Yelemiya 12 - Libuka Lya Kuyela

Yelemiya ukulinyenga kuli Nyambi ya Ngula

¹ Obe Nyambi ya Ngula uli wa kupwisha shikati nimwasho, oho nikulinyengela kukwobe. Haya nikaleta shambo shami kukwobe. Kati shumangani eshe shaleteshanga bantu bakuluwa ngayi batangame? Kati shumangani shaleteshanga ngayi biya nimwabyo ba kutenda ba mahalo bitwesheke?

² Waba kunanga pe bahalabanga mipishi, bakulanga na kuyima mikabo. Batoyanga lizina lyobe shikati nimwasho ngoboni mitima yabo yili kwakutali na nobe

³ Ngoboni obe Nyambi ya Ngula wandimuka, wamonanga kami wezekanga mutima wami ngayi nili kukwobe. Bakokele kwakutali ngonehe bambelele bakuya mu kuzihiwa, bayake kunkumo kutwala noho mutena wabo unakumu wakuzihiwa.

⁴ Kati litunga lyetu likalila shikati sha kukuma hati? Kami mwila wamu mafuba ukalebuka shikati sha kukuma hati? Tunzama na tuyoni byafwakale, ndaba ya kuluwa kwa bantu bazikamo. Bantu bakwamba ngayi, “Nyambi ku mona ebye tukutenda wufwako.”

⁵ Nyambi ya Ngula wambile ngayi, “Yelemiya, ndi unalitandanga na bantu hiba kukukwangisha, haya ukutwesha nahiti kwituka na bambishi? Haya ndi ukutwesha kulituntula mwa kuyela, pe ukenga nahiti mu lishaka lya kuzika lya Yondana?

⁶ Banengi bawushinda wobe, aba bali na kwamba mahalo hahobe, nibo bali na kukulwisha. Hinga uba kulupila, hinge ndi bakwamba mazu amawahe hahobe.”

Kulihohoma kwa Nyambi ya Ngula ha Bantu bendi

⁷ Nyambi ya Ngula ukwamba ngayi, “Ninafutamini Ishalela, ninashiyi likona lyami. Ninapana bantu baya nahaka mu maboko a bamalamo babo.

⁸ Bantu bami banamfutulukili, ngonehe shimbwi abulumanga na wukali, nibyo ninabazimbi.

⁹ Bantu bami banafweke ngonehe ngonga unakulwishiwa ku tuyoni na tumina twalyanga nyama, Yihanenu tunzama twa mu lishaka twize na kulya.

¹⁰ Balishani babengi banabipishi mfuba yami ya shinyanca, banalyatangili mafuba wami. Litunga lyami lyaliwahe, banalifutulu libelelengwa.

¹¹ Banalishiyi hilibelelenga, linafutuku lipembe lili na kulila kukwami. Litunga nimwalyo linafutuku lipembe, ngoboni kowa ukuliyuvwila kukola ku mutima.

¹² Bantu banezi ha binkanda nimwabyo bya libelelengwa, pe banapukulu litunga. Nyambi ya Ngula ukaliyavwishabo ngonehe mukwale, ukalobesha bantu bendi kufuma ku mbalila yimo ya litunga, kutwala ku yamina. Kowa ukekala mu ku mwena.

¹³ Bantu bami bashangile loto, ngoboni banateze mihongela, banalikwangishi na milimo, ngoboni kowa ebye banawana. Bakayuvwa lisheni hanebye bakateza, ndaba ya wukali wa Nyambi ya Ngula.”

Shikulupisho sha Nyambi ya Ngula ku Bandambo ba Ishalela

¹⁴ Nyambi ya Ngula ukwamba ngayi, “Nehiboni ha bandambo bakuluwa ba Ishalela aba banapukulu litunga napanine ku bantu bami ba Ishalela. Nikabafumisha mu matunga wabo, ngonehe bazulanga mutondo, nikalamwina bantu ba Yunda mukatikabo.

¹⁵ Pe oho nabafumishakale mu matunga, nikabayuvwila nceshe. Niho nikababwesha ku matunga wabo naku makona wabo.

¹⁶ Ndi bakalilongesha shiwahe zinzila za bantu bami na kulibeza na lizina lyami ngayi, ‘Ngonehe Nyambi ya Ngula ayoya.’ Nehi balongeshele bantu bami kulibeza mu lizina lya Mbaalu, niho bakekala hamo na bantu bami.

¹⁷ Ngoboni ndi kukekala litunga lya kubula kunyombatala, pe nikazula uya mutondo na kuwu lobesha.” Eshe nisho anamba Nyambi ya Ngula.