Yelemiya 25 - Libuka Lya Kuyela

Kamalamo waku Ncelele

¹ Lizu lya Nyambi ya Ngula lyezile kuli Yelemiya ha bya bantu nimwabo ba Yunda, oho Yehoyakimu mwana Yoshiya hinga ekala myaka yinaa, ha wene. (Wengile mwaka wakutatika oho Nembukandineza, ashwanine ha wene mu Mbambiloni).

² Muluwe Yelemiya wambile ku bantu nimwabo bamu Yunda na ku baya nimwabo bekalile mu Yelushalema ngayi,

³ “Ndaba mu myaka 23, kutatika ha mwaka wa 13 oho Yoshiya mwana Amoni hinga enga mwene mu Yunda, kukuma naku mutena walelo, Nyambi ya Ngula wunambanga kukwami, pe ami nambanga kukwenu hashikati nimwasho, ngoboni kaliha mwanyuvwile.

⁴ Hinge ndi Nyambi ya Ngula unatumunga kukwenu bakamilimo bendi bamiluwe hashikati nimwasho, kaliha mwatengekele matu wenu kukwabo hinge ku bayuvwishisha.

⁵ Bamiluwe bambilenga ngayi, ‘Tengulukenu nimwenu, fumenu ku zinzila zenu zazibi na kuntendelo yenu yayibi, mwanga mwikale mu litunga elye Nyambi ya Ngula apanine kukwenu naku bankakazenu, mwaya myaka.

⁶ Bamitongwezele ngayi hinga mulemeesha hinga kutendela milimo banyambi bashenge, hinga mupilamisha Nyambi ya Ngula ha kulemesha tunankishi munatende na maboko wenu, mwanga abule kumishushula.’

⁷ Ngoboni Nyambi ya Ngula ukwamba ngayi, mwakanine kumuyuvwilila, mwamupilamishile na tunankishi twenu, haya munaliletele makando enu bamwine.”

⁸ Nohobene, Nyambi wa Makunge ukwamba ngayi, “Ndaba kaliha mwayuvwililile mazu wami,

⁹ nikehana mishobo nimwayo yaku ncelele, nikehana na mukamulimo wami Nembukandineza mwene waku Mbambiloni. Nikaletesha kulwa mukati ka Yunda na matunga nimwawo aya balitabwila nawo zinginza. Nikabalobesha na kubengisha lisheni na ba kuhendiwa, pe bakaloba mwaya myaka.

¹⁰ Nikafumisha kukwabo miyoyo ya kutangalala na ku wahilila na miyoyo ya bimbo bya shifupawenga. Kukekala na mazi amu zilambi bafwako na mishindo ya kutwa kukayuvwanika yifwako.

¹¹ Litunga nimwalyo likafutuka mapembe na matunga aya balitabwila nawo zingiza, akatendela milimo mwene waku Mbambiloni, myaka ya makumi mutanu na abili.

¹² Pe munyima ya myaka 70, nikashushula mwene waku Mbambiloni na bantu bendi, ndaba ya wubi wabo. Nikafutula Mbambiloni, kwinga lipembe mwaya myaka.

¹³ Nikashushula baka Mbambiloni na malwa nimwawo aya nambile muli Yelemiya ngayi niwo akeza ha matunga. Malwa nimwawo aya anatikitiwi muno mu libuka.

¹⁴ Nikabweshela hanebye banatende baka Mbambiloni, mishobo ya bantu babengi na bamyene babanene. Bakafutula baka Mbambiloni kwinga bandungo.”

Kuyata kwa Nyambi ha Matunga

¹⁵ Nyambi ya Ngula, Nyambi wa Ishalela wambile kukwami ngayi, “Shimba eye nkomoki mu liboko lyami, eye yinenzala na wukali wami, yitwale ku matunga nimwawo kuya nakutumine ngayi mwanga bakanwemo.

¹⁶ Oho bakanwamo, bakatalangila, pe bakapempela ndaba ya mukwale uya nili na ku batumina.”

¹⁷ Niho nashimbile nkomoki mu liboko lya Nyambi ya Ngula nayipanine ku matunga nimwao kuya antumine nabengishile ngayi banwemo.

¹⁸ Yelushalema na minzi nimwayo ya mu Yunda na bamyene na babilolo, oho banwinemo balobele na kufutuka libelelengwa. Bafutukile shuma sha kukomokesha na sha kukutiwa kuleta na mutena walelo.

