Yelemiya 28 - Libuka Lya Kuyela

Yelemiya na Muluwe Hananiya

¹ Mu mwaka uyabene, atatikile kulela Zendekiya mwene wa Yunda mu ngonda wa mutanu mu mwaka wawunaa, Hananiya mwana Azula, muluwe waku Ngimbiyoni wambile kukwami mu Litala lya Nyambi hambili ya bakankombela na bantu nimwabo,

² ngayi Nyambi wa Makunge, Nyambi wa Ishalela ukwamba nehe ngayi, “Napokolakale mpongoho ya mwene wa Mbambiloni.

³ Myaka yibili oho shilolo yipite nikabwesha ku mwanya uno byuma nimwabyo bya mu Litala lya Nyambi biya mwene Nembukandineza atwalile ku Mbambiloni.

⁴ Nikabwesha kami Yekoniya mwana Yehoyakimu mwene wamu Yunda na bantapwa nimwabo baya bafumine ku Yunda kuya ku Mbambiloni, ndaba nikapokola mpongoho ya mwene wa Mbambiloni, ebye nibyo akwamba Nyambi ya Ngula.”

⁵ Niho Yelemiya muluwe wa Nyambi akumbwile kuli muluwe Hananiya hambili ya bakankombela naku bantu nimwabo baya bemanine mu Litala lya Nyambi ya Ngula,

⁶ ngayi, “Kutendiwe noho. Mwanga Nyambi ya Ngula atende noho, akatende mazu analubululu kwinga akupwisha na kubwesha byuma nimwabyo bya mu Litala lya Nyambi ya Ngula byatwaliwile ku Mbambiloni na bantapwa nimwabo.

⁷ Haya yuvwilila ebye nikwamba kukwobe na ku bantu nimwabo.

⁸ Bamiluwe baya balubulwilenga kushikale, oho shikati shobe na nami shilolo shikume, bambilenga ngayi, zinzita na kapande na malweli bikeza ku matunga amengi naku wene wawunene.

⁹ Ngoboni muluwe ukulubulula bya ku mwena, ukalimukiwa ngayi mwa shikuma unatumiwi na Nyambi ya Ngula, ndele obyo anamba binamoneke.”

¹⁰ Niho muluwe Hananiya, afumishile mpongoho yekalile mu ncingo ya Yelemiya, pe wayipokwele.

¹¹ Niho Hananiya ambile hambili ya bantu nimwabo ngayi, “Eshe nisho anamba Nyambi ya Ngula ngayi, ‘Ngonehi yinapokoko eye mpongoho, mu myaka yibili, nikapokola mpongoho ya Nembukandineza mwene waku Mbambiloni eye anayaka mu ncingo ya matunga amengi.’” Niho muluwe Yelemiya afumineko.

¹² Kunyima yanebye oho muluwe Hananiya apokwele mpongoho iya yekalile mu ncingo ya muluwe Yelemiya, Nyambi ya Ngula wambile kuli Yelemiya ngayi,

¹³ “Yanga ukatongweze Hananiya ngayi, ‘Nyambi ya Ngula ukwamba ngayi, obe unapokolo mpongoho ya shitondo, ngoboni Ami nikahingishamo ya shondo.

¹⁴ Nyambi wa Makunge, Nyambi wa Ishalela ngayi, nikayaka mpongoho ya shondo ha ncingo ya nawa matunga nimwawo ngayi mwanga bakatendele milimo Nembukandineza mwene wa Mbambiloni, nikayaka na tuyamana mu ngovu zendi.’”

¹⁵ Niho muluwe Yelemiya ambile kuli muluwe Hananiya ngayi, “Yuvwilila obe Hananiya, Nyambi ya Ngula kukutuma wufwako, ngoboni unatwaminini aba bantu ngayi ba kulupile bya mahalo.

¹⁶ Haya Nyambi ya Ngula ukwamba ngayi, ‘Nikukufumisha ha kaye. Ukufwa uno mwaka, ndaba unamba bya kulwisha Nyambi ya Ngula.’”

¹⁷ Mu mwaka uyabene, mu ngonda ya mutanu na zibili, muluwe Hananiya wafwile.