Yelemiya 13 - Libuka Lya Kuyela

Nguli ya Mukunzi wa Likwiza lya Kulelema

¹ Nyambi ya Ngula wambile kukwami ngayi, “Yanga ukalilandile mukunzi wa likwiza lya kulelema ulimange mu lukanda, ngoboni hinga uwuyaka mu mema.”

² Nohobene nalandile mukunzi na kulimangawo ngonehe antongwezele Nyambi ya Ngula.

³ Kami lizu lya Nyambi ya Ngula lyambile kukwami kawubili ngayi,

⁴ “Shimba mukunzi ou unalanda ou uli mu lukanda, uye ku mushinzi wa Yufuleti mwanga ukawumvumbike mu linzolongoma lya limanya.”

⁵ Niho nayile mu kumvumbika mukunzi ku mushinzi wa Yufuleti ngonehe antongwezele Nyambi ya Ngula.

⁶ Kami kunyima ya matena amengi Nyambi ya Ngula wambile kukwami ngayi, “Katuka uye ku mushinzi wa Yufuleti ukashimbe uya mukunzi nakutongwezele ngayi ukawumvumbike.”

⁷ Niho nayile ku mushinzi wa Yufuleti na ku vumbula uya mukunzi navumbikile. Haya monenu nawuwanine unacancozoko wakubula kami ku fwanina mu kuliyavwisha.

⁸ Niho Nyambi ya Ngula ambile kukwami ngayi,

⁹ “Eshe nisho akwamba Nyambi ya Ngula, nisho eze akamanishe kuliyemeza kwa bantu bamu Yunda na kulilundumika kwa baya bali mu lukena lwa Yelushalema.

¹⁰ Aba bantu bakuluwa aba ba kukana mazu wami, banakaluhishi mitima yabo pe bali na kupana maleema banyambi bashenge nibo bali na kutendela milimo, haya bafwekakale ngonehe ou mukunzi wowa.

¹¹ Ndaba ngonehe mukunzi waningatilanga mu lukanda lwa muntu, nisho natendele ku bantu ba Ishalela nimwabo na bantu ba Yunda ngayi benge ba kunkakatila mwanga bakenge bantu bami aba ba kundetela maleema na kuyemeza lizina lyami, ngoboni kaliha banyombatalile.” Eshe nisho anamba Nyambi ya Ngula.

Nguli ya Ntesho ya Waine

¹² Nyambi ya Ngula wambile kukwami ngayi, “Obe Yelemiya, tongweza bantu ba Ishalela ngayi benzalishe ntesho nimwayo na waine. Ndi bakakumbula ngayi, ‘Tukulimuka ngayi ntesho nimwayo yinafwanini kwinzala na waine,’

¹³ niho obe ukaba kumbule ngayi, ‘Nyambi ya Ngula ukwamba ngayi, monenu, nikakolwesha bantu ba litunga lino nimwabo na waine na bamyene baya eze bakashwanenga ha litanda lya wene wa Ndavita na bakankombela na bamiluwe na bantu nimwabo bamu Yelushalema.

¹⁴ Kami nikabalwisha umo na wamina, ngonehe mabotela akulipobapoba, bahemi bakalwisha bana babo, kaliha nikabayuvwila nceshe hinge shishemo, hinge kuka bayuvwila shikeketima ngayi mwanga nikabule kubalobesha.’ ” Eshe nisho anamba Nyambi ya Ngula.

Yelemiya ukushiwulula bantu ngayi hinga baliyemeza

¹⁵ Niho nambile ku bantu ba Yunda ngayi, “Yuvwililenu na kutengeka matu, hinga muliyemeza, ndaba Nyambi ya Ngula unamba.

¹⁶ Panenu maleema kuli Nyambi ya Ngula, Nyambi yenu, oho shilolo alete mincimpwe ngayi mawulu wenu alituntule, oho kushili liyeye mupanenu maleema ngayi lumuni luya muli nalwo hinga alufutula mincimpwe, ya ku shipa shikuma.

¹⁷ Ngoboni ndi kuyuvwilila mufwako mutima wami ukalilila kuwi, ndaba ya kuliyemeza kwenu, meho wami akapwezuma shikuma na mihozi ndaba likunge lya Nyambi ya Ngula lili na kutwaliwa mu wuntapwa.”

¹⁸ Nyambi ya Ngula wambile kuli Yelemiya ngayi, “Tongweza mwene na mandiyendi ngayi bafume ha matanda ndaba minana yabo yayiwahe yawakale ku mitwe yabo.

¹⁹ Minzi ya Nengembu banayizinguluku ku bamalamo babo kami kowa muntu ukutwesha kuyinginamo hinga kututikamo, bantu nimwabo bamu Yunda banatwaliwi mu wuntapwa.”

²⁰ Nyambi ya Ngula ukwamba ngayi, “Yelushalema, yimbula meho wobe umone aba bakufuma ku ncelele, kati balikuti baya bantu ba kupanikile ngayi ubalamenga, bantu waliyemezele nabo?

²¹ Haya ukamba bishini oho matunga aya waliyuvwile nawo baya bengile bahoni bobe oho bakafutuka kwinga bahekulyobe? Kati kaliha ukayuvwa kukola ku mutima ngonehe kukola kuya ayuvwanga mbuyama hashikati sha kubeleka ndi?

²² Kami ndi ukalyambisha mu mutima wobe ngayi, ‘Kati ebye byuma bili na kwiza nahiti hahami?’ Ebye binezi ndaba ya wubi wobe wawingi pe unavuliwi bivwalo na kuyandishiwa shikuma.

²³ Kati Kaetopya ukutwesha kufutula shikonde shendi ndi? Hinge Kampulu ukutwesha kufutula mabala wendi ndi? Nohobene nanenu kami kutwesha kutenda byabiwahe mufwako, ndaba mwenzilila kutenda byabibi.

²⁴ Nyambi ya Ngula ukamipepa ngonehe muzungu, ukupepuliwa na mpepo ya mulibelelengwa.

²⁵ Eshe nisho shitapilo shobe nili na kutenda hahobe, ndaba ngayi obe Yunda unavulama pe unakulupili mu mahalo. Eshe nisho anamba Nyambi ya Ngula.

²⁶ Nikayepula shivwalo shobe na ku kufwikasho ku meho pe muhelengwa wobe ukamoneka.

²⁷ Namono wunyengwe wobe na wumambe wobe na mwendela wobe, obe Yelushalema, kati shikati sha kukuma hati ukekala mumazilo?”