Yelemiya 3 - Libuka Lya Kuyela

Kubula kulunga kwa ba Ishalela

¹ Nyambi ya Ngula ukwamba ngayi, “Ndi mulume ukulubula mukazendi, pe uya mbuyama ha kuya na kuyekiwa ku mulume wamina, kati ukutwesha kumubwesha kami ndi? Byo, ndaba litunga likenzala na biheka byabibi? Ngoboni obe Ishalela unakwata banjenge babengi haya niho kami uli na kushinga kuboka kukwami ndi?

² Penza meho wobe ku binkanda byatuyelele, kati kuli mbalila yimo unabulu kutendela wunjenge ndi? Wabelamininenga banjenge kunkumo ya nzila ngonehe kapondwa wa Kaalembiya ukubelamina muntu mu libelelengwa ngayi amukwate. Munabipishi litunga na lwiholwiho lwenu.

³ Nohobene ebye nibyo binakwangishi na mvula ngayi aloke, hinge mbundu yawanga mupepo naniyo kowa, ngoboni obe ku meho obe uku moneka kwinga waku wahilila na biheka bya wunjenge, kuyuvwa lisheni ufwako.

⁴ “Pe haya hano ulinakwamba kukwami ngayi, ‘Tate, obe wambengezekelenga oho nishili kanuke.

⁵ Kati ukakaliha shikati nimwasho ndi? Kati ukapilama shikati nimwasho ndi?’ Ishalela ebye nibyo wambanga, ngoboni watendanga wubi nimwawo ukutwesha.”

Ishalela na Yunda banafwanini kutenguluka

⁶ Matena a kulela kwa mwene Yoshiya, Nyambi ya Ngula wambile kukwami ngayi, “Nka unamono ebye anatende Ishalela wakubula kukulupila? Unakankalala ha binkanda byabitali na mu nceto ya mitondo ya mibombola nimo atendela wunjenge.

⁷ Pe Ami Nyambi ya Ngula nahanganikile ngayi, ‘Ishalela aha anatende ebye nimwabyo, ukaboka kukwami.’ Ngoboni kuboka wufwako, pe kami nanou kawushinda wendi Yunda wakulungwa unabimono.

⁸ Napanine Ishalela wakubula kukulupila, liñwati lya kumulubwisha, pe niho namutandile ndaba ya ku haka wunjenge. Pe kawushinda wendi Yunda kaliha wekalile na bowa, ngoboni naniye kami watendele wunjenge.

⁹ Kaliha waliyuvwile lisheni, wabipishile litunga oho atendelenga bya wunjenge ha kulemesha mamanya na bitondo.

¹⁰ Ngoboni hanebye nimwabyo naniye kami Yunda wa mahalo kaliha wabokele kukwami na mutima wendi nimwawo, ngoboni wambashaminine.” Eshe nisho anamba Nyambi ya Ngula.

¹¹ Nyambi ya Ngula niho antongwezele ngayi, “Ishalela wakubula kukulupila unamoneke kwikala na mulandu wawushe kupitakana Yunda wa mahalo.”

¹² Nyambi ya Ngula wantongwezele kuya mu kubilika awa mazu ku ncelele ngayi, “Boka obe Ishalela wakubula kwoloka, ndaba Ami nili wanceshe, kuka kupenza na wukali nifwako, kami kuka kupilamina mwaya myaka nifwako.

¹³ Unafwanini kulitabila milandu yobe, unafutamini Nyambi ya Ngula, Nyambi yobe, unahololo shishemo shobe ku banyambi bashenge mu nceto ya mutondo nimwawo wa mubombola, pe shilolo wombatale mazu ami.” Eshe nisho anamba Nyambi ya Ngula.

¹⁴ Nyambi ya Ngula ukwamba ngayi, “Bokenu kukwami enu bana bakubula kukulupila ndaba Ami hekulyenu. Nikafumisha umo mu lukena na kufumisha babili ku lupashi lwabo, pe nikabaleta mu Ziyoni.

¹⁵ Nikamipanika batulela baya bakanyombatala, pe bakamitwaminina na ngana na kanangatima.”

¹⁶ Nyambi ya Ngula ukwamba ngayi, “Ha matena ayo oho mwavulakale shikuma mu litunga, bantu bafwako kukamba bya Likwati lya Kulimama. Kukalihanganika bafwako hinge kulyanuka, kami kukekala na shitima hahabyo bafwako, pe bafwako kukalitenda.

¹⁷ Ha shikati shiyo, bakatoya Yelushalema ngayi, niye litanda lya Nyambi ya Ngula. Pe matunga nimwawo akakungulukila mu Yelushalema na kulemesha Nyambi ya Ngula, pe kowa baya eze bakatende biheka bya kuluwa kwa mitima yabo yayikalu.

¹⁸ Ha matena ayo, baka Yunda bakaliwanika hamo na baka Ishalela. Nimwabo bakeza hamo kufuma ku matunga aku ncelele bakaya mu litunga liya napanine bankakazabo kwinga likona lyabo.”

Bantu ba Nyambi bakulemesha tunankishi

¹⁹ Nyambi ya Ngula ukwamba ngayi, “Ishalela, eshe niku wahilila kukwinga ngonehe mwanami na kukupana litunga lyaliwahe, liya likona lyaliwahe shikuma, mukaye nimwako. Nahanganikile ngayi, ukantoya ngayi, ‘Tate’ pe kami kukamfutamina ufwako.

²⁰ Ngoboni, ngonehe mbuyama wakulungwa, ashiyanga mukokwendi, nanobe kami Ishalela uli wakubula kulungwa kukwami.” Eshe nisho anamba Nyambi ya Ngula.

²¹ Lukuwa lwa kulila lunayuvwaniki ha binkanda byatuyelelele, niko kupwezuma na kulambilila kwa bana ba Ishalela. Bali mu zinzila za kuluwa, banavulama Nyambi ya Ngula, Nyambi yabo.

²² “Tengulukenu enu bantu bamafutufutu, pe nikamiyatila ha kuluwa kwenu.” Etu bano, ndaba Nyambi ya Ngula, obe Nyambi yetu.

²³ “Mwa shikuma, kulemesha tunankishi ha binkanda naha mapili kwenga kulemesha kwa mahalo. Mwa shikuma, kupulwishiwa kwa Ishalela kuli muli Nyambi ya Ngula, Nyambi yetu.

²⁴ Ku balika kuwanuke wetu, kulemesha banyambi bawunyengwe, kunamanishi mikabo ya litengela lya batatizetu, matanga abo a bambelele na bampongo na zingombe na bana babo babalume na ba bambuyama.

²⁵ Tunafwanini kulala hanci ndaba ya lisheni. Tunafwanini kuyena shikuma, ndaba etu na batatizetu, ku balika kuwanuke wetu, kukuma naku mutena uno, tunatende wubi kuli Nyambi ya Ngula, Nyambi yetu, shilolo twombatale lizu lya Nyambi ya Ngula, Nyambi yetu.”