Yelemiya 14 - Libuka Lya Kuyela

Linanga lyalinene

¹ Nyambi ya Ngula wambile kuli Yelemiya habya linanga ngayi,

² “Yunda ukulila, minzi yendi yinapopo bantu bendi banalangana hanci na kulila, kami kulila kwa Yelushalema ku nayi hayilu.

³ Babilolo bendi banatumu bakamilimo babo mu kutekula mema, banayi ku mashima, ngoboni shilolo bawane mema banaboko na zintesho zanahiya banayene banayuvwu lisheni shikuma nohobene banalifwiki ku mitwe yabo.

⁴ Hanci hanatabozoko myata, ndaba kunabulu kuloka mvula bandimi banayene banafwiki ku mitwe yabo.

⁵ Hinge shineke mu mbuwa unashiyi mwanendi wamukata kuya na ku shingashinga mwila.

⁶ Bamikambi mu lishaka banemana ha twina twanyuminine, ba kuhekela ha kwoya ngonehe bamimbwe, meho wabo akuzininika, ndaba banabulu mwila wakubuya.

⁷ Obe Nyambi ya Ngula, hinge ndi wubi wetu unatuyeneshe, tuyavwe ndaba ya lizina lyobe. Tunashanuku bikati byabingi tunabipishi kukwobe.

⁸ Obe tuhu kulumbeza kwa Ishalela, Obe mukakubapulwisha hashikati sha makando, kati shumangani unengili ngonehe muyeni mu litunga ngonehe mukakwenda uya ukulala tuhu wushiku umo?

⁹ Shumangani unengi ngo muntu bana bazumwishi, ngonehe kanzita nabulu ngovu za kupulwisha? Hinge noho obe Nyambi ya Ngula uli mukatiketu, kami tukwihaniwa na lizina lyobe, hinga boha utushiya.”

¹⁰ Eshe nisho anamba Nyambi ya Ngula hanaba bantu ngayi, “Bahaka kwitukila kwakutali na nami, kami kutwesha kulilama bafwako. Haya Nyambi ya Ngula, kutwesha ku batambula wufwako. Ukanuka milandu yabo na kubashushwila wubi wabo.”

¹¹ Nyambi ya Ngula wambile kukwami ngayi, “Hinga ulombelela aba bantu ngayi bayavwiwe.

¹² Hinge ndi bakazila kulya, kukayuvwa malombelo wabo nifwako. Hinge ndi bakakombelela zinkombela za kuhokesha na zinkombela za mpeka, kukazitambula nifwako. Ngoboni nikabaziha na zinzita na kapande na malweli.”

¹³ Niho nambile ngayi, “Obe Mwene Nyambi ya Ngula, bamiluwe bali na kwamba kukwabo ngayi, ‘Kukamona zinzita hinge, kukekala na kapande mufwako, ndaba Nyambi ya Ngula unakulupishi ku mwena mu litunga.’”

¹⁴ Nyambi ya Ngula wankumbwile ngayi, “Bamiluwe bali na kulubulula bya mahalo mu lizina lyami. Kaliha ninabatumu, hinge kubapana ndayano, hinge kwamba kukwabo. Ebye bimono bakwamba kaliha bikufuma kukwami. Bali na kulubulula na kwaula byuma byowa, biya banalihanganikili.

¹⁵ Haya Ami Nyambi ya Ngula, nikakutongweza ebye nikatenda ku naba bamiluwe ba kulubulula mu lizina lyami, ngoboni ami kaliha nina batumu. Bakwamba ngayi, ‘Zinzita na kapande kukeza mu litunga bifwako.’ Aba bamiluwe, bakafwa ku zinzita naku kapande.

¹⁶ Aba bantu ba kulubulwila, bakafwa kukapande naku zinzita, bakapyukwama mu mikwakwa yamu Yelushalema, kowa ukatwesha ku bafunda. Olu lufu lukeza ku nimwabo, ku bakazabo naku bana babo babalume naba ba bambuyama. Nikabweshela kuluwa kwabo hahabo.”

¹⁷ Ukambe kukwabo ngayi, “Meho wami mwanga apwezume mihozi wushiku na mwaana, hinga nileha kupwezuma mihozi, ndaba bantu bami, banalemana shikuma, bali mu malwa amanene shikuma.

¹⁸ Ndi nikuya mu mafuba, niku mona baya banafu ku nzita. Ndi nikuya ku minzi, niku mona baya ba kukola ndaba ya kapande. Bamiluwe na bakankombela, banayi mu litunga babula kulimuka.”

Bantu ba kulambilila kuli Nyambi ya Ngula

¹⁹ Obe Nyambi ya Ngula kati kunamana, wavulamakale Yunda ndi? Kati unakende Ziyoni ndi? Kati bihi unatulemeke shikuma nehe aha tukubula kutwesha kupola? Twalumbezele ku mwena, ngoboni kowa wuwahe tunamono. Twatatililile shikati sha kubengezekiwa, ngoboni kunaholoko malwa.

²⁰ Obe Nyambi ya Ngula, tunatende wubi kukwobe. Tukulishisha wubi wetu, na wubi batendele batatizetu.

²¹ Hinga utukenda, hinga uhandula litanda lyobe lya maleema. Hinga umanisha kulimama kuya walimamine nanetu, ndaba ya lizina lyobe.

²² Tunankishi twowa twa bakamatunga, kutwesha kulokesha mvula tufwako. Liyilu ninkayalyo, kutwesha kulokesha mvula lifwako. Obe Nyambi ya Ngula, Nyambi yetu, mumwobe nimo tukulumbeza, ndaba obe watendanga ebye nimwabyo.