Yakoba 4 - Libuka Lya Kuyela

¹ Zinzita na mangunga mukati kenu bikufuma kuti? Kati bifwako kufuma oku ku mahungu enu akulwa mu bimamo byenu ndi?

² Mukulishoza, kami kutambula mufwako, mu kuziha na kushinga byuma. Ngoboni mu kubula kutambula, mu kulikanangana na kulwa nzita, ngoboni mu kubula kutambula, ndaba mu kubula kulomba.

³ Mukulomba na kubula kutambula, ndaba mu kulomba shibi na kushinga kubiyumba ku myelembo yenu.

⁴ Enu balume na bakazi bakubula kukulupila! Mufwako kulimuka ngayi wuhoni wa kaye wenga nkole na Nyambi ndi? Nohobene nimwendi ukushinga kwinga muhoni wa kaye ukwinga mukankole wa Nyambi.

⁵ Kati mu kuhanganika ngayi byatikitiwile bikwamba tuntalu ngayi, “Moyo ukwikala mumwetu ukulishoza na ntalu.”

⁶ Ngoboni niye ukupana nceshe za kupitakana. Nohobene ukwamba ngayi, “Nyambi ukukana bakakuliyemeza, ngoboni ukupana nceshe ku bakakulilimbwilisha.”

⁷ Nohobene bombenu enubene kuli Nyambi. Kanenu Shatana, pe ukatina kukwenu.

⁸ Henyenenu kuli Nyambi, niye kami ukahenyena kukwenu. Yoweshenu maboko enu, enu bakawubi yeleshenu mitima, enu baka mitima yibili.

⁹ Kalikizenu na kulikekula na kulila, mahepo enu afutuke mbingo na ku wahilila kwenu kufutuke wulemu.

¹⁰ Lilimbwilishenu enubene ku meho a Mwene, pe niye ukamikatula.

¹¹ Hinga mulitungula umo na wamina, bawushinda. Niye ukutungula kawushinda wendi na kunyanca kawushinda wendi, ukutungula ndayano na ku nyanca ndayano, ngoboni ndi ukunyanca ndayano, obe kaliha mukakutenda ndayano, ngoboni mukakunyancazo.

¹² Mukakwimika mulao wenga umo, ou ukutwesha kupulwisha na kunongesha, kati obe yani ukunyanca wamina?

¹³ Tambako, enu mukwamba ngayi, “Lelo hinga nzona tukaya ku munzi wa shikananga na kwikalamo mwaka umo na kulanda na kulandisha na kuheta.”

¹⁴ Ngoboni mufwako kulimuka ebye bikenga nzona. Ndaba wumi wobe wenga bishini? Wenga mbundu yiku moneka kashikati, niho yikuzimina.

¹⁵ Ndaba mu ku fwanina kwamba ngayi, “Ndi Mwene ukwitabila, tukayoya na kutenda eshe, hinga shiyo.”

¹⁶ Ngoboni mu ku wahilila mu matukutuku enu, ku wahilila kwanoho nimwako kwakubi.

¹⁷ Nohobene ou ukulimuka kutenda shiwahe, kami ku shitenda wufwako, niye uli na wubi.