamema, mu nzila ya kulembuka omu bakabula kulituntula, ndaba nengi tata Ishalela, Efulemu unengi mwanami wa mweli.

¹⁰ Yuvwenu lizu lya Nyambi ya Ngula enu matunga, kami bilikenubyo ku baya bali mu bikuli bya kwakutali, pe mubatongweze ngayi, ‘Ou wapanzanishile Ishalela, ukamikungula kami na kumi lama ngo mulishani wa bambelele alamanga litanga lyendi.

¹¹ Nyambi ya Ngula ukakuliza Ishalela, na kubafumisha ku maboko anowo uli na ngovu za kumupitakana.

¹² Bakeza na kwimbila nyimbo za ku wahilila ha lipili lya Ziyoni bakawahilila na byuma bya Nyambi ya Ngula byabiwahe, hamo na mpeka, na waine na mazi a olive, kami na ha matanga a bana ba bambelele nanawa a zingombe. Wumi wabo ukafweka ngo mfuba bayitililanga mema, kukamona makando kami bafwako.

¹³ Batunkanga bakashinda na ku wahilila, bakulwane babalume hamo na bandumbana bakawahilila. Nikafutula mbingo zabo mu kutangala, nikafutula wunginga wabo kwinga ku wahilila.

¹⁴ Nikekutisha bakankombela na byakulya byabiwahe shikuma, kami bantu bami bakekala na byuma nimwabyo bakashinga.” Eshe nisho anamba Nyambi ya Ngula.

Nceshe za Nyambi ya Ngula hali Ishalela

¹⁵ Nyambi ya Ngula unamba ngayi, “Lukuwa lunayuvwaniki mu Lama, mbingo na kulila shikuma, Lakele uli na kulila bana bendi unakukana kumubengezeka ndaba bana bendi banafu.”

¹⁶ Nyambi ya Ngula ukwamba ngayi, “Mwena, likunkumune mihozi, ndaba milimo yobe ukayitambwila ncuungu, pe bakafuma mu litunga lya bamalamo.

¹⁷ Kuli kulumbeza kumbili kami banabobe bakaboka ku litunga lyabo. Eshe nisho anamba Nyambi ya Ngula.”

¹⁸ Nayuvwu bantu ba Efulemu hibalihohoma, ngayi, “Obe Nyambi ya Ngula twengile ngo tuyamana twa kubula kutambisha, ngoboni watulongeshele kwombatala. Tuboke kukwobe, obe Nyambi ya Ngula, obe Nyambi wetu.

¹⁹ Twafumine kukwobe, ngoboni nehi tulinakushinga ku boka. Kunyima ya kutushushula, twabweshamokale mitima na kuyena. Twayenishiwile na kuhanduliwa ndaba twatendele wubi, shikati sha wanuke wetu.”

²⁰ Efulemu obe mwanami wakuhakiwa, obe mwana nahaka shikuma. Oho nikukukeyesha na kuhanganikanga na shishemo, mutima wami wambwatukilanga hahabo, nikekala na nceshe hahobe.

²¹ “Yakenu bilimukisho bya nzila, tetenu luteta, hanganikenu shiwahe nzila iya mwashiyile mwaka. Bokenumo enu bantu ba Ishalela, bokenu ku minzi yenu mwashiyile.

²² Mu kacincazala shikati sha kukuma hati enu bantu bakubula kukulupila Nyambi ya Ngula walengakale shuma shashipya hano hanci, sha kufweka ngonehi mukazi alame mukokwendi.”

Kutangama kwa bakanyambi kwa kumbili

²³ Nyambi wa Makunge, Nyambi wa Ishalela ukwamba ngayi, “Oho nikabwesha wuwahe wabo ku litunga lyabo, bakamba kami ku litunga lya Yunda, hamo na minzi yalyo ngayi, ‘Nyambi ya Ngula afuywele lipili lya kuyela lya Yelushalema, na mwanya omu ekala.’

