Yelemiya 24 - Libuka Lya Kuyela

Zintumba zibili za Nkuyu

¹ Nyambi ya Ngula wamoneshele zintumba zibili za nkuyu zatuliwile hambili ku Litala lya Nyambi, eshe shatendiwile oho mwene Nembukandineza waku Mbambiloni wafumishakale Yekoniya mwana Yehoyakimu mwene wamu Yunda, hamo na batulela bamu Yunda na bantu bawutungu na bakamilimo bamanono mu Yelushalema kubatwala ku Mbambiloni.

² Mu ntumba ya kutatika mwekalile nkuyu zaziwahe shikuma, zafwekele ngo nkuyu zalimenekanga kuhoka. Ntumba ya wubili mwekalile nkuyu zazibi shikuma, kami zabulile kutwesheka kuliwa.

³ Nyambi ya Ngula wanyipwile ngayi, “Kati unamono bishini Yelemiya?” Nakumbwile ngayi, “Nkuyu, nkuyu zinengi zaziwahe shikuma, kami nkuyu zazibi zinengi zazibi shikuma kami zinabulu kutwesheka kuliwa.”

⁴ Nohobene Nyambi ya Ngula wambile ngayi,

⁵ “Nyambi ya Ngula, Nyambi wa Ishalela ukwamba ngayi, bantu aba na tanda muno mu litunga, kubatwala mu wuntapwa ku litunga lya Mbambiloni, nikalifulankana ngonehe eze nkuyu.

⁶ Nikakinka meho wami hahabo na kubatendela byabiwahe, pe nikababwesha ku litunga lino. Nikabazika kami kuka balobesha nifwako, nikabatampika kami kuka bazula nifwako.

⁷ Nikabapana mutima wakulimuka ngayi Ami nili Nyambi ya Ngula, niho bakenga bantu bami, kami Ami nikenga Nyambi yabo, ndaba bakabokela kukwami na mitima yabo nimwayo.

⁸ “Ngoboni nehi bya hali mwene Zendekiya wa litunga lya Yunda na babilolo ekala nabo na bantu bamu Yelushalema aba bekala mu litunga lino hinge aba banatuntukili ku Engepita, Ami Nyambi ya Ngula nikabenga ngonehe nkuyu ziya zazibi za kubula kutwesheka kuliwa.

⁹ Nikaleta malwa hahabo ngayi wene nimwawo wa hano hanci ukatina. Bantu bakabahengamina na ku balimbwilisha na ku ba kuta nimwako oku nikabapanzanishila.

¹⁰ Nikaleta nzita mukatikenu na kapande na wulweli, hantu kukabule na muntu umo hakatikabo wakushalako mu litunga liya nabapanikile na bankakazabo.”