Yelemiya 15 - Libuka Lya Kuyela

Makando ku Bantu ba Yunda

¹ Nyambi ya Ngula wambile kukwami ngayi, “Hinge ndi shinga ba Moshesha na Shamwele bakwimana kuno ku meho wami na kundambilila, hinge noho kukatwala mutima ku naba bantu nifwako. Batande bafume ku meho wami bayenga.

² Oho bakakwipula ngayi, ‘Tukaya kuti?’ Kabatongweze ngayi, Baya banayatiwi ngayi bafwe ku wulweli, bakafwa ku wulweli. Baya banayatiwi ngayi bafwe ku mukwale, bakafwa ku mukwale. Bamina banayatiwili ngayi bafwe kukapande, bakafwa kukapande. Baya banayatiwi kukatwaliwa mu wuntapwa, bakaya mu wuntapwa.”

³ Nyambi ya Ngula ukwamba ngayi, “Nikatenda byuma binaa biya eze bikamoneke kukwabo, bamo bakazihiwa na mukwale, pe zinyutu zabo bakazitulumuna batuwa, batuyoni na tunzama twa mu lishaka bakalya zinyutu zabo.

⁴ Kami nikaletesha matunga nimwawo mu kaye kulikomokela hanebye bya wunyengwe nikatenda hahenu, ndaba ya wubi wa Manashe mwana Hezekiya, mwene wa Yunda uya atendele mu Yelushalema.

⁵ “Yani eze akakuyuvwile nceshe obe Yelushalema, hinge ou eze akakulile yani? Yani ou eze akekale na shitima shakwipula bya kuyoya kwobe?”

⁶ Nyambi ya Ngula ukwamba ngayi, “Enu bantu munankana, munashanuku na kumfutamina. Nohobene nolwelakale liboko lyami hahenu mwanga nimilobeshe. Nakwangakale kumiyuvwila nceshe.

⁷ Nikamilelekela kufuma mu minzi nimwayo yamu litunga ngo mwila. Nikalobesha bantu bami. Nikaziha bana babo ndaba ya kubula kuleha zinzila zabo za wunyengwe.

⁸ Nikavulisha bamfwile mu litunga lyabo, bakavula kupitakana lihekelela lya ku liwate. Nikaziha bana babo ba babalume ha shikati sha mwaana, mutena oho uli hakati ka mutwe na kushiyila bamandizabo makando. Nikababazumuna na makando na kubengisha mutentu.

⁹ Mbuyama uli na bana mutanu na babili ukalunguka, na kumina moyo. Mutena ukafutuka mincimpwe kukwendi oho kushili mwaana ukayeneshiwa, pe ukekala na lisheni shikuma. Baya bakashalaho bakazihiwa na mukwale ku bamalamo babo. Eshe nisho anamba Nyambi ya Ngula.”

Yelemiya ukulihohoma kuli Nyambi ya Ngula

¹⁰ Makando wami tawee, kati bamawa bambelekelele bishini? Nina kulyamba hamo na kulikananganisha na bantu mu litunga nimwalyo. Shilolo nipane mukuli, hinge kushimba mukuli ku bantu, ngoboni nimwabo bali na kunkumangiza.

¹¹ Nyambi ya Ngula wambile ngayi, “Mwa shikuma nika kulamwina, ndaba ya shihanganiko shashiwahe. Mwa shikuma nikengisha bamalamo bobe kukemana hamo na kulambilila kukwobe ha shikati sha malwa na makando.

¹² Kati muntu ukutwesha ku mungula shondo ndi, shondo sha ku ncelele hinge lubemba lwa ku ncelele ndi?

¹³ “Wuheti wenu na zimfuma zenu, nikabipanika ngayi bakabipukule nahiya, ndaba ya wubi nimwawo munatende mu litunga nimwalyo.

¹⁴ Niketabilisha bamalamo benu ngayi bakamitwale mu wulungo, mu litunga lyabo, muya mwabula kulimuka. Ndaba wukali wami ukabangiza mundilo uya ukamilobesha.”

¹⁵ Obe Nyambi ya Ngula, hiwulimuka eshe sha kutendiwa kukwami, nyanuke kami nyavwe. Bweshela wubi wanobo bali na kunyandisha. Hinga ubalehelela ngayi mwanga banzihe. Hanganika eshe nili na kuhanduliwa ndaba ya lizina lyobe.

¹⁶ Oho wambile kukwami mazu obe angwahilishile na kutangala, ndaba nili wobe, Obe Nyambi ya Ngula, Nyambi wa Makunge.

¹⁷ Kaliha nekalile hamo na bakawuncengwe, hinge ku wahilila nabo. Nekalile ninkayami, ndaba liboko lyobe lyekalile hahami, ndaba wanyingile wamukali.

¹⁸ Haya bishini nikwonzela ku yandila? Haya bishini bitombo byami bikubula kupangiwa, haya bili na kukana kupola? Kati ukenga ngonehe kashinzi ka yumanga, kakubula mema a kwihala ndi?

¹⁹ Haya Nyambi ya Ngula ukwamba ngayi, “Ndi ukulishisha, nika kutambula, ngayi mwanga ukenge mukamulimo wami kami. Ndi ukamba mazu amawahe na kubula kwamba byowa pe ukenga muluwe wami kami. Bantu bakeza kukwobe, obe kukaya kukwabo wufwako.

²⁰ Nikakwinga ngo kembi kakushuma ka lubemba ku meho wanaba bantu. Bakakulwisha, ngoboni kuka kutwesha bafwako, ndaba nili nobe, nika kulama na kukulamwina. Eshe nisho anamba Nyambi ya Ngula.

²¹ Nikakulamwina ku ngovu za bantu bakuluwa na kukupulwisha ku ngovu za bantu ba mishunga.”