Yakoba 2 - Libuka Lya Kuyela

Kushiwulula ha shihota

¹ Bawushinda wami, ngo bakakukulupila muli Mwene wetu Yeshu Kilishitu Mwene wamuwahe, hinga mwikala na shihota na bantu.

² Ndaba ndi ku shikungulukilo shenu kukeza muntu uli na kambalamunwe ka ngolinde na bivwalo byabiwahe, kami ndi kukeza mukakushepwa na bivwalo byabibi,

³ nanenu mu kupana maleema ou ukuvwala bivwalo byabiwahe na kwamba kukwendi ngayi, “Yikala muno mu mwanya uli shiwahe,” na kwamba ku mukakushepwa ngayi, “Yimana oku obe,” hinga ngayi, “Yikala kuno ku malyatilo a mawulu ami,”

⁴ nka muli na shihota mukati kenu, kami munafutuku bakakuyata na bihanganiko byabibi.

⁵ Yuvwililenu, bawushinda wami ba kuhakiwa! Nka Nyambi unahata bakakushepwa ba litunga lino benge bakakuheta mu kukulupila na bakakukona wene ou a kulupishile kukwabo ba kumuhaka?

⁶ Ngoboni enu munakende bakakushepwa. Nka bakakuheta ba kumiyandisha na kumi kokela ku nkuta?

⁷ Nka nibo bakuhandula lizina elye lyaliwahe mu kutumbiwa nalyo?

⁸ Ndi mukwinzalisha ndayano za Wene, ngonehe byatikitiwile ngayi, “Haka ndambo yobe ngonehe walihaka obe mwine,” mukutenda shiwahe.

⁹ Ngoboni ndi mu kuhota bantu, mukutenda wubi na kuyatiwa ku ndayano ngo bakakushanuka.

¹⁰ Ndaba nimwendi ukuholeka ndayano nimwazo, ngoboni akiluku mu shuma shimo uli na mulandu ku nimwazo.

¹¹ Ndaba ou wambile ngayi, “Hinga utenda wumambe,” wambile kami ngayi, “Hinga uziha.” Nohobene ndi ukubula kutenda wumambe, ngoboni ukuziha, unafutuku kwinga mukakukiluka ndayano.

¹² Ambenu noho na kutenda noho ngo aba bakayatiwa na ndayano za ku shoboloka.

¹³ Ndaba ukayatiwa na kubula nceshe, ou unabulu kuyuvwa nceshe, nceshe zikulishamba ha kuyata.

¹⁴ Kukuyavwa nahiti, bawushinda wami, hinga muntu ukwamba ngayi unakulupili, ngoboni ukubula milimo? Kati kukulupila kukutwesha kumupulwisha ndi?

¹⁵ Ndi kawushinda wa mulume hinga wa mukazi uli na wuvwu na kubula byakulya bya ha mutena.

¹⁶ Na umo kukwenu ukwamba kukwabo ngayi, “Yenu mu ku mwena, tukuminenu na kwikuta!” Ngoboni kubapana mufwako byuma bya kuliyavwa nabyo ku kuyavwa bishini?

¹⁷ Nahiyo kukulupila ndi kukubula milimo, kunafu, ndi kukwikala ninkayako.

¹⁸ Kampe muntu ukwamba ngayi, “Obe uli na kukulupila na nami nili na milimo.” Nikakumbula ngayi, “Moneshe kukulupila kwobe kwakubula milimo. Nanami nika ku monesha kukulupila kwami na milimo yami.”

¹⁹ Obe ukukulupila ngayi kuli Nyambi umo, ukutenda shiwahe, mayimbwe kami a kukulupila na kukanka.

²⁰ Ngoboni, obe muntu wowa, kampe ukushinga kulimuka ngayi kukulupila kwakubula mulimo kunafu ndi?

²¹ Nka Abulahama tatiyetu wolokeshiwile na milimo oho akombelelele Ishaki mwanendi ha kaala?

²² Kati mu ku mona ngayi kukulupila kwatendele hamo na milimo yendi na kukulupila kwendi kwalembulukile na milimo ndi?

²³ Byatikitiwile byambile ngayi, Abulahama wakulupilile Nyambi, pe ndaba ya kukulupila, Nyambi ya Ngula wamutambwile kwinga wakulunga, kami niye watumbiwile ngayi muhoni wa Nyambi.

²⁴ Nohobene mu ku mona ngayi muntu ukwolokeshiwa na milimo, kaliha na kukulupila pele.

²⁵ Nahiyo kami Lahambu, niye mukalwiholwiho wolokeshiwile na milimo oho ekalile na kutambula bakakuhokela, kami wabafumishile na nzila yashenge.

²⁶ Ndaba ngo lutu lwa kubula moyo lunafu nahiyo kami kukulupila kwakubula milimo kunafu.