Yelemiya 10 - Libuka Lya Kuyela

Bakakulemesha tunankishi na bakakulemesha mu kupwisha

¹ Enu bantu ba Ishalela, yuvwenu lizu lya Nyambi ya Ngula.

² Nyambi ya Ngula ukwamba ngayi, “Hinga mukonka zinzila za bantu bakubula kukulupila, kami hinga mutampwa na bimonekesho ebye mu ku mona muyilu, hinge ndi bantu bakubula kukulupila bakabitampwa,

³ ndaba biheka bya bantu kuyavwa bifwako. Watemanga mutondo mu lishaka pe mukakubaza wabazanga shifwekesha sha kanankishi na kambayo kendi.

⁴ Shiya shinabaziwi bashiwahishanga shiwahe na shiliva na ngolinde, bashipampalanga na bipikili ngayi hinga shiwa.

⁵ Tunankishi twabo tunafweke ngonehe bifwekesha bya bantu ba kulitendela bamu mfuba a namunwa, twashimbiwanga tuhu ndaba kutwesha kwenda hinge kwamba tufwako, hinga ututina boha, ndaba kutwesha kutenda byabibi hinge kutenda byabiwahe kukwobe tufwako.”

⁶ Obe Nyambi ya Ngula, kowa muntu waku kufweka, wenga uli wamunene, kami lizina lyobe lyenga lyalinene na ngovu.

⁷ Kati kuli wabula kukutina ndi, Obe Mwene wa matunga? Obe wafwanina kutiniwa, ndaba hakati ka bantu bangana ba matunga nimwawo, namu wene wabo nimwawo, kowa ou wakufweka.

⁸ Nimwabo bakuyeba na kubula ngana, ndaba kowa ebye ba kutwesha kulilongesha kutunankishi twa kubaza ha bitondo.

⁹ Tunankishi twabo twa kufwikiwa na shiliva yaku Tashishi na ngolinde yaku Ufwazi. Tunatendiwi na bantu bamanono, bambazi naba mfuzi banatuvwiki bivwalo bya kufumbuluka bya likwiza lya shimbombo, ebye binatendiwi na bantu bamanono.

¹⁰ Ngoboni Nyambi ya Ngula wenga Nyambi wa kupwisha, wenga Nyambi wakuyoya, kami wenga Mwene wa mwaya myaka. Oho akalihanga hano hanci hakankanga, kami matunga kutwesha kwimana ku wukali wendi afwako.

¹¹ Batongwezenu ngayi, “Aba banyambi kaliha nibo balengele mayilu na hanci, pe bakalobeshiwa hano hanci na mu nceto ya mayilu.”

Lwimbo lwa Kuyemeza Nyambi

¹² Nyambi ya Ngula niye walengele hanci na ngovu zendi, walengele kaye na ngana zendi, na kalimukisho kendi watandubwile mayilu.

¹³ Oho ambanga, mema a muyilu ankwancananga, ukukakamisha makumbi kwakumina hano hanci. Wamwesheshanga mimuni ya kulokesha mvula kami wapepokeshanga, mpepo kuyifumisha oku ayikongelanga.

¹⁴ Bantu nimwabo banengi bakuyeba, na kubula kalimukisho. Bamfuzi nimwabo banayeneshiwi na tunankishi twabo, ndaba banyambi babo ba mahalo kami wumi bafwawo.

¹⁵ Byenga byowa, kami bya mahalo. Hashikati sha kushushuliwa kwabo bikaloba.

¹⁶ Nyambi wa Yakobo, kaliha walifweka na tunankishi. Niye walengele byuma nimwabyo kami wahatile Ishalela kwinga bantu bendi. Lizina lyendi, niye Nyambi wa Makunge.

Kutwaliwa mu wuntampwa

¹⁷ Enu bantu bamu Yelushalema, longalongenu byuma byenu, ndaba munazingulukiwi.

¹⁸ Ndaba Nyambi ya Ngula ukwamba ngayi, “Nikafumisha aba bali mu litunga hashikati shino na ku baletela malwa, akutwaliwa mu wuntapwa.”

¹⁹ Bantu bamu Yelushalema ba kukaloka ngayi, “Makando wetu tawee, ndaba yakulemana kwetu shitombo shetu kutwesha kupangiwa shifwako, niho twambile ngayi, ‘Mwa shikuma, awa engakale makando wetu, twafwanini kuwatambula.’

²⁰ Zintanda zetu zinalobeshiwi, nyimbwa zetu nimwazo zinavutozoko, banabetu nimwabo banapanzana, kowa nanowu unashalako ngayi atuzikile kami zintanda, hinge kukoleka makwiza.”

²¹ Nakumbwile ngayi, “Bakakutwaminina betu bakuyeba, kupenza kuli Nyambi ya Ngula ngayi abayavwe bafwako. Nohobene, kutangamishiwa bafwako, matanga abo a bambelele anapanzana.

²² Tuyuvwililenu, kunezi lizu ngayi, litunga lyalinene lya bantu bakufuma ku litunga lya ku ncelele lili na kwiza. Banzita babo bakalobesha minzi yamu Yunda, pe yikafutuka malalo a bamimbwe.”

Lilombelo lya Yelemiya

²³ Obe Nyambi ya Ngula, hinilimuka ngayi wumi wa muntu kaliha wenga wendi niyemwine. Muntu kutwesha kutwaminina zinzila zendi niyemwine ufwako.

²⁴ Obe Nyambi ya Ngula, tutengulule shiwahe, ngoboni hinga wutushuza na wukali, pe akenga mamanino akuloba kwetu.

²⁵ Tulila wukali wobe ha matunga, aya abula kukulimuka, naha bantu baya babulanga kutoya lizina lyobe, ndaba banazihi mukoka wa Yakobo, banabazihi na kubalobesha. Bananyemunu matala wabo.