²⁴ Bantu bakazika mu Yunda namu minzi yamo nimwayo, kami kukekala bandimi na balishani hamo na matanga wabo.

²⁵ Nikakwangulukisha baya banakwanga na kupana byakulya muntu nimwendi napopo ku nzala.

²⁶ Niho nabazumukile ha tulo napenzele noku na noku tulo twatobalile.”

²⁷ Nyambi ya Ngula ukwamba ngayi, matena akeza oho nikavulisha bantu na batuyamana, mu litunga lya Ishalela na Yunda.

²⁸ Ngonehe na balaminenga ha shikati sha kubafumisha mu litunga na ku bazula na ha shikati sha ku bayuvwisha kukola, nohobene nikabalama ha shikati sha ku batampika na sha ku batangamisha. Eshe nisho anamba Nyambi ya Ngula.

²⁹ Matena ayo oho akakuma, bantu kukamba bafwako ngayi, “Bahemi banali mikabo ya shinyanca yayishashu, ngoboni mayewe a banababo, niwo ali na muwewe.”

³⁰ Ngoboni muntu nimwendi ukafwa ndaba ya wubi wendi, ou ukalya mikabo ya shinyanca yayishashu, ukekala na muwewe ku mayewe.

³¹ Nyambi ya Ngula ukwamba ngayi, “Monenu, Shikati shikeza, oho nikalimama na kulimama kwakupya na bantu ba Ishalela na Yunda.

³² Kukalifweka ngonehe kulimama kuya nalimamine na bankakazabo oho na bakwatile na liboko, ha kubafumisha mu litunga lya Engepita kufwako. Hinge ndi nengile ngo mukokwabo, ngoboni kaliha balamine kulimama kuya nalimamine nabo.

³³ Oho shikati shiyo shakakumina, Nyambi ya Ngula ukwamba ngayi, nikalimama na Ishalela nehe, nikayaka mazu wami mumwabo na kuwatikita mu mitima yabo. Nikenga Nyambi yabo kami nibo bakenga bantu bami.

³⁴ Kowa muntu ukalongesha ndambo yendi, kami kowa ukatongweza minendi ngayi, ‘Limuka Nyambi ya Ngula,’ ndaba nimwabo bantu, ku balika ku wamushe, kutwala ku wamunene bakandimuka. Ndaba nikayatila milandu yabo, kami kukanuka wubi wabo nifwako. Eshe nisho anamba Nyambi ya Ngula.”

³⁵ “Nyambi ya Ngula wengishanga mutena ngayi uholole mwaana, na kwingisha ngonda na nyenye ngayi biholole wezi shikati sha wushiku. Wankwancanishanga liwate ngayi kwikale mankanyi, lizina lyendi Nyambi wa Makunge.

³⁶ Ukukulupisha ngayi ufwako kukavulama ndayano zendi, pe Ishalela ukekala mwaya myaka.”

³⁷ Nyambi ya Ngula ukwamba ngayi, “Ndi muntu ukutwesha kupima mayilu, hinge ndi mwimbi hano hanci, pe nikatwesha kukana bazukulya Ishalela nimwabo,” hanebye nimwabyo banatende.

³⁸ Monenu, matena akeza, oho lukena lwa Yelushalema bakalutendulula kwinga lukena lwami, ku balika ku kapeshi ka Hananela, kukakuma naku lipangati lya ku nkomi.

³⁹ “Nginza yikapita ku mponci, ku shinkanda sha Ngalembi, yikazinguluka kukakuma na ku Ngowa.

⁴⁰ Mukulo nimwawo kuya bafundilanga na kuyumbilamo mutoko na mukulo nimwawo wa kashinzi ka Kindiloni, kukakuma na ku lipangati lya bambishi ku mushamuko. Eye mbalila nimwayo, kukwami yikenga ya kuyela. Yelushalema kulobeshiwa hinge, kukanyemuniwa afwako.”