Yelemiya 1 - Libuka Lya Kuyela

Yelemiya

¹ Awa niwo mazu ambile Yelemiya mwana Hilikiya wa mulume, Hilikiya wengile umo wa bakankombela aba bekalile mu munzi wa Anatoti mu litunga lya Mbenjamani.

² Nyambi ya Ngula wambile kuli Yelemiya mu mwaka wawulikumi na yihatu wakulela kwa mwene Yoshiya mwana Amoni ou wengile mwene wa litunga lya Yunda.

³ Niho Nyambi ya Ngula ambile kami kukwendi oho Yehoyakimu mwana Yoshiya, mwene wa litunga lya Yunda. Wambile kukwendi kami bikati byabingi kukuma naku mwaka wawulikumi na umo wakulela kwa mwene Zendekiya mwana Yoshiya, mwene wa mu Yunda, kutwala na mu ngonda ya mutanu ya mwaka uya bantu bamu Yelushalema batwaliwile mu wuntapwa.

Yelemiya ukwihaniwa

⁴ Nyambi ya Ngula wambile kukwami ngayi,

⁵ “Nakulimukile oho shilolo nikubumbe mu livumo, kami oho shilolo uhemuwe na kuhatile. Nakuhatile ngayi winge muluwe ku matunga nimwao.”

⁶ Niho nambile ngayi, “Ha! Obe Nyambi ya Ngula, ami kulimuka sha kwamba nifwako, ndaba nishili kanuke shikuma.”

⁷ Ngoboni Nyambi ya Ngula wambile kukwami ngayi, “Hinga wamba ngayi nishili kanuke shikuma, ndaba unafwanini kuya ku bantu nimwabo nika kutuma pe ukambe kukwabo byuma nimwabyo ebye niku kutumiza.

⁸ Hinga ubatina, ndaba nikekala hamo na nobe, pe nika kulamwina.” Eshe nisho anamba Nyambi ya Ngula.

⁹ Niho Nyambi ya Ngula olwele liboko, wakwatile ku kanwa kami niho ambile kukwami ngayi, “Haya nayakakale mazu wami mu kanwa kobe.

¹⁰ Mona lelo haya nakupaniki ngovu ha matunga naha wene, ngovu za ku zula na kupamuna, ngovu za kulobesha na kufumisha, ngovu za kuzika na kutampika.”

Bimonekesho Bibili

¹¹ Nyambi ya Ngula wanyipwile ngayi, “Obe Yelemiya kati uku mona bishini?” Ami na kumbwile ngayi, “Niku mona mwahi wa mutondo wa Alimonde.”

¹² Niho Nyambi ya Ngula ambile kukwami ngayi, “Unamono shiwahe, ndaba nili na kupenzeshesha ngayi mwanga ebye nambile bitendiwe.”

¹³ Nyambi ya Ngula wanyipwile kami ngayi, “Kati uku mona bishini?” Ami na kumbwile ngayi, “Niku mona nyungu yikubila ku ncelele, pe yikushinga kuwila kuno tuli.”

¹⁴ Nyambi ya Ngula niho ambile kukwami ngayi, “Malamo akafuma ku ncelele pe akashindumukila ku baya bazika mu litunga lino.

¹⁵ Mona, nikehana matunga nimwawo aku ncelele, pe bamyene zabo bakeza, wene na wene ukatamika litanda lyawo ku mapangati a Yelushalema, bakazinguluka Yelushalema hamo na minzi nimwayo ya Yunda. Eshe nisho anamba Nyambi ya Ngula.

¹⁶ Nikashushula bantu bami ndaba ya kuluwa kwabo, ndaba banamfutamini, bali na kutendela zinkombela ku banyambi bashenge, bali na kulemesha biya banatende na maboko wabo nibo bamwine.

¹⁷ Ngoboni obe Yelemiya uliwahishile. Yanga ukabatongweze ebye nimwabyo ninakutumizi. Hinga ubatampwa, ndelewa nika kutampwisha ku meho abo.

¹⁸ Haya mona lelo ninakwingi shipata sha ku shuma na mpangwa ya shondo na kembi ka lubemba ngayi ulilamwine ku bamyene ba Yunda hamo na babilolo babo, hamo na bakankombela na bantu nimwabo bamu litunga.

¹⁹ Bakakulwisha ngoboni kuka kukoneneka bafwako, ndaba ami nili hamo na nobe pe nika kulamwina. Eshe nisho anamba Nyambi ya Ngula.”