Yelemiya 26 - Libuka Lya Kuyela

Yelemiya ba kumuyatisha

¹ Oho Yehoyakimu mwana mwene Yoshiya mwene wamu Yunda, abalikile kulela,

² Nyambi ya Ngula wambile kuli Yelemiya ngayi, “Yimana mushipango sha litala lyami, pe wambe ku minzi nimwayo ya Yunda ku bantu aba bafumanga ku minzi kwiza kuno mu kulemesha. Hinga ushiyako lizu hinga limo.

³ Kampe bantu ba kuyuvwilila na ku shiya zinzila zabo zazibi, pe nikalibelula na kubula kubalobesha, ndaba ya biheka byabo byabibi.

⁴ Nyambi ya Ngula wambile kuli Yelemiya ngayi, tongweza bantu ngayi, ‘Enu munafwanini kunyuvwilila na kwenda mu mazu wami aya namipana.

⁵ Munafwanini kuyuvwilila ku mazu a bakamilimo bami bamiluwe aba natumanga kukwenu, hashikati na shikati, ngoboni enu kaliha mwombatalile ebye nambile.

⁶ Ndi kunyombatala mufwako pe nikafutula litala lino ngonehe natendele ku Shilo. Kami nikafutula Yelushalema kwinga mwanza wa kukutiwa ku matunga nimwao a hano hanci.’ ”

⁷ Bakankombela na bamiluwe na bantu nimwabo bayuvwile Yelemiya hamba byuma ebye mu Litala lya Nyambi ya Ngula.

⁸ Oho Yelemiya amanishile kwamba nimwabyo biya amutongwezele Nyambi ya Ngula ngayi ambe ku bantu nimwabo, niho bakankombela na bamiluwe na bantu nimwabo bamukwatile na kubilika ngayi, “Uku fwanina kufwa, hanebye anamba.

⁹ Shumangani unalubululu mu lizina lya Nyambi ya Ngula ngayi, ‘Elye Litala lya Nyambi likafweka ngonehe Shilo na lukena kami lukafutuka mapembe luya lukabula muntu wakwikalamo?’ Niho bantu nimwabo mu Litala lya Nyambi bazingulukile Yelemiya.”

¹⁰ Oho babilolo ba mu Yunda bayuvwile ebye byatendiwile, niho bafumine ku musheke wa mwene, bayile ku Litala lya Nyambi, pe bekalile ku bipona ku menginino a lipangati lya lipya lya ku Litala lya Nyambi.

¹¹ Niho bakankombela na bamiluwe bambile ku babilolo na ku bantu nimwabo ngayi, “Ou muntu unafwanini kufwa, ndaba uli na kulubulula bya kulwisha luno lukena, ngonehe munaliyuvwili.”

¹² Niho Yelemiya ambile ku babilolo na ku bantu nimwabo ngayi, “Nyambi ya Ngula wantumine ngayi nilubulule bya kulwisha elye Litala na luno lukena ngonehe awa mazu nimwawo munayuvwu.

¹³ Haya munafwanini kutenguluka ku zinzila zenu na zintendelo zenu, ombatalenu lizu lya Nyambi ya Ngula Nyambi yenu. Ndi mu kutenguluka ukalibelula, pe kukaleta malwa aya atoya ngayi akeza hahenu wufwako.

¹⁴ Nehiboni ami, hano nili mu maboko wenu, tendenu kukwami eshe nimwasho munamono ngayi shinafwanini, kami shashiwahe kukwenu.

¹⁵ Ngoboni mulimuke ngayi, ndi mu kunziha, enu na luno lukena na bantu nimwabo bekalamo, mukekala na mulandu wakuyita mukeza wakubula mulandu, ndaba nikwamba kupwisha, Nyambi ya Ngula niye unantumu ngayi nize na kwamba awa mazu nimwawo munayuvwu mu matu wenu.”

¹⁶ Niho babilolo na bantu nimwabo bambile ku bakankombela na bamiluwe ngayi, “Ou muntu mulandu waku fwanina kuzihiwa wufwawo, ndaba unamba kukwetu mu lizina lya Nyambi ya Ngula, Nyambi yetu.”

¹⁷ Pe bamo ku bakulwane ba mu litunga, bemanine na kwamba ku bantu nimwabo bakungulukile ngayi,

¹⁸ “Oho Hezekiya engile mwene wamu Yunda, muluwe Mika waku Molesheti walubulwile ku bantu nimwabo ebye ambile Nyambi wa Makunge ngayi, ‘Ziyoni ukalimiwa ngo mfuba, Yelushalema ukafutuka mushiinzi wa mamanya, na lipili lya zikiwa Litala lya Nyambi, likafutuka lipumbu lya kuzika.’

¹⁹ “Mwene Hezekiya na bantu bendi bamu Yunda kaliha bazihile Mika. Ngoboni Hezekiya watinine Nyambi ya Ngula na kulambilila kukwendi. Niho Nyambi ya Ngula afutwile bihanganiko byendi ha byuma byabibi biya ambile ngayi ukabileta hahabo. Haya monenu tuli na kushinga kuliletela byabibi bya kutinisha ha zinyutu zetu etu bamwine.”

²⁰ Kwekalile muntu wamina ou walubulwilenga byuma mu lizina lya Nyambi ya Ngula, lizina lyendi wengile Uliya mwana Shemaya wafumine ku munzi wa Kiliyati Yeyalima. Niye wambile bya kuhandula luno lukena na lino litunga na mazu akwinga ngo mazu ambile Yelemiya.

²¹ Oho mwene Yehoyakimu na banzita bendi na babilolo bendi bayuvwile obyo Uliya ambile, mwene washingile ku muziha. Ngoboni oho Uliya ayuvwileko, wekalile na bowa niho atininine ku Engepita.

²² Mwene Yehoyakimu watuminine Elinatani mwana Akimbo na bantu bamina kuya mu kukwata Uliya ku Engepita.

²³ Bakafumishile Uliya ku Engepita na kumutwala kuli mwene Yehoyakimu, kami ou wamuzihile mutuntu wendi wafundiwile mu bizino bya bantu nimwabo.

²⁴ Ngoboni liboko lya Ahikama mwana Shafwani lyekalile hali Yelemiya, pe kaliha wetabilile ngayi apanikiwe ku maboko a bantu ngayi bamuzihe.