¹⁹ Bamina kami banwine mu nkomoki bengile Fwalo mwene waku Engepita na bakamilimo bendi na babilolo bendi na bantu bendi nimwabo,

²⁰ na mapukwenda nimwabo aba bekalilenga nabo na bamyene nimwabo bamu litunga lya Uzi na bamyene nimwabo ba ku Fwilishitiya, ba zinkena za Ashikeloni na Ngaza na Ekiloni na baya bashalile mu Ashindondi,

²¹ na baka Endoma na Mowambi na Amoni,

²² na bamyene nimwabo ba mu Tile na Shindoni na bamyene nimwabo ba ku bibumbo bya liwate lya Menditelenyani,

²³ bantu ba ku Ndendani na Tema na Mbuzi na baya nimwabo baketwilanga huki zabo ngayi zipihe,

²⁴ na bamyene nimwabo ba ku Alembiya na bamyene nimwabo ba mikoka ya bantu bamu libelelengwa,

²⁵ na bamyene nimwabo ba ku Zimili na Elamu na Mendiya,

²⁶ na bamyene nimwabo ba ku ncelele na ba hahepi na bakwakutali, kufuma ku umo kuya kuwamina naku wene nimwako wa hano hanci, banwinemo. Wamamaninino ku nwamo ukenga mwene waku Mbambiloni.

²⁷ Pe ukabatongweze ngayi, Nyambi wa Makunge, Nyambi wa Ishalela, ukwamba ngayi, “Nwenumo mwanga mukolwe na kuluka kutwala nihakuwila hanci, kukatwesha kupindukamo kami mufwako ndaba ya mpoko ya mukwale eye nikutuma mukatikenu.

²⁸ Ngoboni ndi ba kukana kutambula nkomoki ku liboko lyobe na kuyinwa, niho ukabatongweze ngayi, Nyambi wa Makunge unamba ngayi mu ku fwanina kuyinwa.

²⁹ Monenu, nikubalika kutenda byabibi ku lukena lukutumbiwa na lizina lyami. Kati mu kuhanganika ngayi mukaya bakubula ku shushuliwa ndi? Mwa shikumakuya kwakubula ku shushuliwa mufwako, ndaba nikatuma mpoko ya mukwale ha bantu nimwabo bazika hano hanci, nisho anamba Nyambi wa Makunge.

³⁰ “Obe Yelemiya uku fwanina kulubulula kukwabo mazu awa nimwawo na kubatongweza ngayi, ‘Nyambi ya Ngula ukakangoka na kumbyazeka ku mwanya wendi wa kuyela muyilu. Ukakangoka kulwisha bantu bendi, ukakuwa ngo eshe bakuwanga bakakulyatangila mikabo ya shinyanca, na kulwisha nimwabo bazika hano hanci.

³¹ Mungunina ukayuvwanika hano hanci nimwaho. Ndaba Nyambi ya Ngula uli na shambo na matunga a bantu nimwabo. Ukaleta bantu nimwabo ba hano hanci mu kuyatishiwa, pe bakuluwa bakazihiwa na mukwale. Eshe nisho anamba Nyambi ya Ngula.’ ”

³² Nyambi wa Makunge ukwamba ngayi, “Monenu, byabibi bikapita kufuma ku litunga na kuya litunga na nkuli yayinene yikakatuka ku balika kunkumo yimo ya kaye kukakuma na kunkumo yamina.

³³ Ha mutena uyo bakazihiwa na Nyambi ya Ngula, bakapikwama hanci nimwaho, kowa ukatwesha kubalila hinge ku babungika hinge ku bafunda, bakabungana hanci ngonehe ku lilala.

³⁴ “Tuwenu mbingo enu bantwamina, lilenu shikuma na kukuwela. Enu balishani ba bantu bami, lilenu na kulivumba mu mutoko. Shikati shenu sha kuzihiwa shinakumu, mukawa hanci na kupanzana ngonehi ya wanga ntesho yayiwahe.

³⁵ Balishani bakabula mwanya wakwitukila hinge bakakutwaminina matanga a bambelele bakabula mwanya wakupanzila.

³⁶ Yuvwenu kulila kwa balishani, mbingo za bakakutwaminina matanga a bambelele, ndaba Nyambi ya Ngula uli na kulobesha mabuyishilo wabo.

³⁷ Milaka yabo ya ku mwena yina handoliwi, ndaba ya wukali wa Nyambi ya Ngula.

³⁸ Nyambi ya Ngula unashiyi bantu bendi ngonehe shimbwi unafumu mu limfwenke lyendi, ndaba ya mukwale wa mukakuyandisha na wukali wawunene wa Nyambi ya Ngula unafutulu litunga kwinga libelelengwa.”