Yelemiya 21 - Libuka Lya Kuyela

Kukomiwa kwa Yelushalema ku kulubululiwa

¹ Elye nilyo lizu lya Nyambi ya Ngula kuli Yelemiya. Mwene Zendekiya wamu Yunda watumine Pashiha mwana Malikiya na mukankombela Zefwaniya mwana Maasheya kukwami na kwamba ngayi,

² “Twambileko kuli Nyambi ya Ngula, ndaba Nembukandineza mwene wa Mbambiloni uli na kushinga kutulwisha kampe Nyambi ya Ngula ukatenda bikomokesho ngonehe atendanga na ku bashintula.”

³ Yelemiya niho ambile kukwabo ngayi,

⁴ “Katongwezenu Zendekiya ngayi Nyambi ya Ngula, Nyambi wa Ishalela ukwamba ngayi, ‘Monenu, nikafumisha bilwisho bya nzita obyo bili mu maboko wenu na kulwisha nabyo mwene wa Mbambiloni na banzita bendi aba banazinguluku twimbi twenu, kami nikabibungika mukati ka luno lukena.

⁵ Nikamilwisha Amimwine, nikwolola liboko lyami na ngovu napilama shikuma.

⁶ Nikaziha bantu bekala mu lukena hamo na bimuna nimwabyo bikafwa ku wulweli.

⁷ Nyambi ya Ngula ukwamba ngayi, ku mamaninino nikapana Zendekiya mwene wa mu Yunda na bakamilimo bendi na bantu bamu lukena luno bakapuluka ku nzita na kapande na wulweli, mu maboko a mwene Nembukandineza waku Mbambiloni mu maboko a bamalamo babo, bayo bakushinga ku baziha. Bakabaziha na mikwale, kuka bayuvwila nceshe hinge shikeketima bafwako.’ ”

⁸ Nyambi ya Ngula niho antongwezele kutongweza bantu ngayi, “Yuvwililenu! Lihatilenu mukati ka nzila yikuya ku wumi na nzila yikuya ku kufwa.

⁹ Muntu nimwendi ukekala mu lukena ukafwa ku nzita, hinge kukapande, hinge ku wulweli. Ngoboni muntu nimwendi eze akalishishe ku baka Mbambiloni, aba bali na kulwisha lukena lwenu, kukazihiwa wufwako, ngoboni ukapanza na wumi wendi.

¹⁰ Ninafungu kuleta malwa ha nolu lukena kaliha byabiwahe. Nikaluyaka mu maboko a mwene wa Mbambiloni ou ukaluhokesha na mundilo. Eshe nisho anamba Nyambi ya Ngula.”

Kuyata baka litala lya Wene wa Yunda

¹¹ Nyambi ya Ngula wantongwezele kutongweza baka litala lya wene wa Yunda bazukulya Ndavita ngayi,

¹² “Yuvwililenu baka litala lya Ndavita kunebye nikwamba Ami Nyambi ya Ngula. Yatenunga mukupwisha ha mutena na mutena. Lamwinenu Kayunda mu maboko amukakumuyandisha na muntu ou unapukuliwi, ndi kutenda noho mufwako, ntendelo yenu yayibi yikabangiza kupilama kwami ngo mundilo ukabanga kami kowa muntu ukatwesha kukawuzima.”

¹³ “Obe Yelushalema Ami nika kulwisha, unekala hayilu ngonehe limanya lya ha mbuwa, mukwamba ngayi kowa muntu ukutwesha kutulwisha hinge kutiba bipata byetu.

¹⁴ Nikakushushula kuya na biheka byobe. Nikahokesha mashaka wobe na mundilo, kami mundilo ukahokesha nimwabyo bili hahepi nalwo.” Eshe nisho anamba Nyambi ya Ngula.