Yelemiya 11 - Libuka Lya Kuyela

Yelemiya na Kulimama kwa Nyambi ya Ngula

¹ Nyambi ya Ngula wambile kukwami ngayi,

² “Yuvwilila mazu anoku kulimama kami tongweza bantu ba Yunda na Yelushalema

³ ngayi, ‘Ami Nyambi ya Ngula, Nyambi wa Ishalela nayaka shikuto ha muntu nimwendi ukubula kwombatala mazu a kulimama,

⁴ awa natongwezele batatizenu oho nabafumishile mu Engepita litunga lyengile ngonehe mundilo wa ngaanze kukwabo. Nabatongwezele ngayi banyombatale na kutenda nimwabyo biya nabatumizile. Bakanyombatala bakenga bantu bami kami Ami nikenga Nyambi yabo.

⁵ Niho nikalama shikulupisho nalikulupishile na batatizabo, sha kubapanika litunga liya likukunkula mahwe na wushi, mu litunga muya muli lelo.’ ” Niho Yelemiya akumbwile ngayi, “Shitendiwe noho, Obe Nyambi ya Ngula.”

⁶ Nyambi ya Ngula niho ambile kukwami ngayi, “Yanga ku minzi yamu Yunda namu mikwakwa yamu Yelushalema na kubilika ngayi, ‘Yuvwililenu ku mazu a kulimama kami akonkezekenu.

⁷ Ndaba natongwezele batatizenu na luhaho oho na bafumishile mu Engepita, kami nazaminine kubatongweza kuleta na mutena walelo.

⁸ Ngoboni kaliha banyombatalile kami kaliha batengekelele matu wabo kukwami. Ndaba muntu na muntu wazaminine kutenda mwayila wukalu wa mutima wendi wa wubi. Nohobene nabashushwile ndaba kaliha balamine mazu nimwawo a kulimama ngayi bawakonke, pe kaliha bawombatalile.’”

⁹ Nyambi ya Ngula niho ambile kukwami ngayi, “Bantu bamu Yunda nanaba bazika mu Yelushalema banamfutulukili.

¹⁰ Banaboko kunyima ku wubi wa bankakazabo, baya bakanine kwombatala mazu wami na kulemesha banyambi bashenge. Baka litala lya Ishalela na Yunda banapokolo kulimama kwami kuya nalimamine na batatizabo.

¹¹ Nohobene haya Nyambi ya Ngula ukwamba nehe ngayi, nili na kuleta malwa hahabo aya bakabula kupanza. Oho bakalilila kukwami kuka bayuvwa nifwako.

¹² Oho malwa akeza bantu bamu Yunda na Yelushalema bakaya na kulilila ku banyambi baya bahokeshelelenga incence ngoboni kuka balamwina bafwako.

¹³ Obe Yunda banyambi benu bavulakale ngonehe minzi yenu kami tuula twenu oku mwengilanga zinkombela za wunyengwe kuli nyambi yenu byavulakale ngo mumikwakwa yamu Yelushalema, munazikili Mbaalu tuula.

¹⁴ “Yelemiya, hinga ulombelela aba bantu. Hinga ulila hinga ku balombelela, ndaba nifwako kuka bayuvwilila ngayi nikabayavwe oho eze bakekale mu wukalu.”

¹⁵ Nyambi ya Ngula ukwamba ngayi, “Bantu aba nahaka bali na kutenda byuma byabibi. Wuwahe ngani bali nawo ngayi bekale mu litala lyami? Kati bakuhanganika ngayi ba kutwesha ku kandika makando ha kutenda bikulupisho byabingi na kutupula zintupu za bimuna ndi? Kati bakatwesha ku wahilila mu nzila eye ndi?

¹⁶ Nyambi ya Ngula shikati shimo wakutoyele ngayi, uli mutondo wakubombola wa olive wakuyima mikabo yayiwahe, ngoboni na kumbyazeka kwa lizu lyendi ngonehe mushika wawunene ukawuhokesha na mundilo na kuhokesha myahi yawo.

¹⁷ “Nyambi wa Makunge ou wawukunine wafungulakale malwa hahenu. Nibo banalitele ebye nimwabyo ndaba ya wubi banatende baka litala lya Ishalela na baka litala lya Yunda. Banakushonkomona wukali wami ha kutupula zinkombela za kuhokesha za incence kuli Mbaalu.”

Biyongola bya kuziha Yelemiya

¹⁸ Nyambi ya Ngula waholwele kukwami biyongola bya bakankole byabibi bekalile nabyo hahami.

¹⁹ Ngoboni nengile ngonehe mwana mbelele waku mwena ukutwaliwa mu kuzihiwa. Kaliha nalimukile ngayi ba kundwisha hinge ngayi bali na biyongola byabibi hahami, oho bambile ngayi, “Tokonoko tuteme ou mutondo na mikabo yawo, tokonoko tumufumishe mu litunga lya babomi, mwanga lizina lyendi likabule kwanukiwa.”

²⁰ Niho nalombelele ngayi, “Obe Nyambi wa Makunge. Obe wayatanga na kwoloka, wezekanga mutima na bihanganiko bya bantu, nyintabile nimone eshe ukubweshela wubi ku wubi hahabo, ndaba nayaka shambo shami mumwobe.”

²¹ Nohobene haya ebye nibyo akwamba Nyambi ya Ngula ha bantu ba Anatoti bakushinga wumi wobe, aba bali na kukutongweza ngayi, “Hinga ulubulula mu lizina lya Nyambi ya Ngula ndelewa ukafwa mu maboko wetu.”

²² Nyambi wa Makunge ukwamba hahabo ngayi, “Monenu, nikabashushula! Bandumbana babo, bakafwa ku mukwale na banababo bakafwa kukapande.

²³ Kowa hinge umo ukashalaho, ndaba nikaleta makando ha bantu ba ku Anatoti. Ukenga mwaka wakushushuliwa kwabo.”