Yelemiya 2 - Libuka Lya Kuyela

Wubi wa Bankaka ba Ishalela

¹ Nyambi ya Ngula wambile kukwami ngayi,

² “Yanga ukabilike mu Yelushalema ngayi, Nyambi ya Ngula unamba ngayi hinanuka kwombatala kwobe oho wekalile ushili wamushe, wancingile ngonehe shishemo sha mwenga. Hinanuka eshi wankonkelenga mu libelelengwa muya mu litunga mwa kubula kulima byakulya.

³ Ishalela, obe wengile wami, wengile wuheti wami wa kuyela. Natumine malwa na makando ku bamalamo bobe nimwabo.” Eshe nisho anamba Nyambi ya Ngula.

⁴ Yuvwililenu lizu lya Nyambi ya Ngula enu bazukulya Yakobo, enu nimwenu baka mukoka wa Ishalela.

⁵ Nyambi ya Ngula ukwamba ngayi, “Kati mulandu ngani ou bawanine batatizenu kukwami ou wabengishile ngayi bamfutaminine? Balemeshele tunankishi twowa pe nanibo bafutukile kwinga byowa.

⁶ Kaliha bepwile ngayi, ‘Kati Nyambi ya Ngula uli kuti, uya watufumishile mu Engepita na kututwaminina mu libelelengwa, mu litunga lya lihengevu na mankwina na lya malwa, muyo mu litunga lya nyuminine na mincimpwe, muyo mwa kubula muntu wakwikalamo hinge kwendamo uli kuti?’

⁷ Nakutwalile mu litunga lya wilo ngayi mwanga ulikuwe mikabo, na byabiwahe nimwabyo byekalamo. Ngoboni oho benginine mu litunga lyami balibipishile, pe bafutwile likona lyami kwinga lya wunyengwe.

⁸ Bakankombela kaliha bepwile ngayi, ‘Kati Nyambi ya Ngula uli kuti?’ Baya balongeshelenga mazu a Nyambi kaliha bandimukile. Batulela bamfutaminine, bamiluwe balubwililenga mu lizina lya Mbaalu pe bakonkele tunankishi twowa.”

Nyambi ya Ngula ukuyata bantu bendi

⁹ “Haya nikumipana mulandu kami nikapana mulandu naku bazukulyenu.

¹⁰ Yenunga ku mponci, ku bibumbo bya Shayipulashi mukamone, hinge tumenu muntu ku mushamuko ku Kenda akapenzesheshe shiwahe, ndi ukawana ngayi kuli bya kufweka ngonehe ebye bya shikale.

¹¹ Kati kwekala litunga lya tambashananga banyambi balyo ndi? Hinge ndi ngayi banyambi babo banengi bakubula kupwisha. Ngoboni bantu bami banatambashana Nyambi yabo wa maleema na banyambi bakubula kutwesha ku bayavwa.

¹² Haya enu mayilu komokenu ha ntendelo yanehe, tinenu na kukanka shikuma.” Eshe nisho anamba Nyambi ya Ngula.

¹³ Bantu bami banatende milandu yibili, banamfutamini ami kaheloke ka mema a wumi, pe banalikabili mashima, ngoboni anengi mashima aya ali na myata aya a kubula kutwesha kukonga mema.

Kubula kulunga kwa ba Ishalela

¹⁴ “Ishalela kaliha ndungo, kaliha wahemuwila mu wulungo, haya shumangani bamalamo bendi bali na kumuyomba?

¹⁵ Bali na kumubulumina ngonehi bimbwi, litunga lyendi banalifutulu lipembe, pe zinkena zendi zinalobo, kowa wekalamo.

¹⁶ Baengepita bamu Memfwishi na Tahipaneshi, bana tabozolo kangola kobe.

¹⁷ Ishalela, obemwine waliletelele, washiyile ami Nyambi yobe, oho na kutwaminine mu nzila.

¹⁸ Ukawanaho shumangani ha kuya ku Engepita, mu kunwa mema amu mushinzi wa Nayilo, ukawanaho shumangani ha kuya ku Ashiliya mu kunwa mema amu mushinzi wa Yufuleti?

¹⁹ Wubi wobe ukakushushula obe mwine, ndaba unafumu kukwami. Nohobene ukalilongesha wukalu na wubi wakufuma kukwami, ami Nyambi yobe, ha kubula kunyombatala. Nisho anamba Nyambi wa Makunge.”

