Yelemiya 18 - Libuka Lya Kuyela

Yelemiya ku Litala lya Mukakubumba

¹ Nyambi ya Ngula wambile kuli Yelemiya ngayi,

² “Katuka ukunkuluke ku litala lya mukakubumba, niko ukayuvwila mazu wami.”

³ Niho na kunkulukile ku litala lya mukakubumba namuwanine ha bumba ha mibalo akubumbila.

⁴ Oho ntesho iya abumbilenga yabunkukile, washimbile liya lima na ku bumbaho ntesho yashenge, ngonehe eshe shamuwahililishile.

⁵ Nyambi ya Ngula niho ambile kukwami ngayi,

⁶ “Enu baka litala lya Ishalela kati kutwesha kutenda kukwenu ngonehe eshe atendanga mukakubumba lima nifwako ndi? Monenu, enu muli mu maboko wami ngonehe lima lili mu maboko a mukakubumba.

⁷ Ha shikati shamina nikabilika ha litunga hinge ha wene ngayi nikalizula, hinge kuli cancola hinge kuli lobesha,

⁸ ndi liya litunga natoyo likutenguluka ku byabibi, pe nikabweshamo bihanganiko byami hanebye nayongwele ngayi nikabitenda.

⁹ Ha shikati shamina nikabilika ku litunga hinge wene ngayi nikatampika na kutangamisha,

¹⁰ ndi ba kutenda byabibi na kubula kunyombatala, pe nikabula kutenda ebye byabiwahe na ba kulupishi.

¹¹ Haya tongweza bantu ba Yunda nanaba bekala mu Yelushalema wambe ngayi, ‘Nyambi ya Ngula ukwamba ngayi, nili na kuwahisha malwa aya akeza hahenu. Nili na kuyongola kumishushula. Bokenu haya, muntu nimwendi, alehe zinzila zendi zazibi na biheka byendi byabibi ali na kutenda.

¹² Ngoboni bakakumbula ngayi, “Byo, kutuyavwa shifwako, tukatwalililaho na bihanganiko byetu. Muntu nimwendi, ukakaluhisha mutima wendi na kutenda wubi ngonehe bakushinga.”

Bantu ba kukana Nyambi ya Ngula

¹³ Nyambi ya Ngula ulinakwamba ngayi, “Yipula matunga nimwawo kati kuli wayuvwa shuma shashinene ndi? Ishalela nafweke ngonehe kankanga natende shuma sha shibi shikuma.

¹⁴ Kati binkanda bya mamanya bya mu Lembanoni, kaliha byekalanga makelengo ndi? Kati tukonkolonga twa mema a kubombola twa ha mapili twayumanga ndi?

¹⁵ Ngoboni bantu bami banamvulama, ba kuhokesha incence kwinga nkombela ku tunankishi byuma byowa. Banafumu mu nzila eye bafwanina kwenda, kukonka nzila ya mwaka bafwako, ngoboni bali na kwenda mutunzila twa kufwashangila.

¹⁶ Litunga lyabo, likafutuka mapembe, likahendiwa shikati nimwasho. Aba nimwabo bakapitilako bakalikomokela, kami bakanyukumuna ku mitwe.

¹⁷ Ngonehe mpepo ya nkuli ya ku mushamuko, nikabapanzanishila ku bamalamo babo. Nikabapenzesha mongo ha mutena wa makando, kuka bapenzesha lupala lwami nifwako.”

Bihanganiko bya kulwisha Yelemiya

¹⁸ Niho bantu bambile ngayi, “Yizenu tuliyuvwashane mwakubebela Yelemiya, ndaba ku longesha kwa bakankombela na mazu a bakangana na mazu a bamiluwe, kukamana afwako. Tuyenunga tumulwishe na tunwa twetu, kami hinga tuyuvwilila ebye akwamba.”

¹⁹ Nohobene nalombelele ngayi, “Obe Nyambi ya Ngula, yuvwilila kulamba kwami, yuvwilila nanebye bali na kwamba bamalamo bami.

²⁰ Kati wubi ukutwesha kwinga ncuungu ya wuwahe ndi? Ngoboni banankabili linkwina ngayi nifwemo. Anuka eshe nemaninenga na kulambilila ngayi wufumishe wukali wobe hahabo.

²¹ Haya leha banababo mwanga bafwe ku nzala. Balehe bafwe munzita. Bakazabo bayinge bamfwile na kubula bana, balume mwanga bafwe ku wulweli, pe bandumbana mwanga bafwe munzita.

²² Mwanga batuwe mbingo ha matala wabo, oho ukatuma bakakubapukula wanguwangu, ndaba banankabili linkwina ngayi bankwate na kumanyika kantamba ngayi mawulu wami alikolekemo.

²³ Ngoboni obe Nyambi ya Ngula, wulimuka bihanganiko byabo bya kushinga kunziha. Hinga wuyatila milandu yabo, hinga kufumisha wubi wabo ku meho wobe. Balehe bapukale ku meho wobe, pe bashushule oho hinga wapilama.”