Yelemiya 17 - Libuka Lya Kuyela

Wubi na kashushwilo ka Yunda

¹ Nyambi ya Ngula ukwamba ngayi, “Enu bantu ba Yunda, wubi wenu unatikitiwi na shitikitisho sha shondo, unamanguliwi na kambayo ka ndayimondi mu matapa amu mitima yenu naku mashengo a tuula twenu.

² Bantu benu balemeshanga nyambi yenu Ashela ku tuula tubili mu nceto ya mitondo nimwayo ya mibombola naha binkanda,

³ naha mapili ali mumbuwa. Nika lehela wuheti na ntutu yenu ngayi bipukuliwe ku bamalamo benu ndaba ya wubi uli mu litunga lyenu nimwalyo.

⁴ Nikafumisha litunga mu maboko wenu liyo namipanikile, kami niketabilisha bamalamo benu ngayi bakamitwale mu wulungo mu litunga lyabo muya mwabula kulimuka ndaba munengishi wukali wami ngayi uhambize mundilo uya ukabanga mwaya myaka.”

Byambo bya mishoboshobo

⁵ Nyambi ya Ngula ukwamba ngayi, “Nakutiwi muntu ou ukukulupila muli minendi muntu, uya unakinki mutima mu ngovu za wuntu, uya ukufumisha mutima wendi kuli Nyambi ya Ngula.

⁶ Unafweke ngonehe lipukumuna lya mu libelelengwa. Liya lyamenanga mu litunga lyanyuminine, mu litunga lya limvu lya mushele, muya mwakubula kutwesha kwikala muntu, kowa shuma shashiwahe shikatendiwa kukwendi.

⁷ Ngoboni mfuywezi zili ha muntu ukukulupila muli Nyambi ya Ngula, kulumbeza kwendi kuli tuhu muli Nyambi ya Ngula.

⁸ Unafweke ngonehe mutondo unakuniwi kwakwipi na mushinzi, ou ukutwala mipishi yawo mu mema, kami kulebuka ku mwaana ufwako, ndaba mabizi wawo akwinga a kubombola shikati nimwasho, kami kulikekula wufwako hashikati sha linanga, ndaba kaliha wakwanga kuyima mikabo.”

⁹ Mutima wenga wakwongeza kupitakana byuma nimwabyo, kami wenga wa wubi shikuma, yani ukutwesha kuwu yuvwishisha?

¹⁰ Ami Nyambi ya Ngula nikafwatula mutima na kuhengola bihanganiko bya muntu. Nikupana muntu ngonehe kubiheka byendi, ngonehe ku mikabo ya milimo yendi.

¹¹ Muntu ou ukuwana wuheti mu nzila yayibi, ukufweka ngonehe kayoni uya ukuteta mangi abula kuhema. Mukati ka matena wendi uya wuheti ukapanzana ku mamaninino wendi ukamoneka ngayi wengile shileya.

¹² Litanda lyaliwahe liya lyayemeziwanga ku balika ku matatikilo, lyenga mwanya wa litala lyetu lya kuyela.

¹³ Obe Nyambi ya Ngula, obe kulumbeza kwa Ishalela. Bantu ba kukufutamina nimwabo ukabayuvwisha lisheni. Bakabundala ngonehe mazina anatikitiwi hanci, ndaba banakufutamini obe Nyambi ya Ngula, obe kaheloke ka mema a wumi.

Yelemiya ukunyepa Nyambi ya Ngula kumuyavwa

¹⁴ Obe Nyambi ya Ngula, mpoleshe pe nikapola shiwahe, mpulwishe, pe nikapulwishiwa ndaba obe tuhu nikuyemeza.

¹⁵ Mona, bantu bakwamba kukwami ngayi, “Kati lizu lya Nyambi ya Ngula lilikuti? Haya shashiwahe ngayi liyinzalishililiwe.”

¹⁶ Kukukandamika ngayi ulete byabibi hahabo nifwako, hinge mutima wami kaliha washinga mutena wa makando, obe Nyambi ya Ngula nobe wulimuka ebye, ukulimuka kami ebye nambile.

¹⁷ Hinga winga wakutinisha kukwami, obe shipata shami ha mutena wa malwa.

¹⁸ Obo ba kunyandisha bayeneshiwe ngoboni ami hinga unyenesha. Benge ba kutampwishiwa ngoboni ami hinga untampwisha. Leta mutena wa byabibi hahabo mwanga balobe shikuma.

Kulama Mutena Wakukatala

¹⁹ Nyambi ya Ngula wambile kukwami ngayi, “Yanga ukemane ku lipangati lya bantu, kuya bamyene bamu Yunda bengininanga na kututikila naku mapangati amina amu Yelushalema,

²⁰ ukambe ngayi, ‘Yuvwililenu lizu lya Nyambi ya Ngula, enu bamyene na bantu nimwabo bamu Yunda na baya nimwabo bali mu Yelushalema baya bengininanga muno mu lipangati.

²¹ Nyambi ya Ngula ukwamba ngayi, munafwanini kukeya ngayi hinga mushimba biyeko ha Mutena Wakukatala, hinge kushipitisha mu mapangati amu Yelushalema.

²² Hinga, mututwisha biyeko mu matala wenu, hinge kutenda mulimo ha Mutena Wakukatala, ngoboni munafwanini kulama Mutena Wakukatala ndaba wenga wa kuyela, ngonehe natongwezele bankakazenu.

²³ Ngoboni bankakazenu kaliha bayuvwile hinge kwombatala ebye nabatongwezele, bengile babinkwange. Bakanine kunyombatala, kaliha batengekele matu wabo kukwami.’

²⁴ “Nyambi ya Ngula ukwamba ngayi, ndi mu kunyombatala shiwahe, mu kubula kupitisha biyeko byenu mu mapangati a lukena ha Mutena Wakukatala, ndi mu kulama Mutena Wakukatala ndaba wenga wa kuyela,

²⁵ pe bamyene baya bakashwananga ha litanda lya Ndavita, bakapitanga mu mapangati a lukena hamo na babilolo babo. Bakendelanga mu makoloyi naha bambishi, baka bashintikizanga bantu ba mu Yunda, hamo nanaba bamu Yelushalema. Pe mu lukena mukenzalanga bantu shikati nimwasho.

²⁶ Bantu bakafuma ku minzi yamu Yunda namu tunzi twazinguluka Yelushalema, bakafuma ku litunga lya Mbenjamani naku binkanda bya ku mponci, bakafuma ku litunga lya mapili naku Nengembu, bakaletanga zintupu za kuhokesha na zinkombela na zintupu za mpeka na incence na zintupu za kukambilila ku Litala lya Nyambi.

²⁷ Ngoboni ndi kunyombatala mufwako, ngayi mwanga mulame Mutena Wakukatala ndaba wenga wa kuyela, ndi mu kushimba shiyeko oho mukengina mu mapangati amu Yelushalema ha Mutena Wakukatala, pe nikabangiza mundilo ku mapangati, uya ukabula kutwesha kuzimiwa, pe ukalobesha bipata bya mu Yelushalema.”