Ishalela ukukana kulemesha Nyambi ya Ngula

²⁰ Ishalela, ku mwaka wakanine kunyuvwilila, pe wambile ngayi, “Nifwako kuka kutendela milimo!” Ngoboni ha binkanda na binkanda byabitali, na ku nceto ya mutondo na mutondo wa mumvulu wawuwahe, unatende ngonehi mukalwiholwiho.

²¹ Nakukunine ngonehe mutondo wawuwahe wa shinyanca, ngonehi mbuto yayiwahe shikuma. Ngoboni mona eshe ulilimo! Ukufweka ngonehi mukolobozi wa shinyanca waku bola, wakubula kuyavwa shimina.

²² Hinge niho ukayowelesha mulola wa mututume, na kuliyavwisha mulola wawingi shikuma, nishili ku mona kulambakana kwa milandu yobe. Eshe nisho anamba Nyambi ya Ngula.

²³ Haya ukwamba nahiti ngayi, shilolo nilibipishe, kami shilolo nilemeshe Mbaalu? Mona ebye unatende mu mukulo. Ukulifweka na mwana Kamela uli na kushinga ku kandamiwa, ukwituka yituka hinga ashoboloka.

²⁴ Ukulifweka na mbongolo wa nkaziwa, wenzilila kwituka yituka mu libelelengwa, oho akushinga nkunzi waku mu kandama. Yani ukatwesha kumushinga? Kowa nkunzi ukalikwangisha kumushingashinga, ndaba ukukandamiwa shikati nimwasho.

²⁵ Ishalela, hinga ukwangisha mawulu wobe, hinga mulibu wobe hinga uyuminina na linyontwa, kwituka na kwituka noku noku kulemesha banyambi bashenge. Ngoboni obe ukwamba ngayi, “Byo! Nifwako kutwesha kuboka kunyima. Nahaka mwaka banyambi bashiyeni pe nikabakonkezeka!”

Ishalela wafwanini ku shushuliwa

²⁶ Bantu ba Ishalela bakayuvwa lisheni, ngonehi mwizi ayuvwanga lisheni ndi banamuwanikizi. Baishalela na bamyene na babilolo, na bakankombela na bamiluwe babo, nimwabo aba bakayuvwa lisheni.

²⁷ Bambanga ku mitondo ngayi, “Obe tatiyetu,” na ku limanya, “Obe mandiyetu.” Banamfutulukili, ngoboni oho muli mu wukalu mukwamba ngayi, “Yeka, utulamwine!”

²⁸ Haya banyambi mwalitendela balikuti? Lehenu beze bamilamwine oho muli mu wukalu. Obe Yunda banyambi bobe banavulu, ngonehi yinavulu minzi yenu.

²⁹ Kati shumangani mu kumbangila? Nimwenu mwamfutulukilile,

³⁰ Nashushwile banabenu, ngoboni kaliha mwalilongesheho ha shuma eshe. Ngonehe shimbwi wamukali, mwazihile bamiluwe benu na mukwale.

³¹ Bantu ba Ishalela, yuvwililenu kunebye nikwamba. Kati nafutuku kwinga ngonehi libelelengwa kukwenu, hinge ngonehi litunga lya mincimpwe shikuma ndi? Haya shumangani bantu bami bakwamba ngayi, “Tuli ba kushoboloka, tufwako kukaboka kami kukwobe?”

³² Kati mwenga ukutwesha kuvulama makaya wendi, hinge bivwalo byendi bya shifupawenga ndi? Ngoboni bantu bami banamvulama matena amengi shikuma.

³³ “Mukulimuka shiwahe kuzamina kushinga banjenge. Hinge bakazi balwiholwiho bali na kulilongesha kukwenu.

³⁴ Bivwalo byenu binatampakana na mukeza wa bancepwe bakubula mulandu. Hinga mwabula kubakwata hiba pukula mu matala wenu. Ngoboni ha nimwabyo ebye

³⁵ mushili kwamba ngayi, ‘Kowa shuma tunabipishi, kami Nyambi kumpilamina ufwako.’ Monenu! Nikamiyatisha ndaba mukwamba ngayi, ‘Kowa shuma tunabipishi.’

³⁶ Munalihehukishi enu bamwine ha kulemesha banyambi bashenge, Engepita ukakuyuvwisha lisheni, ngonehe akutendele Ashiliya.

³⁷ Mukafuma mu Engepita muntu na muntu hinga alikwata mbimbamutwe, ndaba Nyambi ya Ngula unakana baya mwakulupila, kami kowa kuyavwa mukawana kukwabo.”