Yelemiya 27 - Libuka Lya Kuyela

Yelemiya ukulikambika Mpongoho ya Zingombe

¹ Oho Zendekiya, mwana mwene Yoshiya wamu Yunda, abalikile kulela, Nyambi ya Ngula wambile kuli Yelemiya ngayi,

² “Eshe nisho ambile Nyambi ya Ngula kukwami ngayi, ‘Tenda mpongoho ya shitondo, uyakeko mikunzi ya shitumba, ulikambikeyo ha ncingo.

³ Tuma lizu ku bamyene ba ku Endoma na Mowambi na Amoni na Tile na Mwene wa Shindoni. Tuma ku maboko a bankamba babo aba banezi kuno ku Yelushalema, mu ku mona Zendekiya mwene wamu Yunda.”

⁴ Nyambi wa Makunge, Nyambi wa Ishalela ukwamba ngayi tongweza aba bankamba utongweze na bamyene babo ngayi, Nyambi ya Ngula ukwamba ngayi,

⁵ “Na nyala zami zazinene na liboko lyami lya ngovu nalengele kaye na bantu na batuyamana nimwabo bali hanci, pe nabipananga ku muntu ou uku moneka shiwahe kukwami.

⁶ Nohobene nayakakale awa matunga nimwawo mu liboko lya Nembukandineza mwene wa Mbambiloni, mukamulimo wami, kami ninayaka na batuyamana mu ngovu zendi ngayi bamutendele milimo.

⁷ Matunga nimwawo bakamutendela milimo na bana bendi na bazukulyendi, kutwala noho Mbambiloni akakomiwa. Pe matunga amengi na bamyene bangovu bakamufutula kwinga ndungo yabo.

⁸ “Ngoboni matunga aya hinge wene wakubula kulishisha kukwendi, pe aya matunga nikawushushula na mukwale, kapande na wulweli hantu napaniki Nembukandineza mwene wa Mbambiloni kuwu lobesha na liboko lyendi. Eshe nisho anamba Nyambi ya Ngula.

⁹ Hinga muyuvwilila ku bamiluwe benu hinge ku bakakubuka hinge ku bakakutontolola milo, hinge bakakukwata bapashi, hinge bamalele aba ba kumitongweza ngayi, ‘Hinga mutendela milimo mwene wa Mbambiloni.’

¹⁰ Bali na kumyongeza ba kumiletesha ngayi mutwaliwe kwakutali na litunga lyenu. Nikamitanda kami mukalobeshiwa.

¹¹ Ngoboni ndi mukoka, umo ukalishepesha kuli mwene waku Mbambiloni na kumutendela milimo, niho nikawuleha ngayi wikale mu litunga lyawo na kulimamo na kwikalamo.” Eshe nisho anamba Nyambi ya Ngula.

¹² Nambile mazu akulifweka kuli mwene Zendekiya waku Yunda ngayi, “Lishishenu kuli mwene waku Mbambiloni, mutendelenu milimo hamo na bantu bendi, pe mukayoya.

¹³ Shumangani obe na bantu bobe mukushinga kufwila mu nzita hinge kukapande hinge ku wulweli? Eshe nisho anamba Nyambi ya Ngula ngayi shikamoneka ku mukoka nimwawo uya ukubula kulishisha kuli mwene waku Mbambiloni.

¹⁴ Hinga muyuvwilila ku bamiluwe, aba bali na kumitongweza ngayi, ‘Hinga mutendela mwene waku Mbambiloni milimo,’ ndaba bali na kulubulula bya mahalo kukwenu.

¹⁵ Nyambi ya Ngula niyemwine unamba ngayi, ‘Nabulile kubatuma, bali na kulubulula bya mahalo mu lizina lyami, nohobene nikamitanda pe mukaloba hamo na bamiluwe aba bali na kulubulula bya mahalo.’ ”

¹⁶ Niho nambile ku bakankombela naku naba bantu nimwabo ngayi, Nyambi ya Ngula unamba ngayi, “Hinga muyuvwilila ku bamiluwe aba bakwamba ngayi bikwatilo bya mu Litala lya Nyambi wuluno biboke kufuma ku Mbambiloni. Bali na kumyongeza.

¹⁷ Hinga mubayuvwilila, tendelenu milimo mwene waku Mbambiloni ngayi muyoye. Shumangani luno lukena lukufutukila mapembe?

¹⁸ Ndi banengi bamiluwe ba kupwisha ba Nyambi ya Ngula, kami ndi bali na mazu a Nyambi ya Ngula pe shashiwahe balambililenga Nyambi wa Makunge, ngayi byuma biya bya shala mu Yelushalema mu Litala lya Nyambi na mu musheke wa mwene wamu Yunda hinga bikatwaliwa ku Mbambiloni.

¹⁹ “Nyambi wa Makunge ukwamba ha zimpangwa na lizawo na bikakambwa hamo na bikwatilo byamina bya mu Litala lya Nyambi ya Ngula byashiyiwile muno mu lukena,

²⁰ obyo abulile kutwala Nembukandineza mwene waku Mbambiloni, oho atwalile Yehoyakini mwana Yehoyakimu mwene wa Yunda mu wuntapwa ku Mbambiloni kumufumisha ku Yelushalema, hamo na babilolo nimwabo bamu Yunda na mu Yelushalema.

²¹ Yuvwililenu kunebye nikwamba, Ami Nyambi wa Makunge, Nyambi wa Ishalela ha byuma ebye bya shala mu Litala lyami hamo namu Yunda na Yelushalema,

²² pe bikatwaliwa ku Mbambiloni na kwikala kuyo kutwala ku mutena oho eze nikabayuvwilile. Niho eze nikababweshe na ku batambula mu mwanya wuno. Eshe nisho anamba Nyambi ya Ngula.”