Yelemiya 22 - Libuka Lya Kuyela

Lizu lya Yelemiya ku baka Litala lya Wene wa Yunda

¹ Nyambi ya Ngula ukwamba ngayi, yanga ku musheke wa mwene wa Yunda pe ukamutongweze awa mazu.

² Mwene wa Yunda, obe wekala ha litanda lya mwene Ndavita, yuvwilila lizu lya Nyambi ya Ngula, obe na babilolo bobe hamo na bantu bobe bengininanga ku mapangati ano.

³ Nyambi ya Ngula ukwamba ngayi, “Yatenu byambo shiwahe na kwoloka, pe mulamwine muntu ou ukupukuliwa ku liboko lya nou ukumuyandisha. Kami hinga mwikalisha shimpihi hinge kuyandisha mapukwenda na banginga hinge bamfwile, hinge kuyita mukeza wa bantu bakubula mulandu mu mwanya uno.

⁴ Ndi mwa shikuma mukwombatala elye lizu, pe bamyene ba ku bazukulya Ndavita aba bakekala ha litanda lyendi bakenginanga mu mapangati a litala lino, hinga bakandama mu makoloyi naha bambishi, nibo hamo na bakamilimo babo na bantu babo.

⁵ Nyambi ya Ngula ukwamba ngayi, ndi kwombatala mazu wami mufwako, nikulibeza na lizina lyami ngayi uno musheke ukawa, kami ukaloba.”

⁶ Nyambi ya Ngula ukwamba nehi ha musheke wa mwene wa Yunda ngayi, “Kukwami unengi wamuwahe ngonehe Ngiliyande hayilu ya lipili lya Lembanoni, ngoboni hinge noho nika kufutula lipembe, lukena lwa kubula muntu wakwikalamo.

⁷ Nikatuma bakakulobesha kwiza mu kukulwisha, muntu na muntu na kazembe kendi, pe bakatema mitondo yenu yayiwahe ya shinda na kuyiyumbila mu mundilo.

⁸ Bantu bakafuma ku matunga amengi bakapita ku lukena luno, baliyipula umo na wamina ngayi, ‘Kati shumangani Nyambi ya Ngula anatendele nehi lukena luno lwalunene?’

⁹ Pe bakakumbula ngayi, ‘Ndaba bakanine kulimama kwa Nyambi ya Ngula Nyambi yabo, kami banalemeshe na kutendela milimo banyambi bashenge.’ ”

Mazu a Yelemiya hali Shalumu

¹⁰ Enu bantu bamu Yunda, hinga mulila mwene Yoshiya hinga mulihohoma hahendi ou wafwa, ngoboni lilenu shikuma mwanendi Shalumu ou bali na kutwala kwakutali, kukaboka kami mu ku mona litunga lyendi lya shihemwa wufwako.

¹¹ Nyambi ya Ngula ukwamba hali Shalumu mwana Yoshiya, ou washwanine tatiyendi kwinga mwene wa Yunda, “Ou nafumu muno mu litunga, ngayi kukaboka kami ufwako.

¹² Ukafwila muyo bana mutwala mu wuntapwa, pe kukamona lino litunga kami wufwako.”

Mazu a Yelemiya hali Yehoyakimu

¹³ Makando wendi muntu ukazika litala lyendi mu nzila ya kulungwa, na kutenda tumpenci twendi twa kuyilu mu nzila yayibi, ou ukutendesha milimo bandambo bendi kwakubula kubapana ndando yabo.

¹⁴ Makando wendi muntu ou ukwamba ngayi, “Nikalizikila litala lyalinene lili na tumpenci twatunene kuyilu yalyo. Kami nikashiya mampananga na bihala byabiwahe bya bitondo bya shinda, na kuliwabisha wulombo wakufubila.”

¹⁵ Kati ukuhanganika ngayi ukwinga mwene wamuwahe ha kutenda matala a bitondo bya shinda, anapitakana bamina ku wuwahe ndi? Tatiyobe wayoyele shiwahe ndaba wengile muntu wakwoloka na ku mwena, na kutangama mu byuma nimwabyo atendelenga.

