Yakoba 5 - Libuka Lya Kuyela

¹ Tambako, enu bakakuheta, lilenu na kukaloka ndaba ya makalikiza akamishiwukila.

² Wuheti wenu unabolo na bivwalo byenu binaliwi ku tunzembule.

³ Ngolinde yenu na shiliva yinaliwi, ndala yayo yikenga paki kukwenu, yikalya nyama yenu ngo mundilo. Munalibungikili wuheti ha matena aku kotoka.

⁴ Monenu, ncuungu ya bakamilimo banateze ku mafuba enu, niyo yinaholekiwi kukwenu na kwongeza, yikubilikiza. Na kukuwela kwabo banateze kunakumu ku matu a Nyambi wa Makunge

⁵ Munayoyo mu myelembo ha litunga na kukeyuka. Munanunishi mitima yenu ngo ha mutena wakuziha.

⁶ Munayata na kuziha bakakwoloka na nibo kumi kana bafwako.

Mazu akulishiyashiya

⁷ Nohobene, bawushinda wami, yingenu ba lunzewe kuleta ku kwiza kwa Mwene. Monenu, ndimi ukutatila mbuto ya ndando yayinene ya litunga, ukuyitatilila na lunzewe shikuma hantu atambule mvula wa shituwizi na likuhulahoke.

⁸ Enu kami yingenu ba lunzewe! Shumishenu mitima yenu ndaba kwiza kwa Mwene kuli hahepi.

⁹ Hinga mutongawuka umo na wamina, bawushinda, kutina mukayatiwa. Monenu, mukakuyata ukwimana hambili ya shipana.

¹⁰ Bawushinda wami, hembwilizenu bamiluwe bashimikilile mu lizina lya Mwene na kuyanda makalikiza na lunzewe.

¹¹ Monenu, tukulaba ngayi aba ba kuzumanana benga ba kutandala. Munayuvwu ndaba ya lunzewe Yobo, munayuvwu biya Mwene apanikile Yobo ha kukotoka. Ndaba Mwene wenga wa shikeketima shikuma na nceshe.

¹² Ngoboni hayilu ya byuma nimwabyo, bawushinda, hinga mubeza, hinge na liyilu, hinge na litunga, hinge na mbeza zamina. Ngoboni, “Ingoi” yenu yinge ingoi, hinge “Byo” yenu yinge byo kutina muwila ku kuyata.

¹³ Ndi kwali wamina mukatikenu ukuyanda? Alombele. Ndi kwali wamina uku wahilila? Embile nyimbo.

¹⁴ Ndi kwali wamina wakukola mukati kenu? Ehane bakulwane ba litengo bamulombelele na kumuwabisha na mazi mu lizina lya Mwene.

¹⁵ Pe malombelo a kukulupila aka pulwisha mukakukola na Mwene ukamupindula, kami ndi unatende wubi, ukayatiwila kukwendi.

¹⁶ Yitabilenu wubi wenu umo kuwamina, mulilombelele umo na wamina ngayi munyongomane. Malombelo akushungama akutukumina a muntu wakwoloka akuyavwa shikuma.

¹⁷ Eliya wengile muntu wa shihemwa ngo etu na niye walombelele shikumakuma ngayi mvula hinga aloka, kalokeleha ha litunga myaka yihatu na zingonda za mutanu na imo.

¹⁸ Kami walombelele na liyilu lyalokeshele mvula na litunga lyameneshele mbuto yalyo.

¹⁹ Bawushinda, ndi wamina kukwenu unashanuku kukupwisha na umo ukumutengulula,

²⁰ alimuke ngayi niye ukutengulula mukawubi ku kushanuka kwa nzila yendi, ukapulwisha moyo ku kufwa na kufwika wubi wawingi.