Yelemiya 29 - Libuka Lya Kuyela

Liñwati lya Yelemiya ku Bayunda bamu Mbambiloni

¹ Muluwe Yelemiya watumine liñwati kufuma ku Yelushalema, lyayile ku bakulwane bekalile mu wuntapwa naku bakankombela na bamiluwe na ku bantu nimwabo baya Nembukandineza afumishile mu Yelushalema na kubatwala mu wuntapwa ku Mbambiloni.

² Lyatikitiwile oho mwene Yehoyakini na bamandiyendi na babilolo na bakakutwaminina Yunda na Yelushalema na bakakubaza bamanono na bamfuzi oho bafumakale mu Yelushalema kuya mu wuntapwa.

³ Liñwati walipanine kuli Elisa mwana Shafwani na Ngemaliya mwana Hilikiya, aba nibo Zendekiya mwene wa mu Yunda atumine kuli mwene Nembukandineza ku Mbambiloni. Liñwati lyatikitiwile ngayi,

⁴ “Ebye nibyo akwamba Nyambi wa Makunge, Nyambi wa Ishalela ku bantapwa nimwabo baya banafumu ku Yelushalema bali mu Mbambiloni ngayi,

⁵ ‘Zikenu matala mwanga mwikalengamo. Limenu mafuba, ngayi mulye ebye bikumenamo.

⁶ Yekenu bambuyama, mwanga mwikale na bana pe yitabilishenu banabenu babalume naba babambuyama nanibo bayeke na kuyekiwa ngayi mwanga bekale na bana. Munafwanini kuhemununa ngayi muvule hinga mushepa.

⁷ Munafwanini ngayi mutende milimo yayiwahe ku litunga omo ninamitwala mu wuntapwa. Lombelelenu ziya zinkena kuli Nyambi ya Ngula, ndaba ndi litunga likamwena, pe nanenu mukatangama.

⁸ Nyambi wa Makunge, Nyambi wa Ishalela ukwamba ngayi, hinga mwitabila ngayi bamyongeze bamiluwe, hinge bakakwawula obo bali mukatikenu. Hinga mutwala bihanganiko ku milo yabo, eye ba kulota,

⁹ ndaba bali na kumi lubulwila bya mahalo mu lizina lyami. Kubatuma nifwako.’ Eshe nisho anamba Nyambi ya Ngula.

¹⁰ “Nyambi ya Ngula ukwamba ngayi, ‘Oho myaka 70 ya kwikala mu Mbambiloni yikamana, nikamonesha kupwisha kwami kukwenu na kulama shikulupisho shami sha nceshe na kumibwesha kami ku Yelushalema.

¹¹ Ndaba nikulimuka biyongola byami hahenu. Eshe nisho anamba Nyambi ya Ngula. Biyongola bya kumitangamisha kaliha bya kumilobesha, biyongola bikamiletela kulumbeza byuma bya kumbili.

¹² Nohoboni mukanyihane na kwiza kukwami na kulomba, pe nikamiyuvwilila.

¹³ Mukancingancinga kami mukangwana, mukancingancinga na mitima yenu nimwayo.

¹⁴ Nyambi ya Ngula ukwamba ngayi, mukangwana kami nikamibweshela bitandalisho byenu na kumi kungula kumifumisha ku mikoka nimwayo naku matunga nimwawo kuya namitandilile na kumibwesha ku litunga kuyo namifumishile ha kuya mu wuntapwa.’

¹⁵ “Enu mukwamba ngayi, ‘Nyambi ya Ngula natupaniki bamiluwe mu Mbambiloni,’

¹⁶ haya yuvwililenu eshe akwamba Nyambi ya Ngula hali mwene ou nekala ha litanda lya mwene Ndavita, ha bantu nimwabo ba lukena luno, ngayi banengi bawushindawenu bantu baya mwabulile kuya nabo mu wuntapwa.

¹⁷ Nyambi wa Makunge ukwamba ngayi, ‘Monenu nikatuma mukwale na kapande na wulweli, kami nikabatenda ngo mikabo ya nkuyu ya ku bola, yayibi shikuma ha kuyilya.