¹⁶ Wayatile ba kushepwa shiwahe, pe byuma nimwabyo bya mwendelele shiwahe. Eshe nisho anamba Nyambi ya Ngula.

¹⁷ Ngoboni obe uli na meho na mutima, waku monesha byobe byabibi tuhu, ukuziha bantu bakubula mulandu pe na mishunga ukulyatilila bantu bobe.

¹⁸ Nohobene Nyambi ya Ngula ukwamba hali Yehoyakimu mwana Yoshiya, mwene wa Yunda ngayi, “Kowa muntu eze akamulile hinge kulihohoma ngayi, ‘Bayaya tawee!’ Hinge ngayi, ‘Mpanzami tawee!’ Kowa muntu eze akamulile na kukwizoka ngayi, ‘Hekulyami tawee!’ Hinge ngayi, ‘Mwene wami tawee!’

¹⁹ Bakamufunda ngonehe mbongolo, bakamutulumuna na kumuyumbila kwakutali. Bakamuyumbila ha munkanda wa mapangati a Yelushalema.”

Mazu a Yelemiya ha Wukalu ukezilila Yelushalema

²⁰ Bantu bamu Yelushalema, kankalalenu ku lipili lya Lembanoni na ku bilika, yenu ku litunga lya Mbashani na kulila, bilikizilenu ku mapili a Mowambi, ndaba bakashikonzi benu nimwabo banakomiwi.

²¹ Nyambi wambile kukwenu oho mwatangamininenga, ngoboni mu kuyoya kwenu nimwako mwakanine kumuyuvwilila. Mwakanine kwombatala Nyambi ya Ngula.

²² Bakakutwaminina benu bakapepoka na mpepo, bakashikonzi benu banatwaliwi mu tolongo ya nzita. Lukena lwenu lukuhanduliwa na kuluyuvwisha lisheni ndaba ya kuluwa kwenu.

²³ Mwakwangulukanga shiwahe mukati ka matala akutenda ha bitondo bya shinda mwafumine nabyo ku Lembanoni, ngoboni eshi eze mukayene kukola oho kukeza hahenu. Kukola oko kukafweka ngo mbuyama ukushinga ku shalaho.

Kuyata kwa Nyambi hali Yehoyakini

²⁴ Nyambi ya Ngula wambile kuli mwene Yehoyakini, mwana mwene Yehoyakimu mwene wamu Yunda ngayi, “Mwa shikuma ami nenga Nyambi wakuyoya, hinga ndi wengile ngonehe kambalamunwe kashilimukisho ku liboko lyami lya shilyo, ngoboni nika kufumishako.

²⁵ Nikakupanika ku maboko a bantu baya watina, baya bakushinga kukuziha. Nikakupanika ku maboko a mwene Nembukandineza wa Mbambiloni na banzita bendi.

²⁶ Obe na mandiyobe nikamitandila mu wuntampwa, mu litunga omo mwabula kuhemuwila ngayi mukekalemo.

²⁷ Mukashinga ngayi mukaboke ku litunga lino, ngoboni kukabokelamo kami mufwako.”

²⁸ Yelemiya wambile ngayi, “Kati mwene Yehoyakini wafutukakale kwinga ngonehe ntesho ya kupabuka yinayumbiwili kwakutali ya kubula muntu wakuyishinga ndi? Shumangani bana bendi bakayumbiwa na kubatandila mu litunga babula kulimuka?”

²⁹ Obe litunga, obe litunga, obe litunga. Yuvwilila lizu lya Nyambi ya Ngula.

³⁰ Nyambi ya Ngula unamba ngayi, “Tikita ou muntu kukekala na bana wufwako, kukatangama wufwako. Kukekala na bazukulu wufwako, bayo bakamushwana mu Yunda, ku shwana ha litanda lya Ndavita.”