Yelemiya 19 - Libuka Lya Kuyela

Ntesho ya kutabuka

¹ Nyambi ya Ngula wantongwezele ngayi, “Yanga ukalande ntesho ya lima ku mukakubumba. Ushimbe bakulwane bamo mukati ka bantu, hamo na bakankombela babakulwane.

² Pe mupite mu mukulo wa mwana Hinoma ku menginino a lipangati lya Potishelindi na ku shimikila mazu awa nikukutongweza.

³ Yanga ukambe ngayi yuvwililenu lizu lya Nyambi ya Ngula, enu bamyene ba mu Yunda nanenu mwekala mu Yelushalema. Nyambi wa Makunge, Nyambi wa Ishalela ukwamba ngayi, ‘Monenu nili na kuleta byabibi ha mwanya ou ngayi muntu nimwendi ukayuvwako ukalikomokela.

⁴ Ndaba bantu bananciyi ha kuzilula ou mwanya na kuhokeshelaho incence ya banyambi bashenge obo babulile kulimuka bankakazabo hinge bamyene zabo bamu Yunda.

⁵ Banazikili Mbaalu tuula oho ba kuhokeshela bana babo kwinga nkombela, oyo nabulile kubatongweza, hinge kubihanganika mu mutima wami.

⁶ Nohobene, monenu Nyambi ya Ngula ukwamba ngayi, matena akeza, oho lizina lya mukulo wa mwana Hinoma lifwako kukatumbiwa ngayi Tofweta, ngoboni likatumbiwa ngayi mukulo wa mponde.

⁷ Kami mwanya ou, nikamanisha biyongola bya bantu ba Yunda na Yelushalema, kami bantu bamo bakafwa ku mukwale wa bamalamo babo na liboko lya nobo bakushinga wumi wabo. Pe nikapanika mituntu yabo ku tuyoni naku batuyamana ngayi yikenge byakulya byabo.

⁸ Nikabipisha shikuma Yelushalema, ou nimwendi ukapitilako ukalikomokela, na kuyuvwa bowa.

⁹ Nikengisha bantu aba bakekalamo kulya nyama ya bana babo babalume naba ba bambuyama, kami muntu nimwendi ukalya nyama ya ndambo yendi, shikati osho bakabashinkila mu shipata, ku bamalamo babo, baya bakabayandisha naku baziha.”

¹⁰ “Nyambi ya Ngula niho antongwezele ngayi nipabule ntesho kumbili ya bantu nikwenda nabo,

¹¹ na kubatongweza ngayi Nyambi wa Makunge ukwamba ngayi, ‘Ngonehe shinatendiwi, nisho nikalobeshelamo aba bantu na nou munzi, ngonehe unapabulu eye ntesho ya lima ya kubumba, pe kukatwesha kuwanikiwa kami yifwako. Bantu bakafundila mituntu yabo mu Tofweta, ndaba bafwako kukawana mwanya wamina wakubafunda.

¹² Eshe nisho nikatenda ku mwanya uno nanaba bazikamo. Nikafutula luno lukena ngonehe Tofweta.

¹³ Matala amu Yelushalema nawa a bamyene bamu Yunda na matala nimwawo aya habiluli byawo bahokeshelelenga incence ku nyenye na kuya betilililenga waine, kwinga zintupu banyambi bashenge. Bakenga bakubula kuyela ngonehe Tofweta.’ ”

¹⁴ Yelemiya niho afumine ku Tofweta, oku amutumine Nyambi ya Ngula mu kulubulula, pe wemanine mu shinzanza sha Litala lya Nyambi, niho ambile ku bantu nimwabo ngayi,

¹⁵ “Nyambi wa Makunge, Nyambi wa Ishalela ngayi, monenu nikuleta ha luno lukena naha minzi yalwo ya hahepi, byabibi nimwabyo biya nabatoyelele ngayi nikabitenda ndaba banakaluhishi mitima yabo, pe banakana kuyuvwa lizu lyami.”