Yakoba 3 - Libuka Lya Kuyela

Lulimi

¹ Bawushinda wami, hinga mwinga balongeshi babengi, hinga mwa limuka ngayi tukatambula kuyata kwa kupitakana.

² Ndaba mu byuma byabingi tukupukala nimwetu. Ndi muntu wamina wufwako kupukala ku lizu, ou mukakulembuluka, ukutwesha kami kumanga lutu nimwalwo.

³ Monenu, tukuyaka lumingo mu tunwa twa bambishi, ngayi batwombatale, kami tukufutulula zinyutu zabo nimwazo.

⁴ Monenu kami bishepe, nibyo hinge byabinene, bikupepuka na mpepo yayikali, bikufutuluka na lileenge lyalishelishe, oku akushinga mukakutwaminina.

⁵ Nahiyo kami lulimi lwenga shimamo shashishe, lukulilundumika na byuma byabinene. Monenu, luhahi lwalushe lukubangiza lishaka lyalinenenene!

⁶ Na lulimi lwenga mundilo, kaye ka kutengama, lulimi lwenga noho mukati ka bimamo byetu, ngayi luku bipisha lutu nimwalwo na ku bangiza nyendelo nimwayo! Nilwo lukubangiziwa ku ngehena.

⁷ Ndaba mushobo nimwawo wa tuyamana na tuyoni na biya byalikokanga na bibumbwabumbwa bya mu liwate bikutambiwa ku bantu.

⁸ Ngoboni lulimi kowa muntu ukutwesha kulutambisha. Nilwo lwenga shinkwange wamubi, lunenzala na wuhungu wakufwa.

⁹ Tukuyemeza nalwo Nyambi niye Tate na nilwo tukutukanisha bantu, aba batendiwile mu shifwekesha sha Nyambi.

¹⁰ Mu kanwa kamo mu kufuma maleema na matuka. Bawushinda wami, byuma ebye kaliha biku fwanina kwinga noho.

¹¹ Kati lishima likutwesha kututwisha mema amawahe na mema amalulu mu lishima limo ndi?

¹² Kati bawushinda wami, mutondo wa mukuyu ukutwesha kuyima olive ndi? Hinga shinyanca shikutwesha kuyima nkuyu ndi? Hinga lishima likutwesha kututwisha mema a mushele na mema a kubombola.

¹³ Yani mukangana na mukakanangatima hakati kenu? Shashiwahe amoneshe na nyinkalo yayiwahe milimo yendi na kulilimbwilisha kwa ngana.

¹⁴ Ngoboni ndi muli na ntalu ya nkoko na nkani mu mitima yenu, hinga muliyemeza na kwongeza ku kupwisha.

¹⁵ Kukeya oku kukubula ku shuluka kuyilu, ngoboni kwenga kwa litunga, kwa wuntu, kwa Shatana.

¹⁶ Ndaba oku kuli ntalu na nkani, oku kuli mushunga na mulimo nimwawo wa wubi.

¹⁷ Ngoboni ngana zinafumu kuyilu zenga za kuyela ha kutatika, nizo za ku mwena, za kubomba, kaliha za kalimbwilisho, za shikeketima na mbuto yayiwahe, za kubula shihota, za kubula shishweka.

¹⁸ Mbuto ya kwoloka yikukubiwa mu ku mwena kukwabo ba kutenda ku mwena.