Yelemiya 20 - Libuka Lya Kuyela

Yelemiya ukubula kuliyuvwashana na Mukankombela Pashiha

¹ Oho mukankombela Pashiha mwana Ima ou wengile mukulwane wa mu Litala lya Nyambi ya Ngula, ayuvwile ngayi Yelemiya uli na kulubulula ebye byuma.

² Niho Pashiha akamine muluwe Yelemiya na kumuyaka mu bikulo byekalile ku lipangati lya Mbenjamani yaku Litala lya Nyambi ya Ngula.

³ Oho kwashile Pashiha washobwele Yelemiya mu bikulo, pe Yelemiya wambile kukwendi ngayi, “Nyambi ya Ngula kukwihana ngayi Pashiha afwako, ngoboni ngayi obe mutentu ku zimbalila nimwazo.

⁴ Nyambi ya Ngula ukwamba ngayi, mona, nikakwingisha mutentu obe na bahoni bobe, nimwabo obo bakafwa ku mukwale wa bamalamo babo obe hiwupenza. Kami nikayaka Bayunda nimwabo mu maboko a mwene wa Mbambiloni, ou ukabatwala mu wuntapwa ku Mbambiloni, kuya niko bakazihiwila.

⁵ Kami nika lehela bamalamo babo kupukula wuheti wa muyo mu Yelushalema na ku bayangula byabo nimwabyo, hamo na wuheti wabo nimwawo wa bamyene bamu Yunda bakabatwala mu wuntapwa ku Mbambiloni.

⁶ Kami obe Pashiha mukakwatiwa na kutwaliwa mu Mbambiloni, omo eze wukafwile na kufundiwa, hamo na bahoni bobe nimwabo baya watongwezelenga bya mahalo.”

Yelemiya ukulihohoma kuli Nyambi ya Ngula

⁷ Nyambi ya Ngula wanyongezele, niho netabilile. Obe uli wangovu shikuma kumpitakana, kami unantweshe. Nengakale wakuhepiwa mutena nimwawo, pe bantu nimwabo bakuhengamina.

⁸ Ndaba oho nikwamba, nikulila na kukaloka ngayi, “Mishunga na kuloba.” Obe Nyambi ya Ngula, mona nili na kukenduliwa na kuhengaminiwa mutena nimwawo, ndaba ya ku shimikila lizu lyobe.

⁹ Ngoboni ndi nikwamba ngayi, “Nifwako kukatoya Nyambi ya Ngula, hinge kukamba mu lizina lyendi nifwako,” niho mazu obe akwinga ngo mundilo ukubanga mu shali shami. Nikwezeka shikuma kuholekawo ngoboni kutwesha nifwako.

¹⁰ Nikuyuvwa kuyebetela kwakwingi. Mutentu uli kuzimbalila nimwazo pe bamalamo ba kulyambashana ngayi, “Tuyenu tumushimike ku bakulwane.” Hinge bahoni bami naliyuvwa nabo shikuma ba kutatilila ku mona kuwa kwami, bakwamba ngayi, “Kampe ukutwesheka kwongeziwa, pe tukutwesha ku mukwata na kumubweshela wubi.”

¹¹ Ngoboni obe Nyambi ya Ngula uli hamo na nami ngonehe kanzita wa ngovu. Aba ba kundwisha bakakwanga kami bafwako kukantwesha. Bakayeneshiwa ndaba kutwesha kukoma bafwako. Lisheni lyabo kukavulamiwa lifwako.

¹² Obe Nyambi wa Makunge, wahengolanga bakulunga, ukulimuka bili mu mitima yabo na bihanganiko byabo, pe nikushinga ku mona eshi ukubweshela wubi bamalamo bami ndaba nayaka wukalu wami mu maboko wobe.

¹³ Yimbililenu Nyambi ya Ngula, yemezenu Nyambi ya Ngula. Ndaba walamwinanga wumi waba kakuyanda ku maboko a bakawubi.

¹⁴ Mutena nahemuwile winge wakukutiwa, mwanga mutena uya bambelekele bamawa ubule mfuywezi,

¹⁵ kukutiwe muntu uya waletelele batate lushango lwa kubawahililisha ngayi, “Ou mwanobe unahemuwu wa mulume.”

¹⁶ Mwanga uya muntu afweke ngonehe minzi yiya alobeshele Nyambi ya Ngula na kubula kuyiyuvwila nceshe. Mwanga ayuvwe miteto ya kulila kulumenemene, na ngongi ya nzita shikati sha mwana,

¹⁷ ndaba wabulile kunzihila mu livumo shinga bamawa nibo bengile shinzimbi shami.

¹⁸ Shumangani nahemuwilile? Kati nimone makando na kwikala na lisheni mu matena akuyoya kwami ndi?