Yelemiya 16 - Libuka Lya KuyelaShifungo sha Nyambi ya Ngula ha Wumi wa Yelemiya 1 Nyambi ya Ngula wambile kukwami ngayi, 2 “Hinga uyeka mukazi hinge kubeleka bana babalume nanaba babambuyama mu mwanya uno. 3 Kaliha wafwanina kutenda noho ndaba Nyambi ya Ngula ukwamba ha bana babalume nanaba ba bambuyama banahemuwili mu mwanya uno na bamandizabo naku batatizabo ngayi, 4 bakafwa ku malweli akutinisha. Bafwako kukaliliwa hinge kufundiwa. Bakabungana ngonehe wilo wa hanci. Bakaloba na mukwale kami bakafwa kukapande, zinyutu zabo zikenga byakulya bya batuyoni na tunzama twa mu lishaka.” 5 Nyambi ya Ngula ukwamba ngayi, “Hinga wingina mu litala muli malila, hinge ku monesha wunginga, ndaba nafumishi ku mwena kwami ku naba bantu na nceshe zami za mwaya myaka na shikeketima shami binafumu kukwabo, ebye nibyo akwamba Nyambi ya Ngula. 6 Babanene na babashe bakafwa mu litunga lino, kukafundiwa bafwako, kami kowa muntu ukabalila, hinge kulibwekozola niyemwine, hinge ku sheha ku mutwe ku monesha ngayi uli na kulila. 7 Kowa muntu ukapana byakulya ku baya ba kulila, hinge kubengezeka uya muntu unafwishi. Kowa muntu ukapana nkomoki yakubengezekesha muntu unafwishi tatiyendi hinge mandiyendi.” 8 “Hinga wingina mu litala muli mayambwayambwa. Hinga wikala na kulya nabo, hinge kunwa nabo. 9 Kaliha bafwanina kutenda noho ndaba Nyambi wa Makunge, Nyambi wa Ishalela ukwamba ngayi, nikamwenesha miyoyo ya ku wahilila na kutangala na miyoyo ya bimbo bya shifupawenga. Ebye bikatendiwa hashikati sha kuyoya kwenu, pe mukabimona.” 10 “Oho ukatongweza bantu ebye nimwabyo, bakakwipula ngayi, ‘Kati shumangani Nyambi ya Ngula akatushushwila na malwa anehe? Kati bishini tunabipishi? Kati tunatende wubi ngani kuli Nyambi ya Ngula, Nyambi yetu?’ 11 Niho ukaba kumbule ngayi, Nyambi ya Ngula ukwamba ngayi, ‘Bankakazenu bamfutaminine, bakonkele banyambi bashenge, babatendelele milimo na kubalemesha. Banciyile, kami kaliha bombatalile kufundiziza kukwami. 12 Munabipishi shikuma kupitakana bankakazenu. Nimwenu muli babakalu mitima, kunyombatala mufwako. 13 Haya nikamiyumbila mu litunga liya enu na bankakazenu babula kulimuka. Kuyo mukalemeshenga banyambi bashenge mwaana na wushiku ndaba kukamiyuvwila nceshe nifwako.’ ” Kufuma mu Wuntapwa 14 Nyambi ya Ngula ukwamba ngayi, “Matena akeza, oho bantu bakabula kulibeza ngayi, ‘Ngonehe Nyambi ya Ngula ayoya, uya wafumishile Baishalela mu Engepita,’ 15 Ngoboni bakamba ngayi, ‘Ngonehe Nyambi ya Ngula ayoya, uya wafumishile Baishalela, mu litunga lya ku ncelele naku matunga nimwawo kuya abapanzanishile.’ Nikababwesha mu litunga liya napanine bankakazabo.” Kashushwilo kaya kakeza 16 Nyambi ya Ngula ukwamba ngayi, “Nikatuma bakakushashila zinci babengi, pe bakabakwata. Nikatuma kami babibinda babengi, pe bakabayomba ha mapili naha binkanda namu manzolongoma amu mamanya. 17 Meho ami amonanga zinzila zabo nimwazo, kutwesha kuholamina bafwako. Wubi wabo kutwesha kuholama wufwako. 18 Nikabashushula shikuma ndaba ya kuluwa kwabo na wubi wabo, ndaba banabipishi litunga lyami na tunankishi twa wunyengwe twa kubula wumi, banenzalishi litunga lyami na banyambi ba mahalo.” Yelemiya ukulombela na kukulupila 19 Nyambi ya Ngula obe ngovu zami na shipata shami na matinino wami ha shikati sha makando. Matunga akwakutali a hano hanci akeza kukwobe na kwamba ngayi, “Bankakazetu bekalile na banyambi bowa ba mahalo, bakubula kutenda byamina. 20 Kati muntu ukutwesha kulitendela banyambi ndi? Hinge ndi ukutenda kaliha benga banyambi ba kupwisha.” 21 Nyambi ya Ngula ukwamba ngayi, “Nikabafundiziza, hashikati shino na ku monesha ngovu zami na nyala zami ku matunga. Niho bakalimuka ngayi, Nyambi ya Ngula, nilyo lizina lyami.” |
Libuka Lya Kuyela © Bible Society of Zambia, 2020.
Bible Society of Zambia