¹⁸ Nikaba kulanisha na mukwale na kapande na wulweli, kami mikoka nimwayo ya hano hanci bakalikomokela ha nobyo bakamona hahabo. Nimwako oko nikabapanzanishila bantu bakalikomokela na kukanka ha ku mona bikatendiwa hahabo. Bantu bakabahengamina na ku batoya ngayi bantu ba mukuto.

¹⁹ Ebye bikamoneka kukwabo ndaba ya kubula kwombatala mazu aya nonzela kutuma kukwabo na bakamilimo bami bamiluwe, ngoboni kaliha mwayuvwililile. Eshe nisho anamba Nyambi ya Ngula.

²⁰ Yuvwililenu lizu lya Nyambi ya Ngula enu nimwenu mwa fumishiwa mu Yelushalema na kutwaliwa mu Mbambiloni mu wuntapwa.’

²¹ “Nyambi wa Makunge, Nyambi wa Ishalela ukwamba hali Ahambu mwana Kolaya na Zendekiya mwana Mayasheya, aba bali na kumi lubulwila bya mahalo mu lizina lyami, haya monenu ngayi ukabafungwila mu maboko a Nembukandineza mwene wa Mbambiloni, ou eze akabazihile ha meho wenu.

²² Bantu aba batwaliwile ku Mbambiloni mukwinga bantapwa kufuma ku Yunda, bakekala na shiheka oho bakashinga ku kuta muntu, bakamba ngayi, ‘Mwanga Nyambi ya Ngula amitende ngonehi atendele kuli Zendekiya na Ahambu, aba ahokeshele mwene waku Mbambiloni na mundilo hinga benga babomi,’

²³ ndaba banatende bya kuyenesha mu Ishalela, banatende wumambe na bakaza baminabo, kami banashimiki mazu a mahalo mu lizina lyami owo nabulile kubatongweza. Hinilimuka ebye banatende, kami nikwinga paki wakubalwisha. Eshe nisho anamba Nyambi ya Ngula.”

Liñwati lya Shemaya

²⁴ Tongweza Shemaya waku Nehelama ngayi,

²⁵ Nyambi wa Makunge, Nyambi wa Ishalela ngayi, “Obe watuma mañwati mu lizina lyobe ku bantu nimwabo ba ku Yelushalema na kuli mukankombela Zefwaniya mwana Maasheya naku bakankombela bamina ngayi,

²⁶ ‘Nyambi ya Ngula unakuhata kwinga mukankombela mu mwanya wa Yehoyanda, kwinga mukulwane wa Litala lya Nyambi ya Ngula. Mulimo wobe waku mona ngayi muntu nimwendi wakupempela ou ukuhembwiliza kwinga muluwe wa Nyambi ayakiwe mu shikulo hamo na kumuyaka mu shikongo sha shondo.

²⁷ Kati shumangani wabulile kwambila Yelemiya waku Anatoti ou waliyaka ngo muluwe wa Nyambi hakati kenu?

²⁸ Ndaba unatumu lizu kukwetu muno mu Mbambiloni ngayi, mukekala mu wuntapwa shikati shashitali pe zikenu matala mwikalemo, limenu mafuba na kulya ebye mu kulimamo.’ ”

²⁹ Mukankombela Zefwaniya walabile elye liñwati kuli Yelemiya muluwe wa Nyambi.

³⁰ Niho Nyambi ya Ngula atongwezele Yelemiya ngayi,

³¹ “Tuma lizu ku bantapwa nimwabo bali mu Mbambiloni na kubatongweza ngayi, Nyambi ya Ngula ukwamba nehi hali Shemaya waku Nehelama ngayi, ndaba Shemaya unalubululu kukwenu oho nabulile kumutuma, kami unamishwanishi ngayi mukulupile bya mahalo.

³² Nyambi ya Ngula ukwamba ngayi, monenu, nikashushula Shemaya waku Nehelama na bazukulyendi, kukekala hinge muntu umo ukayoya hakati kanaba bantu ngayi akamone byabiwahe biya nikatendela bantu bami wufwako, ndaba wamba mazu akumfutulukila.”