Yelemiya 30 - Libuka Lya Kuyela

Shikulupisho sha Nyambi ya Ngula ku bantu bendi

¹ Nyambi ya Ngula Nyambi wa Ishalela wambile kuli Yelemiya ngayi,

² “Tikita mu libuka mazu nimwawo awa ninakutongweze.”

³ Monenu, matena akeza, oho nikafumisha bantu bami ba Ishalela na Yunda mu wuntapwa na kubabwesha mu litunga liyo napanine bankakazabo, mwanga bakekalemo. Eshe nisho anamba Nyambi ya Ngula.

⁴ Awa niwo mazu ambile Nyambi ya Ngula ha Ishalela na Yunda,

⁵ “Ninayuvwu kulila kwa mutentu, kunengi kulila kwa bowa, kaliha ngayi kwaku mwena.

⁶ Haya mwenenu, muhanganike. Kati mulume, ukutwesha kwimita na kubeleka mwana ndi? Shumangani niku mona mulume nimwendi hinga akwatilila ha zintungi, ngonehe mbuyama ukushinga kubeleka. Kati shumangani zimpala zabo zinatubuluku?

⁷ Makando tawee! Mutena wakutinisha ukeza, kowa mutena wamina ukalyezeka nawo. Shikenga sha makando ku bazukulya Yakobo, ngoboni bakapuluka ku waya makando.”

⁸ Nyambi wa Makunge ukwamba ngayi, “Oho mutena uya wakakuma, nikapokola mpongoho iya mu zincingo zabo na kuketula mawenge wabo. Bayeni kuka baheta bafwako.

⁹ Ngoboni bakatendela milimo Nyambi ya Ngula, Nyambi yabo na muzukulya Ndavita ou nikabapanika kwinga mwene wabo.”

¹⁰ Nyambi ya Ngula ukwamba ngayi, “Obe mukamulimo wami Yakobo hinga utina hinga kutampwishiwa obe Ishalela, ndaba mona taha, nika kupulwisha na ku kufumisha ku litunga lya kwakutali, na bazukulyobe nikabafumisha ku litunga oku bekalilenga mu wuntapwa. Yakobo ukaboka kami ukekala shiwahe na kwikala mu ku mwena pe kowa muntu ukakutinisha kami.

¹¹ Nilihamo nanenu na kumipulwisha, eshe nisho akwamba Nyambi ya Ngula, nikalobeshelelela matunga nimwawo muya nakupanzanishilile ngoboni obe kuka kulobesha nifwako, nika kushushula ngoboni nikakweshekela kaliha nika kuleha ngayi uye kwakubula ku shushuliwa.” Eshe nisho anamba Nyambi ya Ngula.

¹² Nyambi ya Ngula ukwamba nehi ku bantu bendi ngayi, “Kulemana kwobe kuna kwangana kupangiwa, shitombo shobe shengakale mbongola.

¹³ Kowa wakwimanina shambo shobe, kowa wanga wakupangisha shitombo shobe, kukatwesha kupola wufwako.

¹⁴ Bakashikonzi bobe banakuvulama, kukufulankana bafwako, na kukama ngonehi akamanga kamalamo, na kushushulu ngo muntu wanguma, ndaba wubi wobe wawunene, kami Kubipisha kwobe kunavulu.

¹⁵ Shumangani ukulilila ha kulemana kwobe? Kukola kwobe kutwesha kupangiwa kufwako. Ndaba wubi wobe wawunene, ndaba Kubipisha kwobe ku navulu, natende kukwobe byuma ebye.

¹⁶ Nohobene aba nimwabo ba kukulobesha nanibo kami bakalobeshiwa, kami bamalamo bobe nimwabo bakatwaliwa mu wuntapwa, aba ba kupukulanga bakapukuliwa kami.

¹⁷ Nikamikalika kami mu wuwahe. Nikapolesha bitombo byenu, hinge ndi bamalamo benu bakwamba ngayi, ‘Ziyoni nengi wakukendiwa, kowa nanowu ukumufulankana.’ ” Eshe nisho anamba Nyambi ya Ngula.

¹⁸ Nyambi ya Ngula ukwamba ngayi, nikabwesha bantu bami ku litunga lyabo lya Ishalela, kami nikekala na shishemo ku mapashi wabo. Lukena lwa Yelushalema lukawahishiwa aha nimwaho luna bipi, na musheke ukemana aha wekalilenga mwaka.

¹⁹ Bantu balimo, bakayimbila nyimbo za kukambilila, kukekala mushumina waku wahilila. Nikabengisha babengi, kukashepa bafwako. Bitandalisho byami bikabaletela maleema.

²⁰ Banababo bakekala ngonehe bekalilenga mwaka, bakatangama ku meho wami pe bikungulukilo byabo bikashumishiwa nikashushula nimwabo bakabayandisha.

²¹ Mukakubatwaminina ukafuma mu litunga lyabo, kalela ukafuma mukatikabo. Nikamuleta hahepi, pe ukahenyena kukwami. Kati yani ukutwesha kuhenyena kukwami niyemwine? Eshe nisho anamba Nyambi ya Ngula.

²² Mukenga bantu bami, Nami nikenga Nyambi yenu.

²³ Nkuli ya Nyambi ya Ngula, yikeza na wukali wendi, ngonehe kakundukundu, nkuli yikakama ha mitwe ya bantu bakuluwa.

²⁴ Nkuli ya wukali wa Nyambi ya Ngula, kukaboka nahiya kwakubula kutenda shifungo sha Nyambi yifwako. Mu matena amamaninino mukayuvwishisha byuma